1. Tanbasá mak kalan neʼe mak tempu neʼebé aat liu iha Pedro nia moris?

 PEDRO sei nunka haluha tempu neʼe. Jesus hateke ba Pedro nia matan. Jesus hatudu katak nia hirus ba Pedro ka lae? Ita la hatene, Bíblia fó-hatene deʼit: “Naʼi fila oin hodi hateke ba Pedro.” (Lucas 22:61) Maibé, ita hatene katak bainhira Jesus hateke ba nia, Pedro hatene ho loos katak nia halo ona sala neʼebé boot tebes. Pedro hatene katak nia halo tiha buat neʼebé Jesus fó-hatene nanis, buat neʼebé nia rasik jura katak nia sei nunka halo, atu nega ninia Naʼi neʼebé nia hadomi tebes. Kalan neʼe mak hanesan mehi neʼebé aat tebes ba Pedro, no karik, tempu neʼe mak tempu neʼebé aat liu iha Pedro ninia moris tomak.

2. Pedro presiza aprende lisaun importante saida? Oinsá mak ninia istória ajuda ita ohin loron?

² Maibé situasaun neʼe la halo Pedro rende an. Tanba Pedro iha fiar neʼebé metin, nia sei iha oportunidade atu hadiʼa ninia sala boot neʼe, no aprende lisaun importante husi Jesus, neʼe mak kona-ba fó perdua. Ita ida-idak mós presiza aprende kona-ba ida-neʼe. Entaun, mai ita haree oinsá mak Pedro aprende lisaun importante neʼe.

3, 4. (a) Pedro husu pergunta saida ba Jesus? Tanbasá? (b) Oinsá mak Jesus hatudu katak Pedro halo tuir ema seluk nia hanoin?

³ Maizumenus fulan neen antes kalan neʼe, iha Pedro nia hela-fatin uluk iha Kafarnaum, Pedro hakbesik ba Jesus no husu: “Naʼi, toʼo dala hira mak haʼu-nia maun ka alin sei halo sala hasoru haʼu no haʼu tenke perdua nia? Toʼo dala hitu?” Karik Pedro hanoin katak nia hatudu laran-diʼak ona tanba nia dehan toʼo dala hitu. Tuir loloos, ulun-naʼin relijiaun nian iha tempu neʼebá, hanorin  katak tenke fó perdua ba ema dala tolu deʼit! Jesus hatán hodi dehan: “Laʼós toʼo dala hitu, maibé toʼo dala hitunulu-resin-hitu.”—Mateus 18:21, 22.

⁴ Jesus nia liafuan neʼe hatudu katak Pedro tenke sura ba dala hira mak nia fó perdua ba ema ka lae? Lae, maibé hodi troka 7 sai fali 77, Jesus dehan katak domin sei book ita atu kontinua fó perdua ba ema seluk toʼo la iha rohan. (1 Korinto 13:4, 5) Jesus hatudu katak Pedro halo tuir ema seluk nia hanoin neʼebé la hatudu laran-diʼak no la prontu atu fó perdua ba ema seluk. Maibé, Maromak nia hakarak mak atu ema fó perdua ba malu ho laran-diʼak no laran-luak.—Lee 1 João 1:7-9.

5. Bainhira mak ita aprende diʼak liu kona-ba fó perdua?

⁵ Pedro la haksesuk malu ho Jesus. Maibé, Jesus nia hanorin importante neʼe kona Pedro nia laran ka lae? Dala ruma, ita aprende diʼak liu kona-ba fó perdua bainhira ita rasik hakarak duni atu ema seluk fó perdua mai ita. Entaun, mai ita koʼalia fali kona-ba saida mak akontese iha kalan antes Jesus mate. Sin, iha kalan neʼebé susar tebes ba Jesus, Pedro halo sala barak neʼebé ninia Naʼi presiza fó perdua.

