LISAUN 10
Oinsá mak bele hatene dalan loos atu adora Maromak?
1. Iha ka lae, relijiaun ida neʼebé loos?
“Imi tenke matan-moris kona-ba profeta falsu sira.”—MATEUS 7:15.
Jesus hanorin ninia dixípulu sira katak iha relijiaun ida deʼit neʼebé loos. Relijiaun loos mak hanesan dalan neʼebé lori ema ba moris rohan-laek. Jesus hatete: “Ema uitoan deʼit mak hetan dalan neʼe.” (Mateus 7:14) Maromak simu deʼit adorasaun neʼebé tuir lia-loos husi Bíblia. Ema neʼebé adora Maromak iha dalan neʼebé loos iha fiar ida deʼit.—Lee João 4:23, 24; 14:6; Éfeso 4:4, 5.
Haree vídeo Maromak simu adorasaun hotu ka lae?
2. Saida mak Jesus hatete kona-ba ema Kristaun falsu?
“Sira fó sai iha ema nia oin katak sira hatene Maromak, maibé sira nega nia liuhusi sira-nia hahalok.”—TITO 1:16.
Jesus fó avizu katak profeta falsu sira sei hatama hanorin falsu iha relijiaun Kristaun. Sira haree hanesan adora Maromak iha dalan neʼebé loos, no sira mós bolu sira-nia an nuʼudar ema Kristaun. Maibé ita bele hatene se sira adora Maromak iha dalan neʼebé loos ka lae. Oinsá? Hodi haree didiʼak sira-nia hahalok.—Lee Mateus 7:13-23.
3. Oinsá mak Ita bele hatene ema neʼebé halaʼo adorasaun loos?
Hanoin toʼok kona-ba buat lima neʼebé ema Kristaun loos sira hatudu:
-
Respeitu Bíblia nuʼudar Maromak nia Liafuan. Sira hakaʼas an atu halo tuir Bíblia nia matadalan. Tan neʼe, relijiaun neʼebé loos la hanesan ho relijiaun neʼebé tuir ema nia hanoin deʼit. (Mateus 15:7-9) Ema Kristaun neʼebé loos hakaʼas an atu moris tuir buat neʼebé sira hanorin ba ema seluk.—Lee João 17:17; 2 Timóteo 3:16, 17.
-
Hahiʼi Maromak nia naran Jeová. Jesus hahiʼi Maromak nia naran hodi fó-hatene naran neʼe ba ema seluk. Nia ajuda ema atu hatene kona-ba Maromak, no nia mós hanorin sira atu halo orasaun hodi husu katak Maromak nia naran sai santu. (Mateus 6:9) Iha Ita-nia fatin, ema husi relijiaun ida-neʼebé mak haklaken Maromak nia naran?—Lee João 17:26; Roma 10:13, 14.
-
Haklaken kona-ba Maromak nia Ukun. Maromak haruka Jesus atu haklaken liafuan diʼak kona-ba Ninia Ukun. Maromak nia Ukun deʼit mak lori esperansa ba ema. Jesus kontinua haklaken kona-ba neʼe toʼo nia mate. (Lucas 4:43; 8:1; 23:42, 43) Nia mós hatete katak ninia dixípulu sira sei haklaken kona-ba Maromak nia Ukun. Ema husi relijiaun ida-neʼebé mak haklaken ba Ita kona-ba Maromak nia Ukun?—Lee Mateus 24:14.
-
La hola parte iha mundu aat neʼe. Ema Kristaun loos la envolve an iha buat polítiku nian ka problema komunidade nian. (João 17:16; 18:36) Sira mós sees husi hahalok no toman aat oioin neʼebé ema barak hatudu iha mundu aat neʼe.—Lee Tiago 4:4.
-
Hatudu domin boot ba malu. Liuhusi Bíblia, sira aprende atu respeitu ema husi nasaun no rasa oioin. Maski dala barak relijiaun falsu sira apoia funu, maibé ema Kristaun neʼebé loos la halo ida-neʼe. (Miqueias 4:1-3) Ema Kristaun loos uza sira-nia tempu no rikusoin atu ajuda no fó kmaan ba ema seluk.—Lee João 13:34, 35; 1 João 4:20.
4. Tuir Ita-nia hanoin, relijiaun ida-neʼebé mak loos?
Relijiaun ida-neʼebé mak sira-nia hanorin hotu bazeia ba Maromak nia Liafuan no hahiʼi Maromak nia naran? Relijiaun ida-neʼebé mak haklaken katak Maromak nia Ukun deʼit mak lori esperansa ba ema? Relijiaun ida-neʼebé mak hatudu domin ba malu no la envolve an iha funu?—Lee 1 João 3:10-12.
