Nicolas no Céline hasoru susar neʼebé diferente. Sira simu knaar husi sukursál Fransa atu muda ba kongregasaun foun. Sira hatete: “Foufoun ami sente kontente tebes, maibé lakleur ami komesa saudades ami-nia belun sira. Ami seidauk sente besik ho irmaun-irmán sira iha kongregasaun foun.” a Bainhira hasoru situasaun hanesan neʼe, oinsá mak Ita bele sente kontente nafatin no apoia kongregasaun foun? Oinsá mak ema seluk bele ajuda? Oinsá mak Ita bele anima ema seluk no hetan anima husi kongregasaun foun?

PRINSÍPIU HAAT NEʼEBÉ BELE AJUDA ITA

1. Sadere ba Jeová. (Sal 37:5) Irmán Kazumi husi rai-Japaun, presiza muda husi kongregasaun neʼebé nia tuir ona ba tinan 20, no bá fali kongregasaun foun tanba ninia katuas-oan hetan serbisu foun. Oinsá mak nia “husik Jeová dirije [ninia] dalan”? Nia hatete: “Haʼu fakar haʼu-nia sentimentu ba Jeová kona-ba buat neʼebé halo haʼu pániku, sente mesamesak, no laran-taridu. Tempu ida-idak haʼu halo nuneʼe, Jeová fó haʼu forsa neʼebé haʼu presiza.”

Oinsá mak Ita bele sadere liután ba Jeová? Hanesan ai-horis neʼebé presiza bee no nutrisaun husi rai-metan atu bele moris, nuneʼe mós ita-nia fiar presiza bee no nutrisaun iha dalan espirituál atu bele kontinua sai metin. Nicolas neʼebé temi ona, medita kona-ba Abraão, Jesus, no Paulo neʼebé halo sakrifísiu oioin atu halo tuir Maromak nia hakarak. Neʼe hametin ninia fiar katak Jeová sempre apoia nia. Se Ita lee no estuda beibeik Bíblia, neʼe bele ajuda Ita tahan hasoru  mudansa oioin iha Ita-nia moris no Ita sei aprende buat oioin neʼebé Ita bele uza atu hametin ema seluk iha kongregasaun foun.

2. Keta halo komparasaun. (Ecle 7:10) Irmaun Jules presiza sai toman ho kultura neʼebé la hanesan bainhira nia muda husi rai-Benín ba Estadus Unidus. Nia hatete: “Haʼu hanoin katak haʼu presiza fó-hatene ba ema foun ida-idak kona-ba haʼu-nia an.” Tanba buat barak neʼebé diferente ho ninia toman, nia komesa dada an husi irmaun-irmán sira. Maibé depois hatene didiʼak tiha kona-ba irmaun-irmán sira, nia troka ninia hanoin. Nia hatete: “Haʼu fiar katak fatin naran deʼit neʼebé ita bá, ema mak hanesan deʼit. Buat neʼebé sira koʼalia no halo mak la hanesan. Importante atu simu ema ida-idak nia toman.” Tan neʼe, labele halo komparasaun ho Ita-nia kongregasaun uluk nian. Irmán pioneiru ida naran Anne-Lise hatete: “Haʼu muda ba fatin foun laʼós atu buka buat neʼebé haʼu husik ona. Haʼu muda tanba hakarak aprende buat foun.”

Katuas kongregasaun mós labele halo komparasaun ho kongregasaun neʼebé uluk nia tuir. Maski irmaun sira iha kongregasaun foun halaʼo knaar iha dalan neʼebé diferente, neʼe la dehan katak sira halo buat neʼebé la loos. Matenek atu buka-hatene didiʼak situasaun iha área foun neʼe antes fó Ita-nia sujestaun. (Ecle 3:​1, 7b) Diʼak atu hanorin irmaun sira liuhusi Ita-nia ezemplu duké obriga sira atu halo tuir Ita-nia hanoin.—2 Kor 1:24.

3. Apoia kongregasaun foun. (Flp 1:27) Atu muda mak presiza tempu no enerjia barak, maibé importante atu tuir reuniaun sira bainhira Ita foin toʼo iha kongregasaun foun, se bele oin ba oin. Irmaun-irmán sira iha kongregasaun foun presiza haree beibeik Ita atu bele sente besik ho Ita no mós bele ajuda Ita. Lucinda ho ninia oan-feto naʼin-rua neʼebé muda ba sidade boot ida iha Áfrika Súl hatete: “Haʼu-nia belun sira anima haʼu atu fokus hodi apoia kongregasaun foun, haklaken ho irmaun-irmán sira, no tuir reuniaun sira. Ami mós oferese ami-nia hela-fatin atu uza hodi halaʼo grupu haklaken.”

Ita bele hametin Ita-nia an no mós irmaun-irmán sira iha kongregasaun foun hodi “hakaʼas an atu apoia malu” iha atividade espirituál. Anne-Lise, neʼebé temi ona, simu anima husi katuas sira atu koko haklaken ho irmaun-irmán hotu. Rezultadu mak saida? Nia hatete: “Haʼu lalais deʼit rekoñese katak neʼe mak xave atu bele sai parte ba kongregasaun neʼe.” No mós hodi hola parte iha atividade sira hanesan hamoos no tau matan ba Reuniaun-Fatin sei hatudu katak Ita sai ona parte ba kongregasaun neʼe. Kuandu Ita okupadu iha kongregasaun laran, lakleur deʼit Ita sei sente katak sira simu Ita no Ita mak parte ba família espirituál.