6. Saida mak Pedro halo kuandu Jesus koko atu hanorin ninia apóstolu sira kona-ba haraik-an? Maibé saida mak Jesus halo?

⁶ Kalan neʼe importante tebes, tanba iha kalan neʼe mak tempu ikus ba Jesus nia moris iha mundu. Jesus sei iha buat barak atu hanorin ba ninia apóstolu sira. Porezemplu, Jesus presiza hanorin sira kona-ba haraik-an. Nia hatudu ezemplu diʼak kona-ba neʼe hodi fase apóstolu sira-nia ain, maski neʼe mak hanesan atan nia serbisu. Ulukliu, Pedro husu tansá Jesus halo ida-neʼe, no nia lakohi Jesus atu fase ninia ain. Maibé tuirmai, nia husu fali Jesus atu la fase deʼit ninia ain, maibé fase mós ninia liman no ulun! Jesus hatudu pasiénsia nafatin ba Pedro no esplika tanbasá mak nia halo ida-neʼe.—João 13:1-17.

7, 8. (a) Pedro halo sala saida tan atu koko Jesus nia pasiénsia? (b) Oinsá mak Jesus kontinua hatudu laran-diʼak no prontu atu fó perdua?

⁷ Lakleur depois neʼe, Pedro koko fali Jesus nia pasiénsia. Pedro no apóstolu sira komesa istori malu kona-ba sé  mak boot liu iha sira-nia leet. Maski nuneʼe, Jesus korrije sira ho laran-diʼak no gaba mós sira ho buat diʼak neʼebé sira halo, hanesan sira laran-metin nafatin ba nia nuʼudar sira-nia Naʼi maski hasoru susar oioin. Maibé, nia mós fó-hatene nanis katak sira sei husik nia. Pedro hatete fali katak maski nia mate karik, nia sei nunka husik Jesus. Jesus hatete katak, tuir loloos, Pedro sei nega ninia Naʼi ba dala tolu antes manu kokoreek ba dala rua. Tuirmai, Pedro dehan katak Jesus sala, no ho foti-an hatete katak ninia fiar mak metin liu fali apóstolu sira seluk!—Mateus 26:31-35; Marcos 14:27-31; Lucas 22:24-28; João 13:36-38.

⁸ Ita bele komprende se Jesus la bele hatudu tan pasiénsia ba Pedro, loos ka lae? Maibé Jesus hatudu pasiénsia nafatin. Maski iha tempu susar neʼe, Jesus kontinua atu buka buat diʼak iha apóstolu sira-nia fuan-laran. Maski Jesus hatene ona katak Pedro sei nega nia, maibé nia hatete: “Haʼu harohan ona ba Maromak kona-ba ó, atu nuneʼe ó-nia fiar labele sai fraku; no kuandu ó fila, hametin ó-nia maluk sira-nia fiar.” (Lucas 22:32) Ho liafuan neʼe, Jesus hatudu nia tau fiar katak Pedro sei arrepende ninia sala no kontinua atu serbí Maromak ho laran-metin. Jesus mak laran-diʼak duni no prontu atu fó perdua, loos ka lae?

9, 10. (a) Iha jardín Getsémani, Jesus presiza korrije Pedro kona-ba saida? (b) Pedro nia sala sira fó-hanoin mai ita kona-ba saida?

⁹ Depois, iha jardín Getsémani, Pedro halo sala tan. Jesus husu Pedro, no mós Tiago no João atu matan-moris nafatin nuʼudar Jesus bá mesak atu halo orasaun. Iha tempu neʼe, Jesus sente laran-susar tebes no hakarak apóstolu naʼin-tolu neʼe atu apoia nia. Maibé Pedro no ninia maluk sira toba-dukur. Jesus nia liafuan hatudu katak nia hanoin ninia apóstolu sira no hakarak duni atu fó perdua ba sira. Nia dehan: “Laran hakarak, maibé isin fraku.”—Marcos 14:32-41.

¹⁰ Lakleur ema-lubun mosu. Sira kaer ahi-oan, surik no ai-dona. Tuir loloos, iha tempu neʼe, apóstolu sira tenke kuidadu no uza matenek. Maibé derrepente deʼit, Pedro losu ninia surik no taa Malko nia ulun, amlulik boot nia atan ida, no nia konsege sabir tiha Malko nia tilun sorin loos. Dala ida tan Jesus ho laran-diʼak korrije Pedro, fó  isin-diʼak ba Malko, no esplika katak ninia dixípulu sira sei la uza violénsia. Ohin loron, Jesus nia dixípulu sira sei halo tuir Jesus nia hanorin neʼe. (Mateus 26:47-55; Lucas 22:47-51; João 18:10, 11) Sin, Jesus fó perdua ba Pedro nia sala ida-idak. Pedro nia sala sira fó-hanoin mai ita katak “ita hotu halo sala dala barak”. (Lee Tiago 3:2.) Tuir loloos, loron-loron ita hotu hakarak Maromak fó perdua ba ita-nia sala, loos ka lae? Maibé kona-ba Pedro, kalan neʼe seidauk hotu. Iha kalan neʼe, nia sei halo sala neʼebé boot liután.

