1-2. Zadoc mak sé? (1 Krónikas 12:​22, 26-28)

 IMAJINA toʼok iha mane naʼin-340.000 liu neʼebé halibur hamutuk no hakarak foti David nuʼudar liurai ba nasaun Izraél. Durante loron tolu, mane sira-neʼe hela iha área foho neʼebé besik Hebron. Sira haklalak, koʼalia ba malu, no kanta knananuk hahiʼi nian ba Jeová. (1 Krón 12:39) Iha mane joven ida naran Zadoc mós hamutuk ho sira. Ema seluk karik la nota katak Zadoc mós iha neʼebá. Maibé Jeová nota, no nia hakarak ita mós hatene ida-neʼe. (Lee 1 Krónikas 12:​22, 26-28.) Entaun, Zadoc mak sé?

² Zadoc mak amlulik ida neʼebé serbisu hamutuk ho Amlulik Boot Abiatar. Zadoc mós konsellu-naʼin neʼebé hetan matenek husi Maromak atu bele komprende kona-ba Maromak nia hakarak. (2 Sam 15:27) Bainhira povu presiza matadalan neʼebé diʼak, sira sempre husu ba Zadoc. Nia mós mane neʼebé aten-brani. Neʼe mak hahalok neʼebé ita sei koʼalia hamutuk iha lisaun neʼe.

3. (a) Tanbasá Jeová nia povu presiza hatudu aten-brani? (b) Iha lisaun neʼe, ita sei koʼalia hamutuk kona-ba saida?

³ Durante loron ikus sira, Satanás fó susar liután ba Maromak nia povu. (1 Ped 5:8) Ita presiza aten-brani nuʼudar ita hein Jeová atu halakon Satanás no sistema aat neʼe. (Sal 31:24) Mai ita haree dalan tolu oinsá ita bele banati-tuir Zadoc nia aten-brani.

 APOIA MAROMAK NIA UKUN

4. Tanbasá Jeová nia povu presiza aten-brani atu apoia Maromak nia Ukun? (Haree mós foto.)

⁴ Nuʼudar Jeová nia povu, ita apoia Maromak nia Ukun ho laran tomak. Maibé, dala barak ita presiza aten-brani atu halo nuneʼe. (Mt 6:33) Porezemplu, iha mundu aat neʼe ita presiza aten-brani atu moris tuir Jeová nia matadalan no haklaken kona-ba liafuan diʼak. (1 Tes 2:2) No mós mundu neʼe la iha unidade tanba problema polítiku, tan neʼe ita presiza aten-brani atu nafatin neutrál. (João 18:36) Jeová nia povu barak hasoru problema ekonomia, ema fó-terus, ka tama komarka tanba la hola parte iha polítiku ka militár.

5. Tanbasá Zadoc presiza aten-brani atu apoia David?

⁵ Zadoc bá Hebron laʼós deʼit atu selebra tempu neʼebé David sai liurai. Maibé nia mós lori armas no prontu atu halo funu. (1 Krón 12:38) Nia prontu hodi laʼo tuir David atu halo funu no atu defende povu Izraél husi inimigu. Karik Zadoc la iha esperiénsia barak atu halo funu, maibé nia hatudu aten-brani.

6. Oinsá mak David hatudu ezemplu diʼak ba Zadoc kona-ba aten-brani? (Salmo 138:3)

⁶ Amlulik Zadoc aprende atu hatudu aten-brani husi neʼebé? Nia koñese mane barak neʼebé iha kbiit no aten-brani. Ita bele fiar katak nia aprende husi sira-nia ezemplu. Porezemplu, David ho aten-brani “dirije ema Izraél bá funu”, no neʼe book ema Izraél hotu atu apoia nia ho laran tomak. (1 Krón 11:​1, 2) David sempre sadere ba Jeová nia ajuda atu manán inimigu sira. (Sal 28:7; lee Salmo 138:3.) Zadoc mós aprende husi ema sira neʼebé aten-brani, hanesan Jeoada no ninia oan-mane Benaias neʼebé asuwaʼin ida,  no mós xefe naʼin-22 neʼebé apoia David. (1 Krón 11:​22-25; 12:​26-28) Mane sira-neʼe deside metin atu apoia David nuʼudar liurai.

