LISAUN ESTUDU 21
KNANANUK 107 Maromak nia ezemplu kona-ba domin
Oinsá atu buka pár neʼebé diʼak?
“Sé mak bele hetan feen neʼebé diʼak? Nia folin-boot liu fali korál.”—PROV 31:10.
OBJETIVU
Aprende kona-ba Bíblia nia prinsípiu neʼebé bele ajuda klosan sira atu hetan pár neʼebé diʼak no oinsá ema seluk iha kongregasaun bele apoia klosan sira neʼebé hakarak atu kaben.
1-2. (a) Ema Kristaun neʼebé sei klosan presiza hanoin kona-ba saida antes namora? (b) Namora katak sá? (Haree “Esplikasaun ba fraze”.)
ITA hakarak kaben ka lae? Maski ita la presiza kaben atu sente kontente, maibé ema Kristaun barak neʼebé joven ka idade ona hakarak atu kaben. Klaru katak antes namora, Ita presiza iha relasaun neʼebé metin ho Jeová, koñese didiʼak Ita-nia an, no prontu ona atu tau matan ba família nia presiza bainhira kaben. a (1 Kor 7:36) Se Ita kumpre ona buat sira-neʼe, karik Ita-nia moris kaben nian sei kontente.
2 Maski nuneʼe, dala ruma la fasil atu hetan pár neʼebé diʼak. (Prov 31:10) No maski Ita hetan ema neʼebé Ita hakarak koñese diʼak liután, karik la fasil atu hahú namora. b Iha lisaun neʼe, ita sei koʼalia kona-ba saida mak bele ajuda ema Kristaun sira neʼebé klosan atu hetan pár neʼebé diʼak no hahú namora. Ita mós sei aprende oinsá ema seluk iha kongregasaun bele apoia sira neʼebé hakarak atu kaben.
BUKA PÁR NEʼEBÉ DIʼAK
3. Saida deʼit mak ema Kristaun neʼebé klosan presiza hanoin bainhira buka pár?
3 Se Ita hakarak atu kaben, antes atu hahú namora, diʼak atu hatene hahalok saida mak Ita hakarak Ita-nia pár atu hatudu. Tanba se Ita la halo nuneʼe, karik Ita sei la nota ema neʼebé diʼak atu sai Ita-nia pár, ka karik Ita sei hahú namora deʼit ho ema neʼebé la diʼak ba Ita. Klaru katak diʼak atu buka pár neʼebé hetan ona batizmu. (1 Kor 7:39) Maibé, laʼós ema hotu neʼebé hetan ona batizmu mak pár neʼebé diʼak ba Ita. Tan neʼe, husu ba Ita-nia an: ‘Saida mak haʼu-nia planu? Tuir haʼu-nia hanoin, importante atu haʼu-nia pár hatudu hahalok saida? Haʼu-nia kritéria mak aas liu ka lae?’
4. Ema balu husu saida iha sira-nia orasaun?
4 Se Ita hakarak kaben, klaru katak Ita mós halo orasaun kona-ba neʼe. (Flp 4:6) Jeová la promete atu fó pár ba Ita. Maibé, nia hanoin kona-ba Ita-nia presiza no sentimentu, no nia bele ajuda Ita atu buka pár neʼebé diʼak. Tan neʼe, kontinua fó sai Ita-nia hakarak no sentimentu ba nia. (Sal 62:8) Halo orasaun atu husu pasiénsia no matenek. (Tgo 1:5) Irmaun joven ida naran João c husi Estadus Unidus esplika saida deʼit mak nia temi iha ninia orasaun: “Haʼu hatete ba Jeová kona-ba hahalok neʼebé haʼu hakarak husi haʼu-nia pár. Haʼu halo orasaun atu hetan oportunidade hodi bele hasoru pár neʼebé diʼak. Haʼu mós husu Jeová atu ajuda haʼu haburas hahalok diʼak neʼebé sei ajuda haʼu atu sai laʼen neʼebé diʼak.” Irmán ida naran Tanya husi rai-Sri Lanka hatete: “Bainhira haʼu buka daudaun pár, haʼu husu Jeová atu ajuda haʼu nafatin laran-metin, hanoin pozitivu, no kontente.” Maski Ita labele hetan kedas pár neʼebé diʼak, maibé Jeová promete atu kontinua tau matan ba Ita iha dalan fíziku no emosaun.—Sal 55:22.
5. Bainhira mak ema Kristaun neʼebé klosan bele hasoru irmaun ka irmán klosan neʼebé hadomi Jeová? (1 Korinto 15:58) (Haree mós foto.)
