1, 2. (a) Ema iha hanoin oioin saida kona-ba liberdade? (b) Bíblia hanorin saida kona-ba liberdade, no ita sei koʼalia kona-ba pergunta saida deʼit?

FETO ida hatete ba ninia kolega iha tempu neʼebé nia atu halo desizaun, nia dehan: “Keta husu haʼu atu hanoin, haruka deʼit haʼu tenke halo saida. Neʼe fasil liu.” Feto neʼe hakarak ema seluk haruka deʼit nia atu halo buat ruma duké uza prezente furak neʼebé ninia Kriadór fó ba nia, neʼe mak liberdade atu hili. Oinsá ho Ita? Ita gosta atu halo Ita rasik nia desizaun ka Ita gosta ema seluk mak halo desizaun ba Ita? Ita hanoin oinsá kona-ba Ita-nia liberdade?

² Ema iha hanoin oioin kona-ba liberdade. Ema balu hatete katak tuir loloos ita la iha liberdade tanba buat hotu tuir deʼit destinu neʼebé Maromak fó ba ita. Balu tan hatete katak liberdade neʼebé loos mak liberdade neʼebé laiha limitadu. Maibé, atu iha hanoin neʼebé loos kona-ba liberdade, ita tenke haree saida mak Maromak nia Liafuan hatete. Tanbasá? Tanba Bíblia hanorin katak Maromak mak kria ita ho liberdade, neʼe mak kbiit neʼebé ita ida-idak uza atu halo desizaun. (Lee Josué [Yosua] 24:15. *) Bíblia  mós esplika kona-ba pergunta balu tuirmai neʼe: Ita-nia liberdade iha limitadu ka lae? Oinsá mak ita bele uza liberdade atu halo desizaun? Oinsá mak ita-nia desizaun bele hatudu katak ita hadomi Jeová? Oinsá mak ita hatudu katak ita respeitu ema seluk nia desizaun?

3. Jeová hatudu ezemplu saida kona-ba uza liberdade?

³ Jeová mesak deʼit mak iha liberdade neʼebé laiha rohan, no ita bele aprende husi dalan neʼebé nia uza ninia liberdade neʼe. Porezemplu, Jeová hili nasaun Izraél hodi sai ninia ‘povu espesiál’. (Deuteronômio [Ulangan] 7:6-8) Jeová halo desizaun neʼe tanba razaun ida, nia hakarak kumpre ninia promete neʼebé nia halo ho ninia belun Abraão. (Gênesis [Kejadian] 22:15-18) Jeová sempre uza ninia liberdade iha dalan neʼebé domin no la todan ba sorin. Ita bele haree kona-ba neʼe husi dalan neʼebé nia fó dixiplina ba ema Izraél iha tempu neʼebé sira kontra nia. Bainhira ema Izraél arrepende an ho laran kona-ba sira-nia sala, Jeová hatudu domin no laran-sadiʼa ba sira. Nia dehan: “Haʼu sei kura sira, no sira sei la hatudu fali hahalok la laran-metin, haʼu sei hadomi sira ho haʼu-nia hakarak rasik.” (Oséias [Hosea] 14:4) Jeová hatudu ezemplu neʼebé diʼak tebes ba ita oinsá atu uza liberdade hodi ajuda ema seluk!

4, 5. (a) Sé mak kriatura primeiru neʼebé Maromak fó liberdade ba nia, no oinsá mak nia uza ninia liberdade neʼe? (b) Ita ida-idak tenkesér husu pergunta saida ba ita-nia an?

⁴ Bainhira Jeová kria anju no ema, nia kria sira ho liberdade atu hili. Ninia kriatura primeiru mak Jesus. Jeová kria Jesus tuir ninia ilas no fó liberdade ba nia. (Koloso 1:15) Oinsá mak Jesus uza ninia liberdade neʼe? Antes tun mai rai, Jesus hili atu hatudu laran-metin ba Maromak hodi la tuir Satanás atu kontra Jeová. No bainhira Jesus moris iha rai, nia hili atu la monu ba Satanás nia tentasaun sira. (Mateus 4:10) Tuirmai iha kalan antes nia mate, nia hatete ba ninia Aman katak nia hakarak halo tuir deʼit ninia Aman nia hakarak. Nia dehan: “Aman, se Ita hakarak, hasai tiha kopu neʼe husi haʼu. Maski nuneʼe, laʼós tuir haʼu-nia hakarak, maibé tuir Ita-nia hakarak.” (Lucas 22:42) Ita bele ka lae atu banati-tuir Jesus nia ezemplu hodi uza ita-nia liberdade atu fó glória ba Jeová no halo tuir ninia hakarak?

