SARA * husi rai-Gana dehan: “Haʼu ho haʼu-nia katuas-oan sempre haksesuk malu kona-ba osan.” Sara ho nia laʼen Jakob harii umakain ba tinan 17 ona. Sara dehan: “Haʼu hirus haʼu-nia laʼen tanba haʼu deʼit mak halo buat barak iha uma-laran, no Jakob nunka koʼalia ba haʼu kona-ba osan neʼebé nia gasta. Se ami naʼin-rua hirus malu, ba semana barak ami la koʼalia ba malu.”

Ninia laʼen Jakob hatutan tan dehan: “Loos, dala ruma ami istori malu no koʼalia liafuan kroʼat ba malu. Neʼe tanba ami la komprende malu no lakohi koʼalia didiʼak ba malu. Dala ruma mós tan buat kiʼik deʼit ami hirus malu.”

Natan husi rai-Índia neʼebé foin kaben, konta katak loron ida bainhira ninia família sira tuur hamutuk hela, derrepente deʼit ninia banin-mane hakilar ninia banin-feto. Natan dehan: “Haʼu-nia banin-feto sente an kedas no sai husi uma. Haʼu husu ba haʼu-nia banin-mane tansá mak nia hakilar hanesan neʼe, nia hatán dehan haʼu mak halo nia moe. Tuirmai nia hakilar ami hotu.”

Karik Ita-Boot mós haree ona dala barak problema mosu iha uma-laran tanba ema koʼalia liafuan kroʼat ba malu no la kontrola an. Maski foufoun sira bele koʼalia didiʼak ba malu, maibé se derrepente deʼit liafuan kroʼat sai husi ibun, sira komesa istori malu ona. Loos duni, ita hotu mak ema sala-naʼin. Tan neʼe dala ruma, ema bele koʼalia sai liafuan neʼebé la kona ita-nia laran ka halo ita komprende sala. Maski nuneʼe, ita bele duni haburas dame no unidade iha uma-laran.

Saida mak ita bele halo se problema mosu iha uma-laran? Oinsá mak ita bele haburas fali dame no hakmatek iha uma-laran? Oinsá mak ema hotu iha uma-laran bele haree malu diʼak nafatin? Mai ita haree.