“Samea boot, samea uluk nian, neʼebé ema hanaran Diabu eh Satanás, . . . bosok raiklaran tomak.”—Apokalipse 12:9.

BUAT NEʼEBÉ EMA HANOIN

Ema balu fiar katak Satanás laʼós tebes, maibé sira fiar katak nia mak buat neʼebé aat iha ema ida-idak nia laran.

BUAT NEʼEBÉ BÍBLIA HANORIN

Satanás iha duni. Nia mak anju ida neʼebé kontra hasoru Maromak. Bíblia bolu Satanás nuʼudar “liurai mundu neʼe nian”. (Joao 12:31) Nia halo tuir ninia hakarak hodi uza “sinál” bosok sira no “buat aat hotu neʼebé bele lohi”.—2 Tesalonika 2:9, 10.

Iha Bíblia, ita bele lee katak Satanás no Maromak koʼalia ba malu. Maibé se Satanás laʼós tebes no se nia reprezenta deʼit buat aat iha ema nia laran, entaun Maromak koʼalia ba sé? Klaru katak nia la koʼalia ba ninia an tanba Maromak la iha buat aat ida iha ninia laran, loos ka lae? (Deuteronômio [Ulangan] 32:4; Jó [Ayub] 2:1-6) Neʼe hatudu ho klaru katak Satanás laʼós buat aat iha ema nia laran, maibé nia mak anju neʼebé tebes duni.

TANBASÁ MAK IDA-NEʼE IMPORTANTE BA ITA?

Satanás hakarak ita atu fiar katak nia la iha, hanesan deʼit ho naʼok-teen ida neʼebé subar ninia an hodi nia bele naʼok nafatin. Atu proteje ita-nia an husi Satanás, ulukliu ita presiza rekoñese katak nia iha duni.

‘Susar ba rai basá Diabu tun tiha ba imi.’—Apokalipse 12:12.

 BUAT NEʼEBÉ EMA HANOIN

Ema barak hanoin katak Satanás hela iha infernu iha rai nia okos. Ema seluk hanoin katak nia iha ema aat sira-nia laran.

BUAT NEʼEBÉ BÍBLIA HANORIN

Satanás mak kriatura espíritu ida, tan neʼe ita la bele haree nia. Uluk, Satanás iha liberdade atu laʼo bá-mai iha lalehan, fatin neʼebé Maromak no anju sira hela. (Jó 1:6) Maibé Satanás hasai tiha ona husi lalehan, no agora, nia ho anju aat sira seluk hela iha rai.—Apokalipse 12:12.

Maibé ida-neʼe katak agora Satanás hela iha fatin ida deʼit iha rai ka lae? Porezemplu, karik ita lee tiha ona iha Bíblia katak sidade antigu naran Pérgamo mak “fatin neʼebé Satanás hela”. (Apokalipse 2:13) Tuir loloos, neʼe katak ema barak iha fatin neʼe halo tuir Satanás nia hahalok. Satanás la hela iha fatin ida deʼit iha rai, maibé Bíblia hatete katak “reinu hotu-hotu raiklaran nian” mak Satanás nian.—Lucas 4:5, 6.

“Mundu tomak sei iha aat-naʼin nia ukun.”—1 Joao 5:19.

BUAT NEʼEBÉ BÍBLIA HANORIN

Ema barak husik Satanás nia hahalok aat book sira, tan neʼe mak ita bele dehan katak Satanás kontrola sira. (2 Korinto 11:14) Ida-neʼe ajuda ita atu komprende tanbasá mak ema la bele hadiʼa problema sira iha mundu.

Bíblia mós konta kona-ba situasaun balu neʼebé Satanás ka ninia anju aat sira tama ema nia laran no halo aat ba sira.—Mateus 12:22; 17:15-18; Marcos 5:2-5.

SAIDA MAK ITA BELE HALO

Ita la presiza taʼuk kona-ba Satanás nia kbiit. Atu Satanás la bele book ita, ita presiza hatene oinsá mak nia lohi ema hodi ita bele “hatene loloos buat neʼebé nia hakarak”. (2 Korinto 2:11) Hodi lee Bíblia, ita bele aprende kona-ba dalan sira neʼebé Satanás lohi ema, no ita bele sees husi ninia lasu sira.

Ita presiza halakon buat naran deʼit neʼebé liga ho Satanás no anju aat sira. (Apostolu 19:19) Ida-neʼe inklui sasán, livru, filme, múzika no games iha komputadór kona-ba matan-dook nia atividade.

Bíblia hatete: “Halo funu hasoru Diabu no nia sei halai husi imi.” (Tiago 4:7) Hodi halo tuir Bíblia nia matadalan, ita bele proteje ita-nia an husi Satanás nia lasu sira.—Efeso 6:11-18.