Maromak fó prezente ida neʼebé furak, neʼe mak oportunidade atu komunika no fó sai ita-nia hanoin hotu ba nia liuhusi orasaun. Profeta David halo orasaun: “Oh Maromak neʼebé rona ba orasaun, ema oioin sei mai hakbesik Ita.” (Salmo 65:2) Maibé oinsá mak ita bele halo orasaun atu Maromak bele rona no fó bensaun?

Liuhusi Ita-nia orasaun privadu, ita bele ‘fakar sai ita-nia laran iha [Maromak] nia oin’, no fó sai Ita-nia hanoin hotu. (Salmo 62:8) Maromak hafolin tebes orasaun sira neʼebé ema hatoʼo ho laran.

Maski Maromak iha títulu barak, maibé nia iha naran rasik ida deʼit. “Haʼu mak Jeová. Neʼe mak haʼu-nia naran.” (Isaias 42:8) Naran Jeová mosu maizumenus dala 7.000 iha Eskritura Sagrada. Profeta barak mak halo orasaun hodi temi Maromak nia naran neʼe. Abraão hatete: “Favór ida Jeová, . . . husik haʼu koʼalia tan [ho Ita].” (Génesis 18:30) Ita mós tenke uza Maromak nia naran, Jeová, bainhira halo orasaun.

Maromak komprende ita-nia hanoin no sentimentu maski ita uza língua naran deʼit. Ninia Liafuan fó fiar mai ita: “Maromak la todan ba sorin, no iha nasaun hotu, Maromak simu ema hotu neʼebé hamtaʼuk nia no halo buat neʼebé loos.”—Apóstolu 10:34, 35.

Maski nuneʼe, atu bele simu bensaun husi Maromak, la toʼo atu halo deʼit orasaun. Iha informasaun tuirmai, ita sei haree saida mak ita presiza halo tan.