Atu halo Jeová kontente, ita presiza iha fiar. Maibé, Bíblia hatete katak “laʼós ema hotu iha fiar”. (2 Tes 3:2) Bainhira apóstolu Paulo koʼalia kona-ba neʼe, nia refere ba “ema aat sira” neʼebé fó-terus nia. Maibé buat neʼebé nia koʼalia kona-ba fiar mós aplika ba ema seluk. Ema balu hili atu la tau fiar ba evidénsia katak iha duni Maromak neʼebé kria buat hotu. (Rom 1:20) Ema seluk tan fiar katak iha duni buat ruma neʼebé iha kbiit boot. Maibé neʼe laʼós fiar neʼebé loos.

Ita presiza fiar metin katak Jeová iha duni no nia sei “fó kolen” ba ema neʼebé tau fiar ba nia. (Ebr 11:6) Fiar mak hahalok ida neʼebé mai husi Maromak nia espíritu santu. Atu bele hetan espíritu santu, ita presiza halo orasaun ba Jeová hodi husu ida-neʼe. (Lc 11:​9, 10, 13) Dalan importante seluk atu bele simu espíritu santu mak hodi lee Bíblia neʼebé espíritu mak dirije ema atu hakerek. Tuirmai hanoin kona-ba buat neʼebé ita lee no koko atu aplika ida-neʼe. Hodi halo nuneʼe, ita husik Jeová nia espíritu dirije ita iha ita-nia moris no ajuda ita atu iha fiar neʼebé halo Jeová kontente.