7. (a) Ohin loron, ita bele hetan ezemplu kona-ba aten-brani husi neʼebé? (b) Saida mak Ita aprende husi irmaun Nsilu nia ezemplu neʼebé hatudu iha vídeo?

⁷ Ita hetan kbiit no aten-brani bainhira ita aprende kona-ba ezemplu husi sira neʼebé ho aten-brani apoia Jeová nia ukun. Ita-nia Liurai Jesus Kristu deside metin atu la hola parte iha Satanás nia sistema polítiku. (Mt 4:​8-11; João 6:​14, 15) Nia sempre sadere ba Jeová atu bele iha kbiit. Ohin loron, ita mós iha ezemplu barak husi mane joven sira neʼebé hamriik metin atu la hola parte iha buat polítiku ka tama militár. Ita mós bele lee kona-ba esperiénsia sira-neʼe iha jw.org. a

AJUDA IRMAUN-IRMÁN SIRA

8. Bainhira mak karik katuas sira presiza aten-brani atu fó ajuda ba irmaun-irmán sira?

⁸ Jeová nia povu kontente atu ajuda malu. (2 Kor 8:4) Maibé, dala ruma presiza aten-brani atu halo ida-neʼe. Porezemplu, bainhira akontese funu, katuas sira rekoñese katak irmaun-irmán sira presiza hetan anima, apoia, no karik presiza loroloron nian no mós Bíblia no publikasaun sira. Tanba hadomi bibi sira, katuas sira tau sira-nia moris iha perigu laran atu fó ajuda bainhira presiza. (João 15:​12, 13) Iha situasaun hanesan neʼe, sira banati-tuir Zadoc nia aten-brani.

9. Hanesan temi iha 2 Samuel 15:​27-29, David haruka Zadoc atu halo saida? (Haree mós dezeñu.)

⁹ David nia moris iha perigu laran. Ninia oan-mane Absalão deside atu hadau ninia ukun. (2 Sam 15:​12, 13) David presiza halai sai kedas husi Jeruzalein! Nia bolu ninia atan sira: “Hamriik bá, mai  ita halai, tanba Absalão sei la husik ita ida atu moris!” (2 Sam 15:14) Kuandu sira halai daudaun, David rekoñese katak ninia atan ida presiza hela nafatin atu bele fó-hatene ba nia kona-ba Absalão nia planu tuirmai. Tan neʼe, nia haruka Zadoc no amlulik seluk atu fila fali ba Jeruzalein hodi bele sai nuʼudar espiaun. (Lee 2 Samuel 15:​27-29.) Sira presiza kuidadu tebes. Buat neʼebé David haruka amlulik sira-neʼe halo mak lori perigu ba sira-nia moris. Absalão mak ema neʼebé hanoin an deʼit no laran-aat. Entaun imajina toʼok saida mak nia sei halo ba Zadoc no amlulik seluk se nia hatene katak sira mak David nia espiaun!

10. Oinsá mak Zadoc no sira neʼebé hamutuk ho nia proteje David?

¹⁰ David halo planu neʼebé envolve Zadoc no Husai. Husai mak David nia belun ida tan neʼebé laran-metin. (2 Sam 15:​32-37) Hodi halo tuir David nia planu, Husai halo Absalão tau fiar ba nia no fó sai ninia ideia ba Absalão kona-ba oinsá atu funu hasoru David, no neʼe fó tempu ba David atu prepara an. Tuirmai, Husai fó-hatene ba Zadoc no Abiatar kona-ba planu neʼe. (2 Sam 17:​8-16) Ikusmai, Zadoc no Abiatar bele fó-hatene fali ba David. (2 Sam 17:17) Ho Jeová nia ajuda, Zadoc no amlulik seluk hola parte iha knaar importante atu proteje David nia moris.—2 Sam 17:​21, 22.

