Jesus hanorin ema atu iha dame ho ema seluk. Maibé loron ida, nia hatete ba ninia apóstolu sira: “Keta hanoin katak haʼu mai atu lori dame ba mundu. Haʼu mai, laʼós atu lori dame, maibé lori surik. Haʼu mai atu haketak ema: oan-mane sei kontra ninia aman, oan-feto sei kontra ninia inan, no feto-foun sei kontra ninia banin-feto.” (Mt 10:34, 35) Liafuan sira-neʼe katak sá?

Jesus lakohi atu sobu ema nia família, maibé nia hatene katak ninia hanorin sira bele halo família sira haketak malu. Tan neʼe, ema sira neʼebé hakarak atu sai Kristu nia dixípulu no hetan batizmu presiza komprende katak dala ruma sira-nia família la kontente ho sira-nia desizaun neʼe. Dala ruma sira-nia kaben ka família seluk sei kontra sira ka halo susar ba sira atu nafatin laran-metin ba Kristu nia hanorin.

Bíblia anima ema Kristaun atu “iha dame ho ema hotu”. (Rom 12:18) Maibé ba família balu, Jesus nia hanorin mak atu hanesan ho “surik”. Neʼe akontese bainhira ema ida husi família simu Jesus nia hanorin, maibé ema seluk kontra ka lakohi simu ida-neʼe. Iha situasaun neʼe, família neʼebé lakohi simu lia-loos sai hanesan “inimigu” ba ema neʼebé aprende lia-loos.​—Mt 10:36.

Irmaun-irmán sira neʼebé hela hamutuk ho família neʼebé iha fiar la hanesan, dala ruma hasoru situasaun neʼebé koko sira-nia domin ba Jeová no mós ba Jesus. Porezemplu, família neʼebé laʼós Testemuña karik obriga sira atu selebra loron-boot relijiaun nian. Sira presiza deside sira sei halo kontente sé. Jesus hatete: “Ema neʼebé hadomi ninia aman ka inan liu fali haʼu, nia la merese sai haʼu-nia dixípulu.” (Mt 10:37) Jesus la dehan katak atu bele sai ninia dixípulu, ema presiza para atu hadomi sira-nia inan-aman. Maibé nia hanorin sira atu halo desizaun kona-ba buat neʼebé importante liu. Se família neʼebé laʼós Testemuña kontra ita tanba ita adora Jeová, ita sei nafatin hadomi sira maibé ita rekoñese katak domin ba Jeová mak importante liu.

Klaru katak bainhira família kontra, ita bele sente laran-triste. Maibé ita presiza hanoin-hetan Jesus nia liafuan neʼebé hatete: “Ema neʼebé la simu ninia ai-riin terus nian hodi laʼo tuir haʼu, nia la merese sai haʼu-nia dixípulu.” (Mt 10:38) Neʼe katak bainhira ita-nia família kontra ita, ita presiza haree ida-neʼe nuʼudar buat neʼebé ita tenke tahan tanba sai Kristu nia dixípulu. Maibé ita hein katak ita-nia hahalok bele book ita-nia família atu troka sira-nia hanoin no aprende Bíblia.​—1 Ped 3:1, 2.