Prepara ba susar neʼebé bele hanetik ita atu para fuma

“Haʼu deside atu para fuma atu bele proteje haʼu-nia bebé nia saúde. Entaun haʼu tau sinál ‘Labele fuma’ iha ami-nia uma. Depois oras ida liutiha, haʼu komesa kaan fali atu fuma no neʼe sai makaʼas loos hanesan tsunami, no haʼu komesa fuma fali sigarru ida.”​—Yoshimitsu, husi rai-Japaun.

HANESAN Yoshimitsu nia esperiénsia, dala barak susar atu para fuma. Liután neʼe, matenek-naʼin sira halo peskiza no fó sai katak porsentu 90 husi ema neʼebé sidi, ikusmai monu fali ba sira-nia toman atu fuma. Tan neʼe, se Ita koko atu para fuma, Ita sei hetan susesu se Ita prepara nanis ba situasaun oioin neʼebé baibain bele halo susar ba Ita atu para fuma. Saida mak situasaun sira-neʼe?

Kaan atu fuma fali: Baibain hakarak atu fuma sai makaʼas loron tolu liutiha husi tempu neʼebé Ita para fuma, no hakarak neʼe sei sai menus depois semana rua. Ema ida neʼebé uluk fumadór hatete katak durante tempu neʼe, “hakarak atu fuma bele tun-saʼe hanesan tasi nia laloran, hakarak neʼe nunka hanesan ba nafatin”. Maski tinan barak liutiha, maibé derrepente hakarak atu fuma bele mosu fali. Se hakarak neʼe mosu, keta rende an. Hein toʼo minutu lima ka liu no karik hakarak neʼe sei lakon.

Sintoma neʼebé mosu tanba para fuma: Foufoun kuandu ita para fuma, karik ita sempre sente matan-dukur ka susar atu fokus, no dala barak ita-nia isin saʼe. Karik ita mós bele sente isin-lolon moras, kulit katar, kosar no meʼar, no mós mudansa ba ita-nia emosaun, hanesan la iha pasiénsia, hirus lalais, no karik depresaun. Maibé, baibain sintoma sira-neʼe lakon depois semana haat toʼo semana neen.

Durante tempu susar neʼe, iha buat balu neʼebé Ita bele halo. Porezemplu:

● Hakaʼas an atu toba barak.

● Hemu bee barak ka hemu jus. Han hahán neʼebé saudavel.

● Halo ezersísiu beibeik.

● Dada iis naruk, no imajina kona-ba anin fresku neʼebé tama Ita-nia pulmaun.

Buat neʼebé hamosu hakarak atu fuma: Karik atividade ka sentimentu ruma bele book Ita atu hakarak fuma fali. Porezemplu, karik uluk Ita toman atu fuma bainhira hemu buat ruma. Se nuneʼe, bainhira Ita para fuma, Ita labele uza tempu kleur atu hemu. Liutiha tempu balu, karik Ita-nia hakarak atu fuma bainhira hemu sei la iha tan.

Maski Ita-nia isin moos ona husi nikotina, maibé karik atividade ka buat ruma bele hamosu fali hakarak atu fuma. Torben neʼebé temi ohin hatete: “Tinan 19 depois haʼu para fuma, dala ruma haʼu iha hakarak atu fuma durante tempu hemu kafé.” Maski nuneʼe, nuʼudar tempu liu daudaun, karik Ita sei la sente tan hakarak atu fuma bainhira halo atividade sira hanesan neʼe.

Maibé kona-ba hemu tua, situasaun la hanesan. Tuir loloos, bainhira Ita koko atu para fuma, Ita mós karik presiza para atu hemu tua no hasees an husi fatin neʼebé ema oferese tua, tanba baibain ema barak liu komesa fuma fali bainhira hemu tua. Tanbasá?

● Maski tua uitoan deʼit, maibé neʼe bele halo ema gosta fali nikotina.

● Bainhira ema ransu hamutuk, baibain sira hemu tua no fuma.