 4. Habelun ho irmaun-irmán foun. (2 Kor 6:​11-13) Hatudu interese ba ema seluk mak dalan diʼak atu habelun ho ema, tan neʼe uza tempu antes no depois reuniaun atu koʼalia ho irmaun-irmán sira hodi bele koñese sira. Hakaʼas an atu dekór sira-nia naran. Hodi hanoin-hetan ema nia naran no hatudu laran-diʼak sei book sira atu hakbesik ba Ita no neʼe sei ajuda Ita atu hetan belun foun.

Duké hanoin barak kona-ba ema sei simu Ita ka lae, fó tempu ba irmaun-irmán sira atu sira bele hatene Ita mak ema oinsá. Aprende husi Lucinda neʼebé hatete: “Ami bele iha belun diʼak tanba ami buka oportunidade atu konvida irmaun-irmán sira mai ami-nia uma.”

“SIMU MALU BÁ”

Ba ema balu karik hodi tuir reuniaun iha kongregasaun foun mak lori estrese ba sira. Ita bele halo saida atu ajuda irmaun-irmán foun neʼe? Paulo anima ita atu “simu malu bá, hanesan Kristu mós simu imi”. (Rom 15:7) Katuas sira bele banati-tuir Kristu hodi ajuda ema foun atu sente kmaan iha kongregasaun foun. (Haree kaixa “ Saida mak bele ajuda Ita bainhira muda ba kongregasaun foun?”) Maibé loloos ema hotu iha kongregasaun, inklui labarik sira bele ajuda ema foun atu sente kmaan.

Simu ema seluk inklui konvida sira ba ita-nia uma no mós oferese ajuda ba sira. Porezemplu, irmán ida hamaluk irmán seluk neʼebé foin muda mai ninia área atu bele esplika ba nia oinsá atu uza transporte públiku. Buat neʼebé irmán neʼe halo kona tebes irmán foun neʼe nia laran no ajuda irmán foun neʼe atu adapta.

OPORTUNIDADE ATU LAʼO BA OIN

Nuʼudar gafañotu ida sai boot, nia presiza troka ninia kulit ba dala balu antes ninia liras iha forsa atu bele semo. Nuneʼe mós bainhira muda ba kongregasaun foun, Ita  presiza troka Ita-nia toman balu neʼebé hanetik Ita atu laʼo ba oin. Nicolas no Céline hatete: “Hodi muda ba fatin foun mak treinu neʼebé diʼak. Hodi adapta ho ema foun no mós fatin foun ajuda ami atu haburas hahalok foun.” Jean-Charles, neʼebé temi ona, hatete kona-ba oinsá ninia família hetan benefísiu: “Hodi muda ba kongregasaun foun, neʼe ajuda ami-nia oan atu laʼo ba oin no hakbesik liután ba Jeová. Depois fulan balu deʼit, ami-nia oan-feto hetan knaar iha reuniaun loron baileet no ami-nia oan-mane sai haklaken-naʼin.”

Oinsá se Ita-nia situasaun la permite atu muda ba fatin neʼebé presiza liután haklaken-naʼin? Se nuneʼe, Ita bele aplika sujestaun sira-neʼe hodi Ita bele sente hanesan kongregasaun neʼebé Ita tuir daudaun mak foun ba Ita. Nuʼudar Ita sadere ba Jeová, kontinua sai okupadu iha kongregasaun nia atividade sira hodi haklaken ho irmaun-irmán sira, ka habelun ho irmaun-irmán foun no hametin liután ita-nia relasaun belun. Karik Ita bele foti inisiativu atu ajuda ema neʼebé foun ka ema neʼebé presiza ajuda. Domin mak hatudu katak Ita mak ema Kristaun neʼebé loos, tan neʼe hodi hatudu domin ba ema seluk sei halo Ita hakbesik liután ba Jeová. (João 13:35) Ita bele fiar katak “buat sira-neʼe hanesan sakrifísiu neʼebé halo Maromak kontente tebes”.—Ebr 13:16.

Maski iha susar oioin, ema Kristaun barak mak susesu ona hodi muda ba kongregasaun foun. Ita mós bele sente nuneʼe! Anne-Lise hatete: “Hodi muda ba kongregasaun foun ajuda haʼu atu loke luan haʼu-nia laran.” Kazumi agora fiar katak hodi muda ba kongregasaun foun “ita bele sente Jeová nia apoia iha dalan neʼebé ita seidauk sente”. No oinsá ho Jules? Nia hatete: “Hodi habelun ho irmaun-irmán sira ajuda haʼu atu sente kmaan. Agora haʼu sente haʼu mak parte ba kongregasaun, no neʼe halo haʼu sente susar atu muda fali ba fatin seluk.”