5 Bíblia anima ita atu “sai badinas nafatin iha Naʼi nia serbisu”. (Lee 1 Korinto 15:58.) Bainhira Ita okupadu iha Jeová nia serbisu no gasta tempu hamutuk ho irmaun-irmán oioin, neʼe sei halo Ita sente kontente no mós hetan oportunidade atu hasoru irmaun ka irmán klosan neʼebé fokus atu serbí Jeová. Nuʼudar Ita hakaʼas an atu halo Jeová kontente, Ita mós sei sente kontente neʼebé loos.
Se Ita kontinua okupadu hodi serbí Jeová no uza tempu hamutuk ho ema Kristaun oioin, karik Ita sei hasoru ema neʼebé diʼak atu sai Ita-nia pár (Haree parágrafu 5)
6. Bainhira ema Kristaun klosan ida buka pár, nia presiza hanoin-hetan saida?
6 Maibé Ita presiza kuidadu atu la husik Ita-nia hakarak atu buka namora sai fali buat neʼebé importante liu iha Ita-nia moris. (Flp 1:10) Kontente neʼebé loos, la depende ba Ita kaben ka la kaben, maibé neʼe depende ba Ita-nia relasaun diʼak ho Jeová. (Mt 5:3) Nuʼudar klosan, Ita iha oportunidade barak atu aumenta liután Ita-nia serbisu ba Jeová. (1 Kor 7:32, 33) Tan neʼe, Ita hakarak uza didiʼak tempu neʼe. Irmán ida naran Jessica husi Estadus Unidus neʼebé kaben bainhira nia besik tinan 40, hatete: “Bainhira klosan, haʼu kontinua okupadu iha serbisu haklaken, no neʼe ajuda haʼu atu sente kontente maski haʼu hakarak atu kaben.”
UZA TEMPU ATU BUKA-HATENE DIDIʼAK EMA NEʼEBÉ ITA GOSTA
7. Tanbasá matenek atu buka-hatene didiʼak ema ida antes fó sai Ita-nia sentimentu ba nia? (Provérbios 13:16)
7 Oinsá se Ita hanoin katak Ita hetan ona ema ida neʼebé diʼak atu sai Ita-nia pár? Ita presiza fó sai kedas Ita-nia sentimentu ba nia ka lae? Bíblia hatete katak ema neʼebé matenek buka koñesimentu antes halo buat ruma. (Lee Provérbios 13:16.) Tan neʼe, antes fó sai Ita-nia sentimentu ba ema neʼe, matenek atu uza tempu balu hodi buka-hatene didiʼak kona-ba ninia hahalok. Irmaun Aschwin husi rai-Olanda hatete: “Sentimentu bele mosu lalais no mós bele lakon lalais deʼit. Se ita uza tempu atu buka-hatene didiʼak kona-ba ema ida, neʼe sei ajuda ita atu la hahú namora ho ema ida tanba deʼit ita-nia sentimentu neʼebé temporáriu.” Liután neʼe, bainhira Ita buka-hatene didiʼak ema neʼe, karik Ita sei rekoñese katak ema neʼe la diʼak atu sai Ita-nia pár.
8. Oinsá mak ema neʼebé klosan bele buka-hatene didiʼak kona-ba ema neʼebé bele sai ninia pár? (Haree mós foto.)
8 Oinsá mak Ita bele buka-hatene didiʼak kona-ba ema ida? Bainhira Ita tuir reuniaun ka ransu hamutuk, Ita bele nota buat balu kona-ba ema neʼe nia hahalok, ninia relasaun ho Jeová, no toman sira. Nia habelun ho ema hanesan saida? No nia koʼalia kona-ba saida? (Lc 6:45) Nia iha planu neʼebé hanesan ho Ita ka lae? Karik Ita bele koʼalia ho katuas sira iha ninia kongregasaun ka ema Kristaun maduru neʼebé koñese nia ho didiʼak. (Prov 20:18) Karik Ita bele husu kona-ba ninia reputasaun no hahalok sira. (Rute 2:11) Nuʼudar Ita buka-hatene didiʼak kona-ba nia, kuidadu atu la halo nia sente la diʼak. Respeitu ninia sentimentu, privasidade, no fó liberdade ba nia.