● Tua bele halakon Ita-nia kbiit atu tetu didiʼak no halo susar ba Ita atu kontrola an. Tan neʼe mak Bíblia dehan: ‘Tua-uvas mak halakon ema nia hakarak atu halo buat neʼebé loos.’​—Oseias 4:11.

Ita-nia ransu: Hili didiʼak Ita-nia kolega. Porezemplu, hakaʼas an atu la ransu ho ema neʼebé fuma ka ema neʼebé konvida Ita atu fuma. No mós hasees an husi ema neʼebé la ajuda Ita atu para fuma, karik sira goza Ita tanba Ita planu atu para fuma.

Emosaun: Peskiza ida dehan katak porsentu 60 husi ema neʼebé fuma fali, dehan katak antes sira halo nuneʼe sira sente estrese no hirus. Se sentimentu ruma book Ita atu hakarak fuma fali, hakaʼas an atu dada Ita-nia atensaun ba buat seluk karik Ita bele halo ida-neʼe liuhusi hemu bee, han xumingál, ka laʼo halimar. Hakaʼas an atu halo nakonu Ita-nia neon ho hanoin neʼebé pozitivu, karik liuhusi halo orasaun ba Maromak ka lee eskritura balu.​—Salmo 19:14.

Labele buka razaun atu fuma

● Haʼu dada sigarru dala ida deʼit.

Realidade: Dada sigarru dala ida deʼit, bele hafanu fali nervu 50 iha Ita-nia kakutak durante oras 3. Rezultadu mak neʼe halo Ita monu fali ba Ita-nia toman atu fuma.

● Fuma ajuda haʼu atu manán hasoru estrese.

Realidade: Peskiza hatudu katak nikotina aumenta ema nia estrese. Baibain ema sente katak sira halakon sira-nia estrese, maibé tuir loloos karik sira sente kmaan tanba sira-nia sintoma husi para fuma lakon ba tempu balu.

● Tarde ona ba haʼu atu para fuma.

Realidade: Se Ita iha hanoin negativu kona-ba para fuma, neʼe bele halo susar duni ba Ita atu para fuma. Bíblia hatete: “Se ó sai laran-triste iha tempu susar, ó-nia forsa sei menus.” (Provérbios 24:10) Tan neʼe hakaʼas an atu la hanoin katak Ita labele para fuma. Ema hotu neʼebé hakarak para fuma no halo tuir sujestaun diʼak oioin, hanesan sujestaun iha informasaun neʼe, bele duni hetan susesu.

● Haʼu labele tahan sintoma neʼebé mosu tanba para fuma.

Realidade: Maski sintoma sira-neʼe halo Ita la kontente, maibé neʼe sei lakon depois semana balu. Tan neʼe, tau fokus nafatin ba ita-nia planu. Se liutiha fulan balu ka tinan ida, mosu fali hakarak atu fuma, hakarak neʼe mós sei lakon lalais deʼit se Ita la koko atu halakan fali sigarru.

● Haʼu iha moras mentál.

Realidade: Se Ita hetan tratamentu kona-ba moras mentál, hanesan depresaun ka esquizofrenia, husu Ita-nia doutór atu ajuda Ita para fuma. Karik Ita-nia doutór sei kontente atu ajuda Ita, karik liuhusi halo mudansa ba Ita-nia tratamentu ka ai-moruk neʼebé Ita hemu daudaun.

● Se haʼu fuma fali, haʼu sente hanesan haʼu la hetan susesu.

Realidade: Se Ita monu fali ba Ita-nia toman atu fuma, neʼe la dehan katak Ita la iha ona esperansa. Ema barak mós monu fali ba sira-nia toman atu fuma. Buat neʼebé Ita bele halo mak hamriik fali no kontinua luta. Monu fali ba Ita-nia toman atu fuma, la dehan katak Ita la hetan susesu. Maibé Ita sei la hetan susesu se Ita la hamriik fali atu luta. Tan neʼe, kontinua hakaʼas an. Ikusmai Ita sei hetan susesu.

