IHA Bíblia nia tempu atan neʼebé serbí nuʼudar administradór iha responsabilidade atu tau matan ba ema seluk nia uma ka sasán. Liafuan Ebraiku no Gregu neʼebé tradús nuʼudar “administradór” dala ruma refere ba ulun-naʼin ka ema neʼebé simu knaar atu tau matan ba uma.

Bainhira Jacob nia oan-mane José sai atan iha rai-Ejitu, José simu knaar nuʼudar administradór neʼebé tau matan ba ninia naʼi nia uma. Tuir loloos, José nia naʼi “husik buat hotu neʼebé ninian ba José atu tau matan”. (Gén 39:2-6) Liutiha tempu balu bainhira José sai ukun-naʼin neʼebé forsa boot iha rai-Ejitu, nia hili administradór ida atu tau matan ba ninia uma rasik.—Gén 44:4.

Iha Jesus nia tempu, toʼos-naʼin sira baibain hela iha sidade dook husi sira-nia toʼos. Tan neʼe sira hili administradór atu tau matan ba atividade loroloron neʼebé serbisu-naʼin sira halo iha sira-nia toʼos.

Sé mak kumpre kritéria atu sai nuʼudar administradór? Iha apóstolu sira-nia tempu, matenek-naʼin ida husi Roma naran Columella dehan katak atan ida neʼebé simu knaar nuʼudar ulun-naʼin ka administradór tenke “hatene ona atu halo serbisu ho didiʼak”. Nia “tau matan no haree katak serbisu-naʼin sira halo sira-nia serbisu no nia la siʼak sira”. Matenek-naʼin neʼe mós dehan katak buat neʼebé importante ba administradór mak nia labele hanoin katak nia hatene buat hotu no la presiza aprende buat foun.

Bíblia uza administradór nia ezemplu no ninia serbisu atu hatudu kona-ba atividade balu neʼebé halaʼo iha kongregasaun Kristaun. Porezemplu, apóstolu Pedro anima ema Kristaun sira atu uza abilidade neʼebé Maromak fó ba sira atu “serbí malu nuʼudar atan [ka “administradór”, nota] diʼak neʼebé simu ona Maromak nia laran-diʼak neʼebé boot”.​—1 Ped 4:10.

Jesus mós uza administradór nia ezemplu iha ninia ai-knanoik iha Lucas 16:1-8. Liután neʼe, iha profesia kona-ba sinál neʼebé hatudu katak Jesus toʼo ona mai nuʼudar Liurai, Jesus fó konfiansa ba ninia dixípulu sira katak nia sei hili “atan laran-metin no matenek” ka “atan [ka “administradór neʼebé tau matan ba uma”, nota] neʼebé laran-metin no matenek”. Administradór nia knaar importante mak atu fó ai-han espirituál beibeik ba Kristu nia dixípulu sira durante tempu nia rohan. (Mt 24:45-47; Lc 12:42) Ita agradese tebes tanba bele simu ai-han espirituál neʼebé hametin ita-nia fiar neʼebé atan laran-metin prepara no fahe iha mundu tomak.