“Kontinua . . . fó perdua ba malu ho laran tomak maski ema halo buat ruma neʼebé hakanek imi-nia laran.”—KOLOSO 3:13.

Ita hotu halo sala. Karik ita hakanek ema seluk nia laran, ka ema seluk mak halo nuneʼe mai ita. Neʼe katak ita hotu presiza fó perdua ba malu. Kuandu ita fó perdua, ita sei la hirus tan ba ema neʼebé hakanek ita-nia laran. Ita labele “selu aat ho aat”, ka fó-hanoin beibeik ba ema neʼe kona-ba ninia sala no fraku. (Roma 12:17) Maibé oinsá se ita sente laran-kanek tebes no susar atu haluha kona-ba buat neʼebé akontese? Se nuneʼe, ita presiza hakbesik ba ema neʼe mesamesak no koʼalia ho respeitu kona-ba problema neʼe. Ita-nia hakarak mak atu halo dame, laʼós atu duun malu sé mak loos ka sala.—Roma 12:18.

“Ho haraik an hodi haree ema seluk boot liu fali imi.”—FILIPE 2:3.

Se ita haraik an no hatudu respeitu, ema seluk sei kontente ho ita. Sira hatene katak ita sei hatudu hahalok diʼak no hanoin sira-nia diʼak, no ita sei la hakanek sira-nia laran.  Maibé se ita hanoin ita mak diʼak liu fali sira, ka ema seluk tenke halo tuir deʼit ita-nia hakarak, ita sei hamosu problema no hirus malu. Ema sei la hakbesik ba ita, no ita sei la iha belun barak.

“Maromak la todan ba sorin, no iha nasaun hotu, Maromak simu ema hotu neʼebé hamtaʼuk nia no halo buat neʼebé loos.”—APÓSTOLU 10:34, 35.

Ita-nia Kriadór la haree ema balu diʼak liu fali ema seluk tan deʼit sira-nia nasaun, língua, riku, kiak, ka rasa. “Husi ema ida deʼit mak nia halo nasaun hotu.” (Apóstolu 17:26) Neʼe katak ema hotu mak família. Kuandu ita trata ema hotu ho dignidade no laran-diʼak, ita halo sira kontente, ita rasik mós kontente, no ita mós sei halo ita-nia Kriadór kontente.

‘Tau hahalok laran-maus nuʼudar imi-nia roupa.’—KOLOSO 3:12.

Kuandu ita hatudu laran-maus, ita halo ema seluk sente diʼak ho ita. Sira sente fasil atu koʼalia ho ita no korrije ita tanba sira hatene ita sei la hirus. No kuandu ema ida hirus ita, ita-nia resposta neʼebé mamar sei halo ema neʼe kalma. Provérbios 15:1 hatete: “Hatán ho liafuan mamar sei hatún hirus, maibé liafuan neʼebé makaʼas halo ema hirus liután.”

“Kontente liu atu fó duké simu.”—APÓSTOLU 20:35.

Ema barak ohin loron karak-teen no hanoin an deʼit. Maibé ita bele hetan kontente neʼebé loos se ita hatudu laran-luak. (Lucas 6:38) Ema laran-luak bele moris kontente tanba sira hadomi ema liu fali sasán. Domin hanesan neʼe book sira atu hatudu agradese no hafolin ema seluk neʼebé hatudu laran-luak ba sira. (Koloso 3:15) Husu ba Ita-nia an: ‘Haʼu hakarak hamutuk ho ema neʼebé karak-teen no la hatene hatudu agradese, ka hamutuk ho ema neʼebé laran-luak no hatudu agradese?’ Ita bele aprende saida? Hatudu hahalok neʼebé Ita hakarak ema seluk mós hatudu ba Ita.—Mateus 7:12.