11, 12. (a) Oinsá mak Pedro hatudu aten-brani depois ema-lubun kaer Jesus? (b) Oinsá mak Pedro la halo tuir ninia liafuan rasik?

¹¹ Jesus fó-hatene ba ema-lubun neʼe katak se sira mai atu kaer nia, sira tenke husik apóstolu sira bá. Pedro haree ho laran-tun nuʼudar ema-lubun neʼe kesi Jesus. Depois, Pedro halai-sees hamutuk ho apóstolu sira seluk.

¹² Lakleur, Pedro no João para halai. Karik sira para besik Amlulik Boot Anas nia uma, fatin neʼebé ema-lubun lori Jesus. Nuʼudar ema lori Jesus ba fatin seluk, Pedro no João laʼo tuir maibé “husi dook”. (Mateus 26:58; João 18:12, 13) Ida-neʼe hatudu katak Pedro laʼós ema taʼuk-teen ida. Klaru katak presiza hatudu aten-brani atu tuir ema sira-neʼe. Ema-lubun neʼe lori kroʼat sira, no Pedro foin hakanek ema sira-neʼe ida. Maibé, Pedro sala nafatin tanba nia la halo tuir ninia liafuan rasik, katak maski nia mate, nia sei la husik Jesus.—Marcos 14:31.

13. Saida mak dalan ida deʼit atu halo tuir Kristu?

¹³ Ohin loron, ema barak sai hanesan Pedro hodi “tuir Jesus husi dook”. Neʼe katak sira lakohi ema seluk hatene kona-ba sira-nia fiar. Maibé ikusmai, Pedro rasik hakerek ba ema kristaun sira hodi esplika katak iha dalan ida deʼit atu halo tuir Kristu, neʼe mak ita tenke laʼo hamutuk ho nia hodi banati-tuir ninia ezemplu, maski ema seluk halo buat saida deʼit atu kontra ita.—Lee 1 Pedro 2:21.

14. Pedro iha neʼebé no halo saida kuandu ema tesi-lia ba Jesus?

¹⁴ Pedro tuir Jesus husi dook toʼo uma boot ida nia portaun iha Jeruzalein. Uma boot neʼe mak Caifás nian. Caifás mak ema riku no iha kbiit boot no uluk serbí nuʼudar amlulik boot. Baibain, uma boot hanesan neʼe iha pátiu,  ka área neʼebé luan no iha portaun iha oin. Pedro hakbesik portaun, maibé ema la husik nia tama. João tama tiha ona, no nia husu ema neʼebé hein portaun atu husik Pedro tama. Maibé depois neʼe, karik Pedro no João fahe malu fali, no Pedro la koko atu tama uma laran atu hakbesik ba nia Naʼi Jesus hodi apoia nia. Pedro hela nafatin iha pátiu hamutuk ho atan balu neʼebé haneruk besik ahi. Pedro no atan sira-neʼe haree testemuña falsu sira tuituir malu tama-sai hodi fó sasin falsu hasoru Jesus, iha prosesu tesi-lia nian neʼebé halaʼo daudaun iha uma laran.—Marcos 14:54-57; João 18:15, 16, 18.

15, 16. Jesus fó-hatene nanis katak Pedro sei nega nia ba dala tolu, esplika toʼok oinsá mak Jesus nia liafuan neʼe sai loos.

