LUZIA NIA AIN SORIN SAI KUDEʼIK. Bainhira nia kiʼik, nia hetan moras póliu, neʼe mak moras neʼebé bele hadaʼet no estraga sistema nervu iha ema nia isin-lolon. Kuandu nia tinan 16, Luzia nia patraun feto hatete: “Maromak fó kastigu ba ó hodi halo ó-nia ain-kudeʼik tanba ó la halo tuir no trata aat ó-nia inan.” Tinan barak liutiha, Luzia hanoin-hetan nafatin patraun nia liafuan no ninia sentimentu triste.

KUANDU DAMARIS HETAN KANKRU IHA KAKUTAK, ninia aman husu ba nia: “Saida mak ó halo ona toʼo ida-neʼe akontese ba ó? Ó halo ona sala boot ruma karik, tan neʼe mak Maromak fó kastigu ba ó.” Liafuan sira-neʼe halo Damaris sente triste tebetebes.

Durante tinan atus ba atus, ema barak fiar katak moras mak kastigu husi Maromak. Tuir livru Manners and Customs of Bible Lands hatete ema barak iha Jesus nia tempu fiar katak “ema hetan moras tanba ema neʼe ka ninia família mak halo sala ruma no tan neʼe Maromak fó kastigu ba nia”. Livru Medieval Medicine and the Plague esplika katak tinan atus ba atus depois Kristu moris iha rai, “ema balu fiar katak Maromak uza moras-peste atu fó kastigu ba ema”. Maizumenus tinan 600 liubá, ema millaun ba millaun iha Europa mate tanba moras-peste, neʼe katak Maromak mak fó kastigu ba ema aat sira ka lae? Ka moras-peste neʼe mosu tanba baktéria ruma, hanesan sientista sira deskobre ona? Ema balu karik hanoin, Maromak uza duni moras atu fó kastigu ba ema ka lae? *

HANOIN TOʼOK: Se moras no terus mak kastigu husi Maromak, tanbasá mak Jesus kura ema neʼebé moras? Neʼe katak Jesus kontra Maromak nia justisa ka lae? (Mateus 4:23, 24) Jesus nunka kontra buat neʼebé Maromak halo. Jesus hatete: “Haʼu sempre halo buat neʼebé fó ksolok ba nia”, no “haʼu halo tuir daudaun buat neʼebé Aman haruka haʼu atu halo”.—João 8:29; 14:31.

Bíblia koʼalia ho klaru katak Jeová mak Maromak neʼebé “sempre hatudu justisa”. (Deuteronómio 32:4) Porezemplu, Maromak nunka oho ema atus ba atus hodi halo aviaun ida monu tan deʼit atu fó kastigu ba ema ida. Fiar-naʼin ida naran Abraão hatete katak Maromak sei la ‘halakon ema laran-loos hamutuk ho ema aat’, no nia “sei nunka halo ida-neʼe”. (Génesis 18:23, 25) Bíblia mós hatete katak “Maromak la halo buat aat” no “nunka halo sala”.—Job 34:10-12.

Bainhira ita hetan terus, neʼe laʼós tanba Maromak mak fó kastigu ba ita. Jesus esplika kona-ba neʼe ho klaru bainhira nia no ninia dixípulu sira haree mane ida neʼebé moris mai matan-delek ona. “Ninia dixípulu sira husu nia: ‘Mestre, mane neʼe mak sala, ka ninia inan-aman mak sala, hodi nuneʼe nia moris mai matan-delek ona?’ Jesus hatán: ‘Laʼós mane neʼe no laʼós ninia inan-aman mak sala, maibé liuhusi ninia situasaun neʼe mak ema bele haree Maromak nia serbisu.’”—João 9:1-3.

Iha tempu neʼebá ema barak hanoin sala katak moras mak kastigu husi Maromak, tan neʼe Jesus nia dixípulu sira karik hakfodak kuandu Jesus hatete katak laʼós tanba mane neʼe ka ninia inan-aman nia sala mak nia matan-delek. Jesus kura mane neʼe, no iha tempu hanesan nia mós hadiʼa  ema nia hanoin neʼebé sala. (João 9:6, 7) Ohin loron, ema neʼebé terus tanba moras todan ruma bele sente kmaan tanba hatene katak terus la mai husi Maromak.

Eskritura neʼebé fó kmaan mai ita

• “Ema labele koko Maromak no nia mós la koko ema ida ho buat neʼebé aat.” (TIAGO 1:13) Tuir loloos, lakleur tan buat aat hotu neʼebé kona ema durante tinan atus ba atus hanesan moras, terus no mate sei lakon mohu.

• Jesus Kristu “kura sira hotu neʼebé moras”. (MATEUS 8:16) Hodi kura ema hotu neʼebé mai hasoru nia, Maromak nia Oan-Mane hatudu buat neʼebé Maromak nia Ukun sei halo ba ema iha mundu tomak.

• “Nia [Maromak] sei hamaran sira-nia matan-been hotu husi sira-nia matan, mate sei la iha tan, no ema sei la triste tan ka tanis ka sente moras. Buat sira neʼebé uluk nian lakon tiha ona.”—APOKALIPSE 21:3-5.

Tanbasá iha terus no susar barak? Ema hanoin kona-ba pergunta neʼe durante tinan atus ba atus. Se laʼós Maromak mak hamosu terus, sé mak hamosu ida-neʼe? Informasaun tuirmai sei hatán ba pergunta neʼe.