Duarte no Madalena * sente kontente tanba sira-nia oan-feto no ninia família vizita sira ba loron balu. Uluk Madalena serbisu nuʼudar koziñeiru. Tanba ninia bei-oan sira gosta tebes atu han makaraun kahur ho keiju, kuandu ninia oan feto no ninia bei-oan sira atu fila nia teʼin hahán neʼe.

Ema hotu tuur haleʼu meza, Madalena hatuur sanan iha meza. Kuandu nia loke sanan-matan, nia hakfodak tanba iha sanan laran só iha deʼit keiju manas neʼebé nabeen. Madalena haluha atu tau makaraun.

Maski ita mak joven hela ka idade ona, iha esperiénsia ka la iha esperiénsia, ita hotu bele halo sala. Karik ita halo sala liuhusi ita-nia liafuan ka ita-nia hahalok, ka ita haluha atu halo buat ruma. Tanbasá mak ita halo sala? Saida mak ita bele halo atu hadiʼa ida-neʼe? Ita bele hasees an husi sala ka lae? Hodi hatene Maromak nia hanoin kona-ba sala, neʼe sei ajuda ita atu hatán pergunta sira-neʼe.

Bainhira ita halo buat neʼebé diʼak, ita kontente atu simu gaba, tanba ita sente katak ita merese duni. Se nuneʼe, bainhira ita halo sala, maski la ho neon ka ema seluk la haree, ita mós tenke rekoñese ita-nia sala, loos ka lae? Atu halo hanesan neʼe, ita presiza hahalok haraik-an.

Se ita foti-an, ita sei koko buka razaun oioin atu defende ita-nia sala, duun fali ema seluk ka nega sala neʼebé ita halo. Hahalok hanesan neʼe sei lori rezultadu neʼebé aat no ita sei la rezolve ita-nia problema. Maski ita koko subar ita-nia sala, ita presiza hanoin-hetan katak ikusmai “ita ida-idak sei hatán ba Maromak kona-ba ita-nia hahalok rasik”.—Roma 14:12.

Maromak komprende sala neʼebé ita halo. Livru Salmos hatudu katak Maromak mak “laran-sadiʼa no laran-diʼak”, nia “sei nunka buka deʼit sala, no nia sei la sai hirus ba nafatin”. Nia hatene no komprende katak ita la perfeitu no iha fraku, no nia mós “hanoin-hetan katak ita mak rai-rahun deʼit”.—Salmo (Mazmur) 103:8, 9, 14.

Laʼós neʼe deʼit, hanesan aman neʼebé laran-sadiʼa, Maromak mós hakarak ita atu iha hanoin hanesan nia kona-ba sala. (Salmo [Mazmur] 130:3) Kuandu ita ka ema seluk halo sala, Maromak nia Liafuan bele fó matadalan barak atu ajuda ita.

Kuandu ema halo sala, baibain sira gasta forsa no tempu atu duun ema seluk ka buka razaun oioin atu defende sira-nia an. Porezemplu se Ita-nia liafuan hakanek ema seluk, duké buka razaun oioin atu defende Ita-nia an, diʼak atu husu deskulpa, hadiʼa Ita-nia sala no kontinua iha relasaun neʼebé diʼak. Ita halo ona sala ba ema seluk ka ba  Ita-nia an rasik ka lae? Se Ita fó sala ba Ita-nia an ka ba ema seluk kona-ba situasaun neʼe, ida-neʼe sei hamosu estrese no problema sei sai aat liután. Entaun diʼak liu, atu aprende husi sala neʼebé Ita halo, hadiʼa Ita-nia sala no haluha deʼit.