Antes fó sai Ita-nia sentimentu, uza tempu atu buka-hatene didiʼak kona-ba ema neʼe (Haree parágrafu 7-8)
9. Antes hakbesik ba ema neʼebé bele sai Ita-nia pár, Ita presiza fiar kona-ba saida?
9 Ba tempu hira mak Ita presiza buka-hatene didiʼak kona-ba ema neʼe antes fó sai Ita-nia sentimentu? Se Ita lalais atu hakbesik ba ema ida, karik nia bele hanoin katak Ita la hanoin uluk antes atu foti desizaun. (Prov 29:20) Maibé, se ema neʼe nota ona katak Ita gosta nia, no Ita hein ba tempu kleur, karik nia sei hanoin katak Ita demora atu foti desizaun. (Ecle 11:4) Hanoin-hetan, antes atu hakbesik ba ema ida, Ita la presiza deside nanis katak Ita sei kaben duni ho nia. Maibé Ita presiza fiar katak Ita prontu duni atu kaben, no mós fiar katak ema neʼe bele sai duni pár neʼebé diʼak ba Ita.
10. Saida mak Ita presiza halo se Ita nota katak ema ida gosta Ita, maibé Ita la interese atu namora ho nia?
10 Oinsá se Ita nota katak ema ida gosta Ita? Se Ita la interese atu namora ho nia, koko hatudu ida-neʼe ho klaru liuhusi Ita-nia hahalok. Se Ita lakohi namora ho ema neʼe, no Ita halo nia hanoin katak Ita hakarak atu namora ho nia, neʼe la hatudu domin.—1 Kor 10:24; Éf 4:25.
11. Se Ita atu ajuda buka pár ba ema seluk, saida mak Ita presiza hanoin didiʼak?
11 Iha nasaun balu, karik inan-aman, família ka belun mak buka pár ba ema neʼebé klosan, no tuirmai fó oportunidade ba sira atu haree se sira hakarak namora ka lae. Se ema ruma husu Ita atu ajuda buka pár, diʼak atu hanoin kona-ba saida mak sira naʼin-rua hakarak no presiza. Se Ita hanoin katak karik ema neʼe bele sai pár neʼebé diʼak ba Ita-nia kolega, ka família ida, buka-hatene didiʼak kona-ba ema neʼe nia hahalok sira, no importante liu mak ninia relasaun diʼak ho Jeová tanba ida-neʼe mak folin-boot liu fali osan, edukasaun, no situasaun moris. Maibé hanoin-hetan, irmaun ka irmán neʼebé klosan mak tenke foti desizaun kona-ba atu kaben ka lae.—Gal 6:5.
KOMESA NAMORA
12. Se Ita hakarak atu namora ho ema ida, oinsá mak Ita bele fó sai ba ema neʼe?
12 Se Ita hakarak hahú namora ho ema ida, oinsá mak Ita bele fó sai Ita-nia sentimentu? d Ita bele halo arranju atu koʼalia ho ema neʼe iha fatin públiku ka liuhusi telefone. Fó sai ho klaru kona-ba Ita-nia hakarak. (1 Kor 14:9) Se presiza, fó tempu ba nia atu hanoin kona-ba oinsá mak nia sei hatán. (Prov 15:28) No se ema neʼe lakohi namora ho Ita, hatudu respeitu ba ninia desizaun.
13. Ita bele halo saida se ema ruma husu atu namora ho Ita? (Koloso 4:6)
13 Oinsá se ema ruma husu atu namora ho Ita? Karik nia presiza aten-brani atu husu Ita. Tan neʼe, hatudu laran-diʼak no respeitu. (Lee Koloso 4:6.) Se Ita presiza tempu atu foti desizaun, fó-hatene ida-neʼe ba nia. Maski nuneʼe, koko la demora atu fó resposta ba nia. (Prov 13:12) Se Ita lakohi namora ho nia, fó sai ba nia ho laran-diʼak no klaru. Haree toʼok saida mak irmaun Hans husi rai-Áustria halo bainhira irmán ida husu nia atu namora. Nia hatete: “Haʼu fó sai haʼu-nia desizaun ho laran-diʼak no klaru. Tanba haʼu lakohi fó esperansa ba nia, tan neʼe haʼu hatán kedas lae. Haʼu mós kuidadu atu la halo no koʼalia buat neʼebé bele halo nia sente katak haʼu troka haʼu-nia hanoin.” Maibé, se Ita hakarak namora ho ema neʼe, fó-hatene ba nia no koʼalia hamutuk kona-ba oinsá imi hakarak halaʼo imi-nia tempu namora. Karik buat neʼebé imi hakarak mak la hanesan, tanba neʼe depende ba kultura no buat seluk tan.
OINSÁ ATU APOIA EMA KRISTAUN NEʼEBÉ KLOSAN?
