Ita bele hetan susesu

AGORA Ita presiza “sai aten-brani” no halo buat ruma. (1 Krónikas 28:10) Saida tan mak Ita presiza halo atu bele hetan susesu?

Hili loron atu para fuma. U.S. Department of Health and Human Services rekomenda katak bainhira Ita deside ona atu para fuma, durante semana rua, diʼak atu deside metin loron ida-neʼebé mak Ita sei para fuma. Ida-neʼe sei ajuda Ita atu nafatin iha motivasaun atu para fuma. Marka data neʼe iha Ita-nia kalendáriu, fó-hatene Ita-nia belun sira, no kaer metin ba data neʼe maski Ita-nia situasaun troka.

Lori nota ho informasaun neʼebé bele ajuda Ita para fuma. Karik nota neʼe iha informasaun sira hanesan tuirmai neʼe no mós informasaun seluk neʼebé hametin Ita atu hakarak para fuma:

● Ita-nia razaun atu para fuma

● Ema seluk nia númeru telefone, atu nuneʼe se Ita sente atu rende an, Ita bele kontaktu sira

● Liafuan neʼebé bele ajuda Ita kumpre Ita-nia planu. Karik neʼe bele inklui eskritura sira, hanesan Galásia 5:22, 23.

Sempre lori nota neʼebé iha informasaun kona-ba para fuma, no lee ida-neʼe ba dala balu loroloron. Depois para fuma, Ita mós bele kontinua lee fali informasaun neʼe se hakarak atu fuma mosu fali.

Hapara toman balu neʼebé liga ho fuma. Antes toʼo data neʼebé Ita deside atu para fuma, diʼak atu hapara toman balu neʼebé liga ho fuma. Porezemplu, se Ita iha toman atu fuma kedas bainhira hadeer, diʼak atu hein oras ida ka liu mak foin fuma. Se Ita fuma durante han ka depois han, diʼak hapara toman neʼe. Hasees an husi fatin seluk neʼebé ema seluk fuma. No bainhira Ita mesak, treinu ho lian makaʼas hodi dehan: “Lae, obrigadu. Haʼu para ona fuma.” Buat sira-neʼe sei prepara Ita ba data neʼebé Ita deside atu para fuma. Neʼe fó-hanoin Ita katak lakleur tan Ita laʼós ema neʼebé fuma.

Sai prontu atu para fuma. Bainhira data neʼebé Ita deside besik ona, prepara buat oioin neʼebé bele troka sigarru, hanesan: senoura, xumingál, fore-rai, no buat seluk tan. Fó-hanoin Ita-nia família no belun sira kona-ba data neʼebé Ita planu atu para fuma no oinsá sira bele apoia Ita. Antes data neʼe, soe tiha sinzeiru, iskeiru, no buat seluk neʼebé hanesan. No keta husik sigarru iha Ita-nia uma, karreta, bolsu, ka iha serbisu-fatin. Dala barak fasil liu atu foti sigarru husi Ita-nia gaveta duké husu sigarru husi belun ka sosa. No mós kontinua halo orasaun atu husu Maromak nia ajuda, halo orasaun barak liután no ho laran depois Ita fuma ba dala ikus.​—Lucas 11:13.

Ema rihun ba rihun “hakotu” ona sira-nia relasaun ho sira-nia belun uluk, neʼebé laran-aat, neʼe mak sigarru. Ita mós bele para fuma. Se Ita halo nuneʼe Ita sei iha saúde diʼak no sente kontente liu.

[Dezeñu]

Sempre lori nota neʼebé iha informasaun kona-ba para fuma, no lee ida-neʼe ba dala balu loroloron