⁵ Bele, tanba ita mós kria tuir Maromak nia ilas. (Gênesis [Kejadian] 1:26) Maibé, ita-nia liberdade iha limitadu, la hanesan Jeová nia liberdade neʼebé laiha rohan. Bíblia esplika katak Jeová mak ida-neʼebé fó limitadu ba ita-nia liberdade no nia hakarak ita atu halo tuir limitadu sira-neʼe. Porezemplu, iha família laran, feen tenkesér hakruʼuk ba ninia laʼen no oan halo tuir sira-nia inan-aman. (Éfeso 5:22; 6:1) Oinsá mak limitadu neʼe kona dalan neʼebé ita uza ita-nia direitu atu hili? Resposta ba pergunta neʼe iha ligasaun ho ita-nia moris iha futuru.

6. Fó toʼok ezemplu ida neʼebé hatudu tanbasá importante atu iha limitadu ba ita-nia liberdade.

⁶ Tanbasá mak ita bele dehan katak liberdade neʼebé iha limitadu mak liberdade neʼebé loos? Tanba neʼe bele proteje ita. Porezemplu, karik ita hili atu lori karreta ba sidade dook ida. Maibé hanoin toʼok iha dalan atu bá sidade neʼe la iha lei tránzitu, ema hotu iha liberdade atu lori karreta tuir sira-nia hakarak no bele tun ka saʼe. Ita sente seguru ka lae atu uza estrada neʼe? Lae. Tan neʼe, liberdade neʼebé loos presiza  iha limitadu tanba neʼe bele lori bensaun ba ita. Mai ita haree ezemplu balu husi Bíblia neʼebé hatudu katak limitadu neʼebé Jeová fó ba ita-nia liberdade bele lori bensaun oioin.

7. (a) Saida mak hatudu katak Adão la hanesan ho animál sira? (b) Esplika toʼok dalan ida neʼebé Adão uza liberdade ho didiʼak.

⁷ Iha tempu neʼebé Jeová kria ema primeiru Adão, nia mós fó liberdade atu hili ba Adão hanesan buat neʼebé nia fó ba anju sira. Maibé nia la fó liberdade hanesan neʼe ba animál. Oinsá mak Adão uza ninia liberdade neʼe ho didiʼak? Dalan ida mak nia fó naran ba animál ida-idak. Bíblia hatete katak Maromak “lori ba mane neʼe atu haree mane neʼe sei fó naran saida ba animál ida-idak”. Bainhira Adão haree didiʼak tiha ba animál sira, nia fó naran ba sira ida-idak tuir sira-nia modelu. No Jeová la troka fali naran neʼebé Adão hili ona, maibé “naran neʼebé mane neʼe fó ba animál sira, ida-neʼe mak sai sira-nia naran”.—Gênesis (Kejadian) 2:19.

8. Iha dalan saida mak Adão uza sala ninia liberdade, no neʼe lori rezultadu saida?

⁸ Jeová fó responsabilidade ba Adão atu halo mundu tomak sai paraízu. Nia hatete ba Adão: “Iha oan no sai barak bá, halo nakonu rai no domina ida-neʼe, domina ikan sira iha tasi, kriatura neʼebé semo iha lalehan no kriatura hotu neʼebé book an iha rai.” (Gênesis [Kejadian] 1:28) Maibé Adão hili hodi han ai-fuan neʼebé Maromak bandu nia labele han, ho ida-neʼe nia hatudu katak nia lakohi simu limitadu neʼebé Jeová fó ba nia. Tanba Adão uza sala ninia liberdade neʼe mak lori ona terus iha tinan rihun ba rihun ba ema. (Roma 5:12) Hanoin kona-ba konsekuénsia husi Adão nia desizaun bele book ita atu uza ita-nia liberdade iha dalan neʼebé loos no simu limitadu neʼebé Jeová fó ona ba ita.

9. Jeová fó liberdade ba ema Izraél atu hili saida, no sira promete atu halo saida?

⁹ Adão no Eva hadaʼet sala no mate ba ema hotu. Maski nuneʼe, ita sei iha direitu atu uza ita-nia liberdade. Ezemplu ida mak kona-ba tempu neʼebé Jeová hili nasaun Izraél. Jeová fó sira liberdade atu simu ka la simu hodi sai povu espesiál ida ba nia. (Êxodo [Keluaran] 19:3-6) Nasaun Izraél hili atu halo saida? Sira simu hodi sai Maromak nia povu no uza sira-nia liberdade iha dalan neʼebé Jeová hakarak. Sira hatete: “Buat hotu neʼebé Jeová koʼalia ona, ami prontu atu halo tuir.” (Êxodo [Keluaran] 19:8) Maibé triste mak, ikusmai sira hili hodi la halo tuir sira-nia promesa ba Jeová. Neʼe sai avizu importante ida ba ita. Tan neʼe, mai ita uza didiʼak ita-nia liberdade no hakbesik nafatin ba Jeová no halo tuir ninia ukun-fuan sira.—1 Korinto 10:11.

