Organizasaun Saúde Mundiál nian fó sai katak, ohin loron ema naʼin-14.000.000 liu mak kona moras kankru tinan-tinan, maibé toʼo tinan 2035, númeru neʼe sei aumenta toʼo naʼin-24.000.000 katak porsentu 70 barak liu fali númeru ohin loron. Iha tinan 2035 oinmai, husi ema neʼebé kona kankru, porsentu 50 mak tanba sira-nia toman moris nian, hanesan hemu tua demais, isin bokur liu, fuma, kona radiasaun (laloran-ár neʼebé aat), ka tanba la halo ezersísiu.

Governu Bretaña hahú estudu atu buka-hatene se moras karau bulak nian (penyakit sapi gila) neʼebé kona ema ida bele daʼet fali ba ema seluk liuhusi transfuzaun raan ka lae. Deputadu ida naran Andrew Miller hatete: “Ami hanoin barak tanba moras aat neʼe neʼebé la bele kura sei nafatin ameasa saúde públiku. Ami rona katak moras neʼe karik bele daʼet ba ema barak liuhusi transfuzaun raan ka kuandu transfere ema ida nia orgaun (parte isin nian) ba ema seluk.”

Tuir peskiza ida neʼebé halaʼo ona durante tinan 11 ba ema Noruega besik naʼin-63.000, sira balu neʼebé iha moras depresaun iha perigu boot liu atu kona moras-fuan toʼo porsentu 40 liu fali sira neʼebé la iha depresaun. Organizasaun ida neʼebé estuda kona-ba moras-fuan (The European Society of Cardiology) fó sai katak moras depresaun bele halo ema estrese liután, no neʼe halo sira-nia fuan sai fraku. Liután neʼe, pasiente sira neʼebé kona moras depresaun dala barak lakohi halo tuir doutór nia konsellu.

Sientista sira estuda daudauk kona-ba moras oioin neʼebé kona ema tanba sigarru nia suar, liuliu suar neʼebé belit metin hela ba sasán oioin no ba rai-rahun sira iha apartamentu, otél no karreta laran. Sira mós haree katak kímika husi sigarru nia suar neʼebé belit metin hela iha sasán sira ba tempu kleur bele sai venenu aat liu neʼebé estraga ema nia saúde.