¹⁵ Husi naroman ahi nian, feto ida neʼebé husik Pedro tama iha portaun, bele haree Pedro ho momoos. Nia koñese Pedro no duun Pedro hodi dehan: “Ó mós hamutuk ho Jesus, ema Galileia neʼe!” Pedro hakfodak, no dehan katak nia la koñese Jesus no mós katak nia la hatene feto neʼe koʼalia kona-ba saida. Pedro bá hamriik besik portaun hodi ema la haree nia, maibé feto ida seluk haree nia, no dehan: “Mane neʼe uluk hamutuk ho Jesus husi Nazaré.” Pedro jura: “Haʼu la hatene mane neʼe!” (Mateus 26:69-72; Marcos 14:66-68) Karik iha tempu neʼebá Pedro rona manu kokoreek, maibé tanba nia hanoin la metin, karik nia la hanoin kona-ba buat neʼebé Jesus fó-hatene nanis iha oras balu liubá.

¹⁶ Pedro koko nafatin atu ema la haree nia. Maibé ema balu iha pátiu laran hakbesik nia. Sira ida mak família husi Malko, ema neʼebé Pedro hakanek iha jardín Getsémani. Nia husu ba Pedro: “Haʼu haree ó hamutuk ho nia iha jardín, loos ka lae?” Pedro lakohi duni atu sira hatene katak nia hamutuk ho Jesus. Nuneʼe, nia jura dala ida tan, karik nia hatete katak malisan ruma sei kona nia se nia bosok. Nia foin koʼalia nuneʼe, nia rona manu kokoreek dala ida  tan. Ida-neʼe mak dala segundu neʼebé Pedro rona manu kokoreek iha kalan neʼe.—João 18:26, 27; Marcos 14:71, 72.

17, 18. (a) Pedro halo saida kuandu nia hatene katak nia la laran-metin duni ba ninia Naʼi? (b) Karik Pedro hanoin saida?

¹⁷ Jesus foin sai ba varanda, no husi varanda nia bele haree pátiu. Hanesan temi ona iha parágrafu primeiru, iha tempu neʼe mak Pedro no Jesus hateke ba malu. Pedro hatene kedas katak nia la laran-metin duni ba ninia Naʼi! Pedro sente triste tebes, nia sente hanesan uma boot neʼe hanehan nia. Nia halai husi fatin neʼe no nia bá toʼo dalan sira iha sidade, fulan-tomak neʼebé monu daudaun fó naroman ba ninia dalan. Nia haree dalan la moos tanba ninia matan nakonu ho matan-been, tuirmai nia para no tanis makaʼas.—Marcos 14:72; Lucas 22:61, 62.

¹⁸ Kuandu ema hatene katak sira halo sala boot hanesan neʼe, sira bele hanoin katak Maromak sei nunka fó perdua fali ba sira. Karik Pedro mós hanoin hanesan neʼe. Maibé, hanoin hanesan neʼe loos ka lae?

19. Pedro sente oinsá kona-ba ninia sala? Maski nuneʼe, oinsá mak ita hatene katak nia la rende an?

¹⁹ Iha loron tuirmai, karik Pedro sai triste liután kuandu nia haree buat neʼebé akontese ba Jesus. Karik Pedro hirus tebes ba ninia an kuandu nia hatene oinsá Jesus tahan terus ba oras barak no ikusmai mate iha lokraik! Ita bele fiar katak Pedro triste loos kuandu nia hanoin fali oinsá ninia hahalok aumenta liután ninia Naʼi nia terus iha loron ikus iha Ninia moris nuʼudar ema. Maski Pedro sente triste hanesan neʼe, maibé nia la rende an hodi mout iha triste laran. Ita hatene neʼe tanba lakleur deʼit Bíblia fó-hatene mai ita katak Pedro halibur malu fali ho dixípulu sira seluk. (Lucas 24:33) Ita bele fiar katak apóstolu sira hotu triste no hakribi buat neʼebé sira halo iha kalan neʼe, no sira halibur hamutuk hodi fó laran-manas no fó kmaan ba malu.

