SAIDA MAK EMA BALU DEHAN?

Ema barak hanoin katak ema fiar-naʼin mak ema neʼebé fiar deʼit maski la iha evidénsia. Porezemplu, ema fiar-naʼin ida bele dehan: “Haʼu fiar katak Maromak iha duni.” Maibé se ema ruma husu ba nia: “Tanbasá mak Ita fiar hanesan neʼe?”, karik nia sei hatán: “Tanba haʼu moris mai fiar hanesan neʼe”, ka “Tanba husi kiʼik kedas ema hanorin haʼu hanesan neʼe.” Se nuneʼe, ninia fiar neʼe la bazeia ba evidénsia.

SAIDA MAK BÍBLIA HANORIN?

“Se ita iha fiar, ita sei laran-metin katak ita-nia esperansa sei sai loos no ita sei la duvida katak buat neʼebé ita fiar mak loos, maski neʼe la bele haree.” (Ebreu 11:1) Atu ema ida bele laran-metin ba buat ida ka la iha dúvida kona-ba buat ida, nia presiza iha razaun neʼebé forte kona-ba tansá mak nia bele fiar ida-neʼe. Fiar neʼe tenke bazeia ba evidénsia, laʼós hanesan sentimentu deʼit ka hein deʼit ba buat diʼak ruma atu akontese.

“Maski ema la bele haree Maromak nia hahalok ho matan, maibé ida-neʼe hatudu sai ona ho klaru . . . basá kuandu ema hanoin kona-ba buat neʼebé nia kria, sira bele haree ninia kbiit neʼebé iha ba nafatin no ninia pozisaun nuʼudar Maromak.”​—Roma 1:20.

SAIDA MAK BÍBLIA HANORIN?

“Se fiar la iha, ita la bele halo Maromak nia laran kontente. Basá ema neʼebé hakbesik ba Maromak tenke fiar katak Maromak iha, no fiar mós katak Maromak sei fó kolen ba sira neʼebé buka nia ho laran.”—Ebreu 11:6.

Hanesan temi tiha ona, ema barak fiar ba Maromak tan deʼit ema seluk hanorin sira hanesan neʼe. Sira dehan: ‘Haʼu moris mai fiar nanis ona ba Maromak.’ Maibé, Maromak hakarak ita atu adora Nia hodi fiar metin katak Nia iha duni no Nia hadomi tebes ita. Tan neʼe mak Bíblia anima ita atu buka Maromak ho laran, hodi nuneʼe ita bele hatene didiʼak nia.

“Hakbesik ba Maromak, no nia sei hakbesik ba imi.”​—Tiago 4:8.

SAIDA MAK BÍBLIA HANORIN?

“Fiar mai husi buat neʼebé ema rona.” (Roma 10:17) Sin, hakat primeiru atu iha fiar ba Maromak mak “rona” buat neʼebé Bíblia hanorin kona-ba Nia. (2 Timóteo 3:16) Hodi estuda Bíblia sei ajuda ita atu hetan resposta ba pergunta importante sira hanesan: Sé mak Maromak? Evidénsia saida deʼit mak halo haʼu fiar katak Maromak iha duni? Maromak loloos hanoin haʼu