MASKI Bíblia laʼós livru siénsia nian, maibé ninia informasaun kona-ba siénsia sempre loos. Mai ita hanoin kona-ba siklu bee nian no bebé neʼebé sei iha inan nia knotak.

SIKLU BEE NIAN

Bíblia hatete: “[Maromak] dada bee-turuk saʼe ba leten; abuabu sira-neʼe forma fali udan, tuirmai kalohan fakar tun udan.”—Jó (Ayub) 36:27, 28.

Bíblia fó sai hakat tolu kona-ba siklu bee nian. (1) Liuhusi loro-matan, Maromak “dada bee-turuk saʼe ba leten”. (2) Bee nia suar neʼebé saʼe ba leten forma kalohan. (3) Kalohan neʼe hatún udan ka jelu-rahun. Toʼo ohin loron, sientista sira seidauk komprende ho loloos kona-ba siklu bee nian. Bíblia mós husu: “Sé mak bele komprende kalohan sira neʼebé nahe tatuk malu?” (Jó [Ayub] 36:29) Ita-nia Kriadór hatene didiʼak kona-ba prosesu siklu bee nian, no fó sai informasaun neʼebé loos iha Bíblia laran. Buat neʼebé furak mak informasaun neʼe hakerek kleur antes sientista sira komesa komprende kona-ba siklu neʼe.

BEBÉ IHA INAN NIA KNOTAK

Maizumenus tinan 3.000 liubá, Liurai David hatete ba Maromak: “Ita-nia matan haree ona haʼu iha haʼu-nia inan nia knotak; antes haʼu-nia isin nia parte ida-idak mosu, Ita hakerek ona parte hotu neʼe iha Ita-nia livru.” (Salmo [Mazmur] 139:16) Liuhusi poezia neʼe, David fó sai katak bebé iha inan nia knotak sai boot ba daudaun hodi tuir informasaun neʼebé hakerek ona iha “livru”.

Ikusmai maizumenus iha tinan 1860, sientista ida husi rai-Áustria, naran Gregor Mendel, estuda ai-horis nia musan no loke dalan ba estudu kona-ba informasaun jenétiku nian. No iha Abríl 2003 mak sientista sira foin ramata sira-nia projetu atu buka-hatene informasaun jenétiku iha ema nia “genoma”. Sientista sira esplika katak informasaun jenétiku neʼe atu hanesan ho disionáriu ida neʼebé nakonu ho letra sira. Liuhusi informasaun neʼe mak bebé nia parte isin nian ida-idak bele forma ho loloos tuir orden, hanesan kakutak, fuan, pulmaun no ain. Tan neʼe sientista sira bolu genoma nuʼudar “livru moris nian”. Oinsá mak David bele hakerek kona-ba “livru”, ka informasaun jenétiku neʼe? Ho haraik-an, nia hatete: “Jeová nia espíritu koʼalia liuhusi haʼu; Ninia liafuan iha haʼu-nia nanál.” *—2 Samuel 23:2.

ATU hatene nasaun ka sidade sira-nia futuru mak buat neʼebé susar tebes. Maibé Bíblia fó sai nanis kona-ba nasaun no sidade sira-nia futuru. Mai ita hanoin kona-ba ezemplu rua.

SIDADE BABILÓNIA SEI MONU

Ba tinan atus ba atus, Babilónia mak sidade sentru neʼebé domina rai Ázia parte oeste, no ba tempu balu, Babilónia sai nuʼudar sidade ida neʼebé boot liu hotu iha mundu tomak. Maski nuneʼe, Maromak uza profeta Isaías atu fó-hatene nanis katak mane ida naran Ciro mak sei manán sidade Babilónia no ikusmai ema sei la hela tan iha neʼebá. (Isaías [Yesaya] 13:17-20; 44:27, 28; 45:1, 2) Entaun, liutiha tinan 200, saida mak akontese?

Iha Outubru iha tinan 539 molok Kristu, Liurai Boot Ciro manán sidade Babilónia iha kalan ida deʼit. Tuirmai, tanba ema la tau matan ona ba bee-dalan sira iha neʼebá, ikusmai rai neʼebé buras sai fali fatin neʼebé fuik. Husi tinan 200 liutiha Kristu toʼo ohin loron, la iha tan ema ida mak hela iha área neʼe. Hanesan Bíblia fó-hatene nanis ona, Babilónia “sai fatin neʼebé fuik no mamuk”.—Jeremias (Yeremia) 50:13.

Oinsá mak Isaías bele hatene buat neʼebé sei akontese? Bíblia hatete: “Neʼe mak mensajen hasoru Babilónia neʼebé Amoz nia oan-mane, Isaías, haree iha vizaun ida.”—Isaías (Yesaya) 13:1.

NÍNIVE SAI “HANESAN RAI-FUIK MARAN”

Nínive mak sidade kapitál iha rai-Asíria iha tempu antigu. Sidade neʼe kapás tebes ho estrada sira neʼebé luan, jardín públiku, templu no palásiu sira neʼebé boot tebes. Maibé profeta Sofonias fó-hatene nanis katak sidade furak neʼe sei sai “fatin mamuk, no sai maran hanesan rai-fuik maran”.—Sofonias (Zefanya) 2:13-15.

