Problema ho saúde mentál iha mundu tomak

LOKE

“Haʼu sempre sente laran-susar maski la iha razaun atu hanoin barak.”

“Kuandu haʼu sente kontente tebes, tuirmai haʼu komesa hanoin barak. Haʼu hatene duni katak kuandu haʼu-nia sentimentu sai diʼak tebes, lakleur deʼit sai aat fali.”

“Haʼu koko atu fokus deʼit ba loron ohin, maibé dala ruma haʼu hanoin kona-ba buat seluk la para.”

Komentáriu sira-neʼe mak husi ema neʼebé luta hasoru problema ho saúde mentál. Ita ka ema ruma neʼebé Ita hadomi mós hasoru problema hanesan neʼe ka lae?

Favór fiar bá katak Ita la mesak. Ema barak ohin loron hetan problema ho saúde mentál, karik neʼe bele kona sira rasik ka ema neʼebé sira hadomi.

Agora mak tempu neʼebé “iha problema barak neʼebé susar atu tahan”, no neʼe halo ita estrese. (2 Timóteo 3:1) Tuir peskiza husi WHO, iha mundu tomak, ema ida husi naʼin-ualu mak iha problema ho saúde mentál. Iha tinan 2020, pandemia COVID-19 halo ema neʼebé laran-taridu aumenta porsentu 26, no ema neʼebé moras depresaun aumenta porsentu 28 se kompara ho tinan 2019.

Importante atu hatene katak ema barak hasoru problema ho laran-taridu no depresaun, maibé importante liu mak oinsá Ita ka ema neʼebé Ita hadomi bele moris kontente.

Saida mak saúde mentál?

Kuandu Ita iha saúde mentál neʼebé diʼak, Ita sente kontente no bele halaʼo moris ho didiʼak. Ita bele tahan estrese loron-loron nian, serbisu ho diʼak, no haksolok ho Ita-nia moris.

Problema saúde mentál . . .

NEʼE LAʼÓS tanba Ita mak ema fraku.
NEʼE MAK kondisaun médiku neʼebé halo ema estrese tebes no labele kontrola hanoin, emosaun, no hahalok.
Bele halo susar ba ema atu iha relasaun diʼak ho ema seluk no halaʼo moris loron-loron.
Bele afeta ema naran deʼit, la depende ba idade, kultura, rasa, relijiaun, edukasaun, riku ka kiak.

Hetan ajuda ba problema ho saúde mentál

Se Ita ka ema neʼebé Ita hadomi mak iha mudansa boot kona-ba hahalok, labele toba-dukur, troka toman kona-ba han, sente laran-taridu ka triste ba tempu kleur, karik presiza hetan ajuda husi ema profisionál atu buka-hatene problema nia hun no hetan tratamentu. Maibé iha neʼebé mak ita bele buka ajuda?

Jesus Kristu mak ema neʼebé matenek liu hotu, no nia dehan: “Ema neʼebé isin-diʼak la presiza doutór, maibé ema moras presiza.” (Mateus 9:12) Ema neʼebé iha problema saúde bele hetan tratamentu médiku ka ai-moruk neʼebé diʼak atu bele hamenus ninia sintoma, no neʼe bele ajuda nia atu bele moris kontente. Se iha sintoma neʼebé sériu ka tempu kleur, diʼak liu lalais atu hetan tratamentu. a

Maski Bíblia laʼós livru médiku, maibé ninia prinsípiu sira bele ajuda ita atu iha saúde mentál neʼebé diʼak. Ami konvida Ita atu lee informasaun tuirmai no buka-hatene oinsá mak Bíblia bele ajuda ita tahan hasoru problema ho saúde mentál.

a Livru Haklaken la halo promosaun kona-ba tratamentu espesífiku ruma. Ema ida-idak mak presiza tetu didiʼak no foti desizaun rasik kona-ba tratamentu neʼebé nia hetan.