Kuandu ema seluk halo sala, fasil ba ita atu la kontente ho ida-neʼe. Maibé diʼak liu atu halo tuir Jesus Kristu nia konsellu neʼebé dehan: “Buat hotu neʼebé imi hakarak ema halo ba imi, imi mós tenke halo ba sira.” (Mateus 7:12) Bainhira Ita halo sala, maski kiʼik deʼit, Ita hakarak ema hatudu pasiénsia ba Ita ka haluha deʼit sala neʼebé Ita halo. Se nuneʼe, tanbasá Ita mós la koko atu halo hanesan neʼe?—Éfeso 4:32.

Disionáriu ida esplika katak baibain sala mosu tanba “hanoin sala, la hatene situasaun ho loloos, ka la tau atensaun didiʼak”. Ita presiza rekoñese katak dala ruma ita hotu hatudu hahalok sira-neʼe. Maski nuneʼe, hodi hanoin kona-ba prinsípiu balu husi Bíblia bele ajuda ita atu la halo sala barak.

Prinsípiu ida mak iha Provérbios (Amsal) 18:13, neʼebé dehan: “Kuandu ema ida hatán kedas antes nia rona buat hotu, neʼe mak hahalok beik no sei hamoe nia an rasik.” Sin, hodi fó tempu atu rona istória neʼebé kompletu, neʼe bele ajuda Ita atu hanoin uluk antes Ita koʼalia ka halo buat ida. Hodi tau atensaun didiʼak, Ita bele hatene situasaun ho loloos, no neʼe ajuda Ita atu la hanoin sala no la halo sala.

Bíblia nia prinsípiu seluk hatete: “Hakaʼas imi-nia an atu nuneʼe, se bele karik, imi bele moris iha dame ho ema hotu.” (Roma 12:18) Hakaʼas an atu halo buat neʼebé lori dame no koko atu komprende malu. Kuandu Ita serbisu ho ema seluk, koko atu hanoin sira, hatudu respeitu, gaba no anima sira. Neʼe sei ajuda Ita atu haluha deʼit ema nia liafuan ka hahalok neʼebé hakanek Ita. No se problema boot mosu, Ita bele hatudu laran-diʼak no mós rezolve ida-neʼe ho didiʼak.

Tuir loloos, Ita bele aprende lisaun diʼak husi Ita-nia sala, no haree ida-neʼe nuʼudar oportunidade atu hadiʼa Ita-nia hahalok. Karik Ita presiza atu haburas hahalok sira hanesan pasiénsia, laran-diʼak, kontrola an, laran-maus, dame no domin. (Galásia 5:22, 23) No ita mós bele aprende atu la halo tan sala neʼebé hanesan iha tempu seluk. Entaun, koko atu la hanoin demais ba sala neʼebé Ita halo. Hodi la sériu demais, neʼe sei ajuda Ita atu hamenus problema.

Hodi hatene Maromak nia hanoin kona-ba sala, neʼe sei ajuda ita atu hetan benefísiu. Ita sei iha dame ho ema seluk no ho ita-nia an rasik. Se ita hakaʼas an atu aprende husi sala neʼebé ita halo, ita sei sai matenek no fasil ba ema seluk atu hakbesik ba ita. Ita mós sei la triste lalais ka hanoin negativu kona-ba ita-nia an rasik. Hodi hanoin-hetan katak ema seluk mós halo sala hanesan ita, neʼe sei ajuda ita atu komprende sira. Se ita halo tuir Maromak, hodi hatudu domin no lalais atu fó perdua, ita bele hetan benefísiu barak.—Koloso 3:13.

Hanoin-hetan Madalena neʼebé temi ona iha parágrafu primeiru? Bainhira nia teʼin ladiʼak, ninia família triste no hirus ka lae? Tuir loloos lae. Sira hotu inklui Madalena sente neʼe komik loos no sira kontinua han maski la iha makaraun. Tinan barak liutiha, Madalena nia bei-oan sira konta fali istória komik neʼe ba sira-nia oan rasik no sira mós konta kona-ba tempu neʼebé sira hamutuk ho sira-nia avó. Ba sira, neʼe mak sala kiʼik deʼit.