11. Oinsá mak ita bele banati-tuir Zadoc nia aten-brani bainhira ajuda irmaun-irmán sira?

¹¹ Se ita presiza ajuda irmaun-irmán sira durante tempu neʼebé perigu, oinsá mak ita bele hatudu aten-brani hanesan Zadoc? (1) Halo tuir matadalan. Iha situasaun hanesan neʼe, importante atu nafatin unidade. Halo tuir matadalan neʼebé mai husi sukursál. (Ebr 13:17) Katuas sira presiza haree beibeik matadalan kona-ba oinsá atu prepara ba tempu dezastre  no saida mak sira presiza halo bainhira dezastre akontese. (1 Kor 14:​33, 40) (2) Hatudu aten-brani, maibé matan-moris. (Prov 22:3) Hanoin uluk antes halo buat ruma. Keta halo buat ruma neʼebé lori risku, se la presiza. (3) Sadere ba Jeová. Hanoin-hetan katak Jeová hanoin tebes Ita no irmaun-irmán sira. Nia sei apoia Ita atu ajuda irmaun-irmán sira ho seguru.

12-13. Saida mak Ita aprende husi Viktor no Vitalii nia esperiénsia? (Haree mós foto.)

¹² Hanoin toʼok kona-ba irmaun Viktor no Vitalii, neʼebé simu knaar atu lori ai-han no bee ba irmaun-irmán sira iha rai-Ukránia. Viktor hatete: “Ami buka ai-han iha fatin hotu. Dala ruma ema tiru malu besik ami. Irmaun ida fó ai-han barak neʼebé nia rai hela, no neʼe ajuda haklaken-naʼin barak atu iha hahán ba loron balu. Nuʼudar ami hatama ai-han sira ba karreta, bomba ida monu maizumenus dook metru 20 husi ami. Durante tempu neʼebá, haʼu harohan ba Jeová atu fó haʼu aten-brani hodi bele kontinua ajuda irmaun-irmán sira.”

¹³ Vitalii hatete: “Presiza duni aten-brani. Haʼu-nia viajen primeiru mak ba oras 12. Haʼu halo orasaun ba Jeová durante viajen tomak.” Vitalii hatudu aten-brani, maibé nia mós matan-moris. Nia hatete: “Haʼu kontinua husu Jeová atu fó haʼu matenek no rekoñese haʼu-nia limitasaun. Haʼu uza deʼit dalan sira neʼebé autoridade fó lisensa atu liu. Haʼu-nia fiar sai metin liután bainhira haree irmaun-irmán sira serbisu hamutuk. Sira hamoos dalan husi buat neʼebé taka dalan, sira halibur no lalin ai-han, roupa no sasán importante seluk ba karreta, no fó hahán no fatin ba haʼu ho Viktor atu deskansa.”

NAFATIN LARAN-METIN BA JEOVÁ

14. Ita sei sente oinsá se ema neʼebé ita hadomi la laran-metin tan ba Jeová?

¹⁴ Susar ida neʼebé bele halo ita sente laran-kraik tebes mak bainhira ita-nia família ka belun ida la laran-metin tan ba Jeová. (Sal 78:40; Prov 24:10) Se ita mak iha relasaun besik tebes ho ema neʼe, susar liután atu tahan situasaun neʼe. Se Ita hasoru situasaun hanesan neʼe, Zadoc nia ezemplu kona-ba laran-metin bele hametin Ita.

15. Tanbasá mak Zadoc presiza aten-brani atu nafatin laran-metin ba Jeová? (1 Reis 1:​5-8)

¹⁵ Zadoc nafatin laran-metin ba Jeová kuandu ninia belun diʼak Abiatar la hatudu laran-metin. Neʼe akontese bainhira David nia ukun besik remata. Nuʼudar David besik atu mate, ninia oan-mane Adonias koko atu hadau pozisaun nuʼudar liurai neʼebé Jeová promete ona atu fó ba Salomão. (1 Krón 22:​9, 10) Abiatar hili atu apoia Adonias. (Lee 1 Reis 1:​5-8.) Hodi halo nuneʼe, Abiatar la hatudu tan laran-metin ba David no mós ba Jeová! Neʼe halo Zadoc sente triste tebes. Durante tinan 40 liu, nia no Abiatar halaʼo knaar hamutuk nuʼudar amlulik. (2 Sam 8:17) Sira hamutuk atu tau matan “Maromak loos nia Arka”. (2 Sam 15:29) Uluk, sira naʼin-rua apoia David nia ukun no halo buat barak hamutuk hodi serbí Jeová.—2 Sam 19:​11-14.