20. Saida mak Pedro halo maski nia laran-tun tebes? Saida mak ita aprende husi Pedro nia ezemplu neʼe?

²⁰ Pedro hatudu matenek duni hodi halibur an ho ninia maluk dixípulu sira. Se Maromak nia atan ida monu  ba sala boot, buat neʼebé importante liu mak laʼós sala neʼebé nia halo ona, maibé ninia hakaʼas-an atu hamriik fali no hatudu katak nia loloos hakribi ninia sala neʼe. (Lee Provérbios [Amsal] 24:16. *) Pedro hatudu katak nia iha fiar neʼebé metin loos hodi halibur malu fali ho dixípulu sira seluk, maski nia laran-tun tebes. Baibain, ema neʼebé halo sala boot hakarak mesamesak deʼit, maibé halo ida-neʼe mak perigu duni. (Provérbios [Amsal] 18:1) Dalan matenek mak hamutuk nafatin ho maluk fiar-naʼin sira hodi hametin ita-nia hakarak atu serbí Maromak.—Ebreu 10:24, 25.

21. Tanba Pedro halibur an hamutuk ho ninia maluk fiar-naʼin sira, nia rona liafuan saida?

²¹ Tanba Pedro hamutuk ho fiar-naʼin sira seluk, nia rona liafuan neʼebé halo sira hotu hakfodak tebes. Jesus nia rate neʼebé taka metin ho fatuk boot, sai mamuk. Pedro no João halai ba Jesus nia rate. Karik tanba João idade kiʼik liu, nia halai lalais no toʼo uluk. Tanba rate nia odamatan nakloke, João taʼuk atu tama, maibé Pedro lae. Maski Pedro iis boot hela, nia tama kedas. Rate neʼe mamuk duni!—João 20:3-9.

22. Oinsá mak Pedro la sente laran-triste no laran-rua tan?

²² Pedro fiar katak Jesus moris hiʼas ka lae? Lae. Maski feto fiar-naʼin balu fó-hatene katak anju sira mosu no dehan katak Jesus moris hiʼas, maibé Pedro seidauk fiar. (Lucas 23:55–24:11) Maibé antes loron neʼe ramata, Pedro la sente laran-triste no laran-rua tan. Nia fiar katak Jesus moris fali ona nuʼudar anju forte! Tanbasá? Tanba Jesus hatudu an ba ninia apóstolu sira. Maibé, antes Jesus mosu ba sira, nia mosu uluk ba ema ida. Iha loron neʼe, apóstolu sira hatete: “Loloos, Naʼi moris hiʼas ona, no nia mosu ba Simão!” (Lucas 24:34) No mós, apóstolu Paulo hakerek katak iha loron neʼebé Jesus moris hiʼas, Jesus “mosu ba Cefas, no tuirmai ba sira naʼin sanulu-resin-rua”. (1 Korinto 15:5) Naran Cefas no naran Simão mak Pedro nia naran seluk. Sin, iha loron neʼe, Jesus hatudu an ba Pedro, karik kuandu Pedro mesak.

23. Se ema kristaun ida monu ba sala boot, tanbasá mak importante ba nia atu hanoin-hetan Pedro nia istória neʼe?

 ²³ Bíblia la fó-hatene kona-ba saida mak akontese kuandu Jesus no Pedro hasoru malu iha loron neʼe. Ita bele fiar katak Pedro sente kontente tebes atu haree ninia Naʼi moris fali, no tanba nia iha oportunidade atu hatudu katak nia arrepende ninia sala. Iha tempu neʼebá, Pedro hakarak duni Jesus atu fó perdua ba nia. Ita la iha dúvida katak Jesus ho laran-luak fó perdua ba Pedro. Ohin loron, importante ba ema kristaun neʼebé monu ba sala boot atu hanoin-hetan Pedro nia istória neʼe. Ita labele hanoin katak ita-nia sala mak boot tebetebes toʼo Maromak nunka fó perdua. Jesus haleno iha dalan perfeitu ninia Aman, neʼebé “fó perdua neʼebé boot tebes”.—Isaías (Yesaya) 55:7.

24, 25. (a) Esplika toʼok kona-ba kalan neʼebé Pedro bá kaer ikan. (b) Iha dadeer tuirmai kuandu Jesus halo milagre, Pedro halo saida?

²⁴ Jesus haruka ninia apóstolu sira atu bá Galileia hodi sira bele hasoru malu fali ho nia iha neʼebá. Kuandu sira toʼo tiha iha Galileia, Pedro deside atu bá kaer ikan. Sira balu akompaña nia. Antes Pedro tuir Jesus, Pedro halo serbisu nuʼudar peskadór iha fatin neʼe. Nia kontente atu rona fali ró nia lian no laloran neʼebé kona ró nia sorin-sorin. Nia hatún rede no rasta fali hodi hasaʼe ba ró laran. Karik Pedro sente kmaan hodi halo serbisu neʼebé uluk nia toman atu halo. Maibé iha kalan neʼe, sira la kaer ikan ida.—Mateus 26:32; João 21:1-3.