Hanoin kona-ba esperiénsia husi Romualdo neʼebé fuma sigarru durante tinan 26 maibé para ona fuma durante tinan 30. Nia hakerek: “Haʼu labele sura dala hira mak haʼu monu fali ba toman atu fuma. Tempu ida-idak haʼu sente triste tebes, no haʼu sente hanesan haʼu falla ona. Maibé, bainhira haʼu halo desizaun metin atu iha relasaun diʼak ho Maromak Jeová no husu beibeik ninia ajuda liuhusi orasaun, ikusmai haʼu konsege para fuma ba nafatin.”

Iha informasaun ikus husi série neʼe, ita sei aprende tan sujestaun balu neʼebé bele ajuda ita atu para fuma no bele moris kontente.

[Kaixa/​Dezeñu]

TABAKU HOTU MAK PERIGOZU

Ema uza tabaku iha dalan oioin. Tabaku balu ema faʼan iha loja hahán nian no mós loja neʼebé faʼan ai-moruk tradisionál. Organização Mundial da Saúde dehan katak: “Tabaku hotu mak perigozu.” Ema barak mate tanba hetan moras neʼebé liga ho uza tabaku, hanesan kankru no moras-fuan. Inan neʼebé fuma tabaku bele lori perigu ba ninia bebé iha ninia knotak. Iha dalan saida deʼit mak ema uza tabaku?

Bidi: Sigarru kiʼikoan neʼebé ema lulun ho liman, no baibain ema uza ida-neʼe iha rai sira iha Ázia. Bidi hasai alkatraun, nikotina, no monóksidu-karbonu barak liu fali sigarru baibain.

Xarutu: Xarutu halo husi tabaku-rahun neʼebé ema falun metin ho tabaku tahan ka surat-tahan neʼebé halo husi tabaku. Tabaku neʼebé ema uza atu halo xarutu mak iha alkalinu se kompara ho sigarru baibain, neʼe halo fasil ba ita-nia isin atu xupa nikotina liuhusi ibun maski xarutu seidauk lakan.

Sigarru kraviñu ka kretek: Porsentu 60 husi sigarru neʼe mak tabaku no porsentu 40 mak kraviñu. Sigarru neʼe hasai alkatraun, nikotina, no monóksidu-karbonu barak liu fali sigarru baibain.

Kaixumba: Uza kaixumba atu fuma tabaku mós perigu hanesan ho fuma sigarru. Fuma kaixumba no fuma sigarru hamosu moras kankru no moras seluk tan.

Uza tabaku iha dalan seluk neʼebé laʼós fuma: Neʼe inklui nata tabaku, horut tabaku no sonke tabaku. Ema iha Ázia sudeste iha toman atu sonke tabaku. Nikotina tama ba ema nia raan liuhusi sira-nia ibun. Uza tabaku iha dalan neʼe mós perigozu hanesan dalan sira seluk.

Fuma narguilés, shishas, hookahs: Ekipamentu neʼe uza bee atu xupa tabaku nia suar antes ema dada ida-neʼe tama ba sira-nia ibun. Maski nuneʼe, prosesu neʼe la hamenus venenu neʼebé tama ba ema nia pulmaun, inklui buat neʼebé hamosu kankru.

[Kaixa/​Dezeñu]

AJUDA EMA SELUK ATU PARA FUMA

● Iha hanoin pozitivu. Gaba mak diʼak liu fali koʼalia barabarak no fó konsellu. Liafuan hanesan, “haʼu sente ó sei hetan susesu se ó koko fali” mak diʼak liu duké dehan “ó falla tan”.

● Prontu atu fó perdua. Hakaʼas an atu la tau fokus ema neʼebé hirus ka estrese tanba sira koko atu para fuma. Hatoʼo liafuan ho laran-diʼak hanesan: “Haʼu hatene neʼe susar, maibé haʼu orgullu ho ó-nia hakaʼas an.” Nunka dehan: “Ó-nia hahalok diʼak liu bainhira ó fuma!”

● Sai belun neʼebé diʼak. Bíblia hatete: “Belun neʼebé loos hatudu domin iha tempu hotu no nia sai hanesan maun ka alin ida iha tempu susar.” (Provérbios 17:17) Sin, hakaʼas an atu hatudu pasiénsia no domin “iha tempu hotu” ba ema neʼebé koko atu para fuma.