Ikusmai, maizumenus iha tinan 630 molok Kristu, tropa Babilónia no Média harahun sidade Nínive. Tuirmai, durante tinan 2.500 nia laran, ema la hatene ho loloos sidade neʼe iha neʼebé, no ba tempu balu matenek-naʼin sira mós hanoin katak ema mak inventa deʼit istória kona-ba sidade Nínive. Ikusmai, maizumenus tinan 1850, arkeólogu sira deskobre sidade Nínive antigu. Maibé ohin loron, fatin istóriku neʼe rahun ba daudauk, no matenek-naʼin sira fó avizu katak fatin neʼe karik sei sai uut deʼit.

Oinsá mak Sofonias bele hatene nanis kona-ba buat neʼebé sei akontese? Nia hatete katak “Jeová fó sai mensajen ba [nia]”.—Sofonias (Zefanya) 1:1.

BÍBLIA fó resposta ba pergunta sira neʼebé importante tebes iha ita-nia moris. Haree toʼok ezemplu balu tuirmai neʼe.

TANBASÁ MAK MUNDU NEʼE NAKONU HO BUAT AAT NO SUSAR OIOIN?

Bíblia fó sai informasaun barak kona-ba tópiku neʼe. Porezemplu:

1. “Ema domina ema seluk, no neʼe lori deʼit susar.”—Eclesiastes (Pengkhotbah) 8:9.

   Ema nia ukun hamosu susar barak tanba korrupsaun no tanba ema la iha matenek atu ukun malu.

2. “Tempu no situasaun neʼebé mosu derrepente deʼit kona sira hotu.”—Eclesiastes (Pengkhotbah) 9:11.

   Moras todan, asidente, no dezastre bele kona ita derrepente deʼit.

3. “Liuhusi ema ida mak sala tama iha mundu, no mate tanba sala.”—Roma 5:12.

   Maromak kria mane no feto primeiru ho isin neʼebé perfeitu, no mate la iha. Maibé bainhira sira la halo tuir Kriadór, sala “tama iha mundu”.

Bíblia mós promete katak Maromak sei halakon buat aat hotu. Nia sei “hamaran [ema nia] matan-been hotu husi sira-nia matan, no mate sei la iha tan, no ema sei la tanis tan ka laran-susar ka laran-triste”.—Apokalipse 21:3, 4.

EMA MATE NIA KONDISAUN OINSÁ?

Bíblia esplika katak ema neʼebé mate ona la hatene buat ida no la bele halo buat ida. Eclesiastes (Pengkhotbah) 9:5 hatete: “Ema neʼebé moris hela hatene katak sira sei mate, maibé ema neʼebé mate ona la hatene buat ida.” Bainhira ema ida mate, ninia “hanoin sira lakon ona”. (Salmo [Mazmur] 146:4) Kuandu ita mate, ita-nia kakutak la serbisu ona. Tan neʼe, ema neʼebé mate ona la sente buat ida no la hanoin buat ida.

Maski nuneʼe, Bíblia mós fó sai esperansa katak iha futuru, Maromak sei halo ema mate moris hiʼas fali.—Oséias (Hosea) 13:14; João 11:11-14.

SAIDA MAK OBJETIVU BA ITA-NIA MORIS?

Tuir Bíblia, Maromak Jeová kria mane no feto. (Gênesis [Kejadian] 1:27) Tan neʼe, Bíblia temi mane primeiru Adão nuʼudar “Maromak nia oan”. (Lucas 3:38) Aman iha lalehan hakarak ema atu iha  relasaun diʼak ho nia no moris kontente ba nafatin iha mundu. Tan neʼe, nia fó ba ema kbiit atu buka-hatene kona-ba nia. Bíblia hatete: “Kontente ba sira neʼebé hatene katak sira presiza Maromak nia matadalan.”—Mateus 5:3.

Liután neʼe, Bíblia dehan: “Ksolok ba sira neʼebé rona Maromak nia liafuan no halo tuir!” (Lucas 11:28) Bíblia hanorin ita kona-ba Maromak, ajuda ita atu moris kontente agora, no fó esperansa ba ita kona-ba futuru.

DEPOIS estuda didiʼak evidénsia barak, ema rihun ba rihun iha mundu tomak ikusmai fiar metin katak Bíblia laʼós livru antigu baibain deʼit. Sira fiar katak Maromak mak leno Eskritura hotu, no liuhusi Bíblia mak Maromak fó sai ninia hanoin. Maromak nia Liafuan mós konvida Ita atu koñese didiʼak nia no sai ninia belun, hodi dehan: “Hakbesik ba Maromak, no nia sei hakbesik ba imi.”—Tiago 4:8.

Bainhira ita lee livru ida, ita bele hatene ninia hakerek-naʼin nia hanoin. Hanesan neʼe mós ho Bíblia. Bainhira ita lee no estuda Bíblia, ita bele hatene ita-nia Kriadór nia hanoin no sentimentu. Neʼe kapás tebes! Bíblia mós esplika kona-ba:

• Maromak nia naran no Ninia hahalok furak sira.

• Maromak nia hakarak ba ema.

• Oinsá mak Ita bele sai Maromak nia belun.

Ita hakarak aprende kona-ba buat hirak-neʼe ka lae? Testemuña ba Jeová sei kontente atu ajuda Ita, no halo arranju atu Ita bele estuda Maromak nia Liafuan Bíblia hodi la selu. Ida-neʼe bele ajuda Ita atu hakbesik liután ba Maromak Jeová.