“Imi husik Maromak nia mandamentu no kaer metin fali ba ema nia lisan.”—Marcos 7:8.

SAIDA MAK BÍBLIA HANORIN?

Nuʼudar ema, ita hotu moris mai ho hakarak atu adora Maromak no hakbesik ba Maromak. (Mateus 5:3) Tan neʼe mak ema harii relijiaun barak tebes tuir sira-nia fiar no hanoin oioin, laʼós tuir Maromak nia hakarak.

Porezemplu, kona-ba relijiaun ida iha apóstolu sira-nia tempu, Bíblia hatete: “Sira laran-manas ba Maromak; maibé laʼós tuir lia-loos kona-ba Maromak. Sira la hatene buat neʼebé loos tuir Maromak nia hakarak, maibé sira buka dalan atu sai ema loos tuir sira-nia hakarak rasik, tan neʼe sira la halo tuir buat neʼebé loos husi Maromak.” (Roma 10:2, 3) Nuneʼe mós ohin loron, relijiaun barak “hanorin ema nia ukun-fuan nuʼudar Maromak nian”.—Marcos 7:7.

“Mai ita hanoin malu hodi ajuda malu atu hatudu domin no hahalok diʼak, no . . . keta haluha atu halibur an hamutuk.”—Ebreu 10:24, 25.

SAIDA MAK BÍBLIA HANORIN?

Eskritura iha Ebreu 10:25 hatete: “Keta haluha atu halibur an hamutuk.” Liafuan neʼe katak Maromak hakarak ema atu halibur hamutuk hodi halaʼo adorasaun ba nia. Maibé neʼe katak ema ida-idak bele halaʼo adorasaun tuir sira-nia hanoin no fiar oioin ka lae? Lae. Tuir Bíblia, Maromak simu ema neʼebé adora nia ho ‘laran ida deʼit iha sira-nia koʼalia’ no ‘sai ida deʼit iha sira-nia neon no iha hanoin neʼebé hanesan’. (1 Korinto 1:10) Sira tenke sai grupu ida neʼebé organiza ona no “hadomi maluk fiar-naʼin hotu” iha mundu tomak. (1 Pedro 2:17; 1 Korinto 11:16) Nuneʼe, atu monu loos ba Maromak nia laran, tenkesér halaʼo adorasaun neʼebé organiza didiʼak ona no laran ida deʼit ho maluk fiar-naʼin sira.

“Ho ida-neʼe mak ema hotu sei hatene katak imi haʼu-nia dixípulu sira, se imi iha domin ba malu.”—João 13:35.

SAIDA MAK BÍBLIA HANORIN?

Kona-ba ema neʼebé halaʼo relijiaun loos, Bíblia hatete: “Liuhusi sira-nia hahalok imi bele hatene sira. Ema nunka kuʼu uvas husi ai-tarak ka ai-figeira fuan husi duʼut-aat, loos ka lae?” (Mateus 7:16) La susar ba ema hotu atu hatene uvas-hun la hanesan duni ho ai-tarak. Nuneʼe mós ho relijiaun. La susar ba ema hotu atu hatene relijiaun neʼebé loos la hanesan duni ho relijiaun neʼebé falsu. Entaun, ema neʼebé halaʼo relijiaun loos hatudu hahalok saida deʼit?

Relijiaun neʼebé loos tenke:

• Hanorin lia-loos husi Maromak nia Liafuan Bíblia deʼit. (João 4:24; 17:17) Sira la hanorin doutrina tuir ema nia hanoin.

• Hanorin ema atu hatene didiʼak Maromak, inklui mós Ninia naran, Jeová.—João 17:3, 6.

• Haklaken katak Maromak nia Reinu ka Ukun deʼit mak bele rezolve problema hotu iha mundu neʼe, laʼós ema nia governu sira.—Mateus 10:7; 24:14.

• Hanorin ema atu hadomi malu, hatudu respeitu ba ema hotu husi rai ka rasa seluk, uza tempu no forsa atu ajuda ema seluk, no la hola parte iha funu.—João 13:35; Miquéias (Mikha) 4:1-4.

• Moris tuir buat neʼebé sira hanorin ho laran, laʼós ho ibun-tutun deʼit hodi hatudu an no tuir deʼit atividade neʼebé ema seluk halo.—Roma 2:21; 1 João 3:18.

Ami Testemuña ba Jeová hakaʼas an atu hahiʼi Maromak liuhusi ami-nia liafuan no hahalok. Ami konvida Ita-Boot atu asiste ami-nia reuniaun sira hodi koñese didiʼak ami.