Saida mak determina Ita-nia futuru?
Ema barak fiar katak kbiit neʼebé labele haree mak kontrola sira-nia futuru. Tan neʼe, sira halo buat oioin neʼebé tuir sira-nia hanoin bele hadiʼa sira-nia futuru.
SAIDA MAK EMA BARAK FIAR
ASTROLOJIA: Ema balu fiar katak fitun-lubun sira mak determina sira-nia futuru husi tempu neʼebé sira moris mai. Sira buka astrolojia ka oróskopu atu hatene kona-ba sira-nia futuru no halo desizaun iha sira-nia moris loroloron.
FENG SHUI: Ema balu fiar katak se sira harii sira-nia uma ho modelu espesífiku ruma, neʼe sei lori susesu ba sira-nia moris. Lon Wing, * neʼebé hela iha Honkóng, hatete: “Feng shui nia siʼikdór ida hatete mai haʼu katak tau fatuk-kristál iha fatin neʼebé loos iha haʼu-nia loja sei ajuda haʼu atu hetan osan barak.”
ADORA BEIʼALA: Ema balu fiar katak atu bele hetan protesaun no bensaun, sira tenke halo kontente sira-nia beiʼala ka maromak oioin. Van, neʼebé hela iha Vietname, hatete: “Haʼu fiar katak hodi hamulak ba haʼu-nia beiʼala, haʼu no haʼu-nia oan sira bele hetan moris neʼebé diʼak agora no iha futuru.”
REENKARNASAUN: Ema balu fiar katak kuandu ema ida mate, nia sei sai fali kriatura seluk, no neʼe akontese fila-fila. Sira fiar katak buat diʼak ka aat neʼebé sira hasoru agora mak rezultadu husi sira-nia hahalok uluk.
Ema barak dehan sira la fiar buat sira-neʼe, maibé nafatin buka-hatene futuru liuhusi haree liman, matan-dook, oróskopu ka haree manu aten. Sira hanoin katak buat sira-neʼe karik bele ajuda sira.
REZULTADU MAK SAIDA?
Sira neʼebé fiar no halo buat sira-neʼe hetan duni moris neʼebé diʼak ka lae?
Haree toʼok mane ida naran Hào husi Vietname nia esperiénsia. Nia uza astrolojia, feng sui, no adora beiʼala atu hetan ajuda. Nia hetan duni susesu ka lae? Nia hatete katak, nia lakon ninia osan, monu ba debe, hasoru problema família, no depresaun.
Nuneʼe mós ho Qiuming husi Taiwán neʼebé uluk fiar ba sorte, astrolojia, reenkarnasaun, feng sui, no adora beiʼala sira. Kuandu nia aprende tiha kona-ba tópiku sira-neʼe ho didiʼak, nia dehan: “Haʼu rekoñese katak hanorin no toman sira-neʼe kontra malu no halo konfuzaun. Haʼu haree buat neʼebé astrólogu fó sai dala barak la loos. No kona-ba reenkarnasaun, se ita labele hanoin hetan ita-nia moris antes neʼe, oinsá mak ita bele halo mudansa no halo diʼak liután ita-nia moris tuirmai?”
“Haʼu rekoñese katak hanorin no toman sira-neʼe kontra malu no halo konfuzaun.”—QIUMING, TAIWÁN
Hanesan Hào, Qiuming no ema barak tan komprende ona katak laʼós sorte, fitun ka beiʼala neʼebé mate ona ka reenkarnasaun mak determina ita-nia futuru. Maibé neʼe katak ita labele hadiʼa ita-nia futuru ka lae?
Ema barak sente katak edukasaun boot no rikusoin mak sai nuʼudar garantia ba futuru neʼebé diʼak. Ema sira hanesan neʼe hetan ona rezultadu saida?
^ par. 5 Naran balu laʼós naran neʼebé loos.
^ par. 16 Liafuan neʼe foti husi Bíblia iha Galásia 6:7. Liafuan neʼe hanesan ho lia-dadolin iha parte Ázia neʼebé dehan: “Kuda melon, Ita sei hetan melon. Kuda koto, Ita sei hetan koto.”
Karik Ita sei gosta
LIVRU HAKLAKEN
Astrolojia no siʼik futuru—Dalan atu hatene futuru?
Ita bele tau fiar ba dalan sira-neʼe atu buka-hatene ita-nia futuru ka lae?
LIVRU HAKLAKEN
Bíblia nia hanorin kona-ba mate
Bainhira ita mate parte ida husi ita-nia isin sei moris hela ka lae? Ita iha klamar ka lae? Ema neʼebé mate bá neʼebé?