14. Oinsá mak ita bele apoia ema Kristaun neʼebé klosan liuhusi ita-nia liafuan?
14 Oinsá mak ita hotu bele apoia ema Kristaun klosan neʼebé hakarak kaben? Dalan ida mak hodi kuidadu kona-ba buat neʼebé ita koʼalia. (Éf 4:29) Ita bele husu ba ita-nia an: ‘Haʼu goza ema neʼebé hakarak atu kaben ka lae? Bainhira haʼu haree irmaun klosan no irmán klosan ida koʼalia hamutuk, haʼu sei hanoin kedas katak sira gosta malu ka lae?’ (1 Tim 5:13) Ita labele halo ema Kristaun klosan ida sente katak sira-nia moris la kompletu tanba la kaben. Irmaun Hans neʼebé temi ona ohin hatete: “Irmaun balu husu: ‘Tanbasá ó la kaben, ó-nia idade aumenta ba beibeik’. Liafuan sira hanesan neʼe halo klosan sira sente ladún iha folin. No neʼe halo sira hanoin katak karik sira presiza kaben.” Tan neʼe, diʼak liu buka oportunidade atu gaba ema Kristaun sira neʼebé klosan!—1 Tes 5:11.
15. (a) Tuir prinsípiu iha Roma 15:2, ita presiza hanoin-hetan saida antes ajuda ema ida atu buka pár? (Haree mós foto.) (b) Ita bele aprende saida husi vídeo neʼe?
15 Oinsá se ita hanoin katak irmaun ida no irmán ida mak diʼak atu kaben? Bíblia anima ita atu hanoin ema seluk nia sentimentu. (Lee Roma 15:2.) Ema klosan balu lakohi atu ema seluk fó koñese sira ba klosan seluk, no ita presiza respeitu sira-nia hakarak. (2 Tes 3:11) Karik ema balu kontente atu hetan ajuda husi ema seluk, maibé ita labele ajuda se sira la husu ba ita. e (Prov 3:27) Klosan balu hakarak atu ema seluk mak halo arranju hodi nuneʼe sira bele ransu hamutuk. Irmán klosan ida naran Lydia husi rai-Alemaña hatete: “Ita bele konvida irmaun-irmán sira ba ita-nia uma, inklui irmaun no irmán neʼebé ita hanoin katak diʼak atu namora, hodi sira bele iha oportunidade atu ransu no tuirmai husik sira mak halo desizaun.”
Hodi ransu nuʼudar grupu bele fó oportunidade ba ema Kristaun neʼebé klosan atu hasoru malu (Haree parágrafu 15)
16. Ema Kristaun neʼebé klosan presiza hanoin-hetan saida?
16 Ita hotu maski klosan ka kaben-naʼin bele moris ho kontente! (Sal 128:1) Entaun, se Ita hakarak atu kaben maibé seidauk hetan ema neʼebé diʼak ba Ita, kontinua fokus ba Ita-nia serbisu ba Jeová. Irmán ida naran Sin Yi husi Makau, hatete: “Se ita kompara ita-nia tempu klosan ho tempu neʼebé ita sei gasta hamutuk ho ita-nia pár iha Paraízu, ita-nia tempu klosan mak badak deʼit. Tan neʼe, hafolin no uza didiʼak tempu neʼe.” Maibé oinsá se Ita hetan ema ida neʼebé diʼak atu sai Ita-nia pár no komesa namora? Iha lisaun tuirmai, ita sei koʼalia kona-ba oinsá mak Ita bele halo desizaun neʼebé matenek durante tempu namora.
KNANANUK 137 Feto fiar-naʼin sira
a Atu ajuda Ita deside se Ita prontu ona atu namora ka lae, haree informasaun iha jw.org “Namora—Parte 1: Haʼu prontu atu namora ka lae?”
b ESPLIKASAUN BA FRAZE: Iha lisaun neʼe no lisaun tuirmai, liafuan “namora” refere ba tempu neʼebé mane no feto ida uza atu koñese malu hodi bele deside se diʼak ba sira atu kaben ka lae. Tempu namora komesa bainhira mane no feto ida fó sai ho klaru katak sira interese ba malu no neʼe kontinua toʼo sira deside atu kaben ka hapara sira-nia relasaun.
c Naran balu laʼós naran neʼebé loos.
d Iha kultura balu, baibain irmaun ida mak hakbesik ba irmán ida atu husu namora. Maski nuneʼe, irmán ida mós bele hili atu hakbesik ba irmaun ida no husu namora. (Rute 3:1-13) Atu hetan informasaun liután, haree informasaun “Kaum Muda Bertanya . . . Bagaimana Cara Menyatakan Perasaan Saya Kepadanya?” iha Sedarlah! 22 Outubru 2004.
e Haree iha jw.org vídeo Ema neʼebé luta makaʼas hodi defende fiar—Ema Kristaun neʼebé klosan.