16. Saida mak ajuda Zadoc atu nafatin laran-metin?

¹⁶ Zadoc nafatin laran-metin ba Jeová maski Abiatar la laran-metin. David nunka duvida kona-ba Zadoc nia laran-metin. Bainhira David hatene kona-ba Adonias nia planu, David tau fiar ba Zadoc, Natan, no Benaias atu foti Salomão nuʼudar  liurai. (1 Reis 1:​32-34) Hodi hamutuk ho Jeová nia atan neʼebé laran-metin hanesan Natan no sira seluk neʼebé apoia Liurai David, neʼe hametin no halo Zadoc sai aten-brani liután. (1 Reis 1:​38, 39) Bainhira Salomão sai liurai, nia “foti amlulik Zadoc hodi troka Abiatar”.—1 Reis 2:35.

17. Oinsá mak Ita bele banati-tuir Zadoc se Ita-nia família ka belun ida hili atu la laran-metin tan ba Jeová?

¹⁷ Oinsá mak Ita bele banati-tuir Zadoc? Se Ita-nia família ka belun ida hili atu la laran-metin tan ba Jeová, hatudu ba Jeová katak Ita sei nafatin laran-metin ba nia. (Jos 24:15) Jeová sei fó Ita kbiit no aten-brani neʼebé Ita presiza. Sadere ba nia liuhusi orasaun no kontinua hakbesik ba maluk fiar-naʼin sira neʼebé laran-metin. Jeová hafolin Ita-nia laran-metin, no nia sei fó kolen ba Ita.—2 Sam 22:26.

18. Saida mak Ita aprende husi Marco no Sidse nia esperiénsia?

¹⁸ Haree toʼok ezemplu kona-ba Marco no ninia feen Sidse. Sira-nia oan-feto naʼin-rua deside atu la laran-metin tan ba Jeová. Marco hatete: “Husi tempu neʼebé ita-nia oan foin moris, ita hadomi tebes sira. Ita hakarak halo buat naran deʼit atu proteje sira. Tan neʼe, bainhira sira hili atu husik tiha Jeová, neʼe halo ita laran dodok.” Nia hatutan tan: “Maibé Jeová sempre apoia ami. Nia ajuda ami atu anima malu. Bainhira haʼu sente fraku, haʼu-nia feen iha kbiit. No bainhira haʼu-nia feen sente fraku, haʼu mak iha kbiit.” Sidse hatete: “Se Jeová la fó ajuda no hametin ami, ami labele tahan susar neʼe. Haʼu sente triste tebes no fó-sala ba haʼu-nia an, tan neʼe haʼu fó sai ba Jeová kona-ba haʼu-nia sentimentu. Liutiha loron balu, irmán ida neʼebé ami la hasoru malu ba tinan barak ona hakbesik haʼu no tula liman mai haʼu-nia kabaas no hateke mai haʼu hodi dehan: ‘Hanoin-hetan Sidse, neʼe laʼós ó-nia sala.’ Ho Jeová nia ajuda, haʼu bele nafatin sente kontente bainhira serbí nia.”

19. Ita deside metin atu halo saida?

¹⁹ Jeová hakarak ninia atan hotu atu hatudu aten-brani hanesan Zadoc. (2 Tim 1:7) Maibé, Nia lakohi atu ita sadere ba ita-nia kbiit rasik. Nia hakarak ita sadere ba nia. Tan neʼe, bainhira Ita hasoru situasaun neʼebé Ita presiza hatudu aten-brani, sadere ba Jeová. Ita bele fiar katak Jeová sei halo Ita aten-brani hanesan buat neʼebé nia halo ba Zadoc!—1 Ped 5:10.