10. Ezemplu saida deʼit mak hatudu katak ema sala-naʼin bele uza sira-nia liberdade atu lori glória ba Maromak? (Haree dezeñu iha pájina 12.)

¹⁰ Husi livru Ebreu kapítulu 11 temi Maromak nia atan naʼin-16 neʼebé uza sira-nia liberdade iha dalan neʼebé Maromak hakarak. Tan neʼe sira simu bensaun oioin no iha esperansa furak ba futuru. Porezemplu, Noé iha fiar neʼebé boot no nia hili atu halo tuir Maromak nia matadalan hodi harii ró boot ida atu salva nia rasik nia família no mós jerasaun tuirmai. (Ebreu 11:7) Abraão no Sara halo tuir Maromak ho laran hodi bá rai neʼebé Maromak promete ba sira. Tuir loloos, sira “iha oportunidade atu fila fali” ba sidade Ur, maibé sira tau fokus deʼit ba buat neʼebé Maromak promete ba sira kona-ba futuru. Bíblia hatete katak sira “hakaʼas an atu hetan fatin neʼebé diʼak liu”. (Ebreu 11:8, 13, 15, 16) Moisés fila kotuk ba Ejitu nia rikusoin sira no “nia hili atu hetan terus hamutuk ho Maromak  nia povu duké hetan ksolok ba tempu uitoan iha sala laran”. (Ebreu 11:24-26) Mai ita banati-tuir sira-nia ezemplu no uza didiʼak liberdade neʼebé Maromak fó hodi halo tuir ninia hakarak sira.

11. (a) Bensaun furak husi ita-nia liberdade mak saida? (b) Saida mak book Ita atu uza didiʼak Ita-nia liberdade?

¹¹ Karik ita sente diʼak liu atu husik ema seluk mak halo desizaun ba ita, maibé se ita halo nuneʼe, ita sei nunka hatene liberdade bele lori bensaun boot saida. Bensaun neʼe hakerek iha Deuteronômio (Ulangan) 30:19, 20. * (Lee.) Versíkulu 19 esplika kona-ba saida mak Maromak hakarak ema Izraél atu hili. Versíkulu 20 hatete katak Jeová fó oportunidade furak ida ba sira atu hatudu sira-nia domin ba nia. Ita mós bele hili atu adora Jeová. Ita mós iha oportunidade furak atu uza ita-nia liberdade atu fó glória ba Jeová no hatudu ita-nia domin ba nia.

12. Ita sei nunka uza ita-nia liberdade iha dalan saida?

¹² Bainhira Ita fó prezente folin-boot ida ba Ita-nia kolega, hanoin toʼok Ita sente oinsá se kolega neʼe soe deʼit Ita-nia prezente ba lixu, ka aat liután mak nia uza prezente neʼe atu hakanek fali ema seluk? Neʼe sei halo Ita laran-kanek, loos ka lae? Jeová mós fó liberdade nuʼudar prezente furak ida ba ema. Tan neʼe nia sente laran-kanek tebes bainhira nia haree ema uza sala liberdade hodi halo desizaun neʼebé sala iha sira-nia moris ka sira hakanek ema seluk. Buat neʼebé Bíblia hatete mak loos duni, katak “iha loron ikus sira”, ema sei la hatene atu “fó-agradese”. (2 Timóteo 3:1, 2) Maibé, oinsá mak ita hatudu katak ita agradese ba prezente furak neʼebé Jeová fó? No oinsá mak ita bele hasees an husi uza sala prezente furak neʼe?

13. Oinsá mak ita bele hasees an atu la uza sala ita-nia liberdade?

¹³ Ita hotu iha liberdade atu hili kolega, roupa ka dalan atu hadiʼa an, no atividade halimar nian. Maibé ita bele uza sala ita-nia liberdade sai nuʼudar razaun atu halo buat neʼebé Maromak la gosta ka atu halo tuir ema nia hahalok iha mundu neʼe. (Lee  1 Pedro 2:16.) Duké halo hanesan neʼe, diʼak atu uza ita-nia liberdade sai nuʼudar oportunidade hodi “halo buat hotu-hotu ba Maromak nia glória”.—Galásia 5:13; 1 Korinto 10:31.