²⁵ Kuandu loro-matan hahú saʼe, sira haree ema ida iha tasi-ibun, no mane neʼe haruka sira atu soe sira-nia rede ba ró nia sorin seluk. Sira halo tuir no hetan ikan 153 kedas! Pedro hatene ema neʼe sé. Nia haksoit kedas husi ró no nani ba tasi-ibun. Depois, Jesus fó ikan neʼebé nia tunu tiha ona ba ninia belun sira-neʼe atu han. Tuirmai, Jesus komesa koʼalia ba Pedro.—João 21:4-14.

26, 27. (a) Jesus fó oportunidade saida ba Pedro ba dala tolu? (b) Oinsá mak Jesus hatudu katak nia fó perdua duni ba Pedro?

²⁶ Jesus husu Pedro: “Ó hadomi haʼu liu fali sira-neʼe ka lae?” Karik Jesus hatudu ba ikan sira neʼebé Pedro foin  hetan. Saida mak Pedro hadomi liu, moris nuʼudar peskadór ka Jesus? Uluk, Pedro nega ninia Naʼi ba dala tolu, agora Jesus fó oportunidade ba nia atu dehan sai ninia domin ba Jesus ba dala tolu iha ninia maluk sira-nia oin. Kuandu Pedro halo nuneʼe, Jesus fó-hatene oinsá mak Pedro bele hatudu domin neʼe. Neʼe mak hodi tau uluk serbisu ba Maromak duké buat seluk, no hodi tau matan ba Kristu nia bibi sira, katak Kristu nia dixípulu sira.—Lucas 22:32; João 21:15-17.

 ²⁷ Nuneʼe, Jesus hatudu katak nia no ninia Aman hadomi nafatin Pedro no hakarak fó knaar ba nia. Pedro sei halaʼo knaar importante iha kongregasaun neʼebé Kristu rasik mak dirije. Buat sira-neʼe hatudu duni katak Jesus ho laran fó perdua ba Pedro! Ita bele fiar katak ida-neʼe book duni Pedro nia laran, no nia mós aprende lisaun importante atu fó perdua ba ema seluk.

28. Oinsá mak Pedro halo tuir naran neʼebé Jesus fó ba nia?

²⁸ Ba tinan barak tuirmai, Pedro halaʼo ninia knaar ho didiʼak. Nia hametin ninia maluk fiar-naʼin sira, hanesan Jesus haruka nia atu halo iha kalan antes nia mate. Ho laran-diʼak no pasiénsia Pedro hakaʼas an atu tau matan Kristu nia dixípulu sira. Uluk, Jesus troka Simão nia naran sai fali Pedro. Naran Pedro iha arti katak “Fatuk”. Sin, Pedro halo tuir duni naran neʼe tanba ninia fiar metin hanesan fatuk, no nia sai ezemplu diʼak ba ema hotu iha kongregasaun laran. Ita hatene kona-ba neʼe liuhusi karta rua neʼebé Pedro hakerek. Karta sira-neʼe sai parte importante iha Bíblia laran. No mós, karta sira-neʼe hatudu katak Pedro nunka haluha lisaun importante neʼebé Jesus hanorin ba nia, neʼe mak kona-ba fó perdua ba ema seluk.—Lee 1 Pedro 3:8, 9; 4:8.

29. Oinsá mak ita bele banati-tuir Pedro nia fiar no Jesus nia laran-sadiʼa?

²⁹ Ita mós hakarak aprende lisaun importante neʼe. Loron-loron, ita husu Maromak atu fó perdua ba ita-nia sala ka lae? Ita fiar katak Maromak loloos fó perdua ba ita-nia sala hodi ita sai moos iha ninia oin ka lae? Ita hakaʼas an atu fó perdua ba ema seluk ka lae? Se ita halo hanesan neʼe, ita banati-tuir Pedro nia fiar no ita-nia Naʼi Jesus nia laran-sadiʼa.