14. Tanbasá mak ita presiza tau fiar ba Jeová iha tempu neʼebé ita uza ita-nia liberdade?

¹⁴ Jeová dehan: “Haʼu, Jeová, mak imi-nia Maromak, Ida neʼebé hanorin imi kona-ba buat neʼebé diʼak liu ba imi, Ida neʼebé dirije imi iha dalan neʼebé imi tenke laʼo bá.” (Isaías [Yesaya] 48:17) Ita tenkesér tau fiar ba Jeová no husik nia atu dirije ita. Ita tenkesér haraik an atu simu realidade katak ita-nia liberdade iha limitadu, tanba Bíblia dehan: “Ema la iha kbiit atu hili ninia dalan rasik. Ema neʼebé laʼo mós la iha kbiit atu hili ninia hakat.” (Jeremias [Yeremia] 10:23) Ita lakohi monu ba lasu neʼebé Adão no ema Izraél halo hodi sadere ba sira rasik nia matenek. Ita hakarak “tau fiar ba Jeová ho [ita-nia] laran tomak”.—Provérbios (Amsal) 3:5.

15. Prinsípiu saida mak ita bele aprende husi Galásia 6:5?

¹⁵ Ita tenkesér respeitu ema seluk nia liberdade atu halo sira rasik nia desizaun. Tanbasá? Tanba ema ida-idak iha direitu atu hili no ema ida-idak sempre halo desizaun neʼebé la hanesan. Neʼe mós inklui desizaun kona-ba hahalok no adorasaun. Tan neʼe mak diʼak atu hanoin-hetan prinsípiu husi Galásia 6:5. (Lee.) Ema ida-idak iha responsabilidade kona-ba desizaun neʼebé sira halo, tan neʼe ita hakarak hatudu respeitu kona-ba dalan neʼebé ema uza sira-nia liberdade.

16, 17. (a) Kongregasaun Korinto mosu problema saida? (b) Oinsá mak Paulo ajuda sira rezolve problema neʼe, no ita aprende saida husi neʼe?

¹⁶ Mai ita haree toʼok ezemplu ida husi Bíblia kona-ba tansá mak ita tenke hatudu respeitu ba ema seluk nia direitu atu hili. Iha kongregasaun Korinto, ema kristaun sira haksesuk malu kona-ba han naʼan sira neʼebé ema faʼan iha merkadu neʼebé karik hasaʼe ona ba estátua. Ema balu nia konxiénsia husik sira atu han naʼan sira-neʼe tanba ba sira, estátua la iha folin ida. Maibé, ba sira neʼebé uluk adora estátua, sira sente katak han naʼan sira-neʼe hanesan adorasaun ida. (1 Korinto 8:4, 7) Problema neʼe boot uitoan tanba bele sobu kongregasaun nia unidade. Oinsá mak apóstolu Paulo ajuda ema kristaun sira atu rezolve problema neʼe?

¹⁷ Primeiru, Paulo fó-hanoin ba sira hotu katak hahán la bele hametin sira-nia relasaun ho Maromak. (1 Korinto 8:8) Tuirmai, Paulo fó avizu ba sira atu la husik sira-nia “direitu atu hili” hodi halo sidi ema seluk neʼebé iha konxiénsia fraku. (1 Korinto 8:9) Ikus, nia hatete ba ema sira neʼebé iha konxiénsia fraku atu la tesi lia kona-ba sira neʼebé hili atu han naʼan neʼe. (1 Korinto 10:25, 29, 30) Tan neʼe bainhira atu halo desizaun importante ruma neʼebé iha ligasaun ho adorasaun, diʼak atu uza ita-nia konxiénsia ida-idak. Maski desizaun ruma kona-ba buat neʼebé kiʼik mós ita presiza hatudu respeitu ba irmaun-irmán sira-nia liberdade.—1 Korinto 10:32, 33.

18. Oinsá mak Ita bele hatudu katak ita hafolin liberdade neʼebé Ita iha?

¹⁸ Jeová fó ona ba ita direitu atu hili nuʼudar prezente neʼebé furak no neʼe mak liberdade neʼebé loos. (2 Korinto 3:17) Ita hafolin prezente neʼe tanba liuhusi neʼe mak ita bele halo desizaun neʼebé hatudu katak ita hadomi Jeová. Tan neʼe, mai ita kontinua halo desizaun neʼebé sei lori glória ba Jeová no hatudu respeitu ba ema seluk nia direitu atu uza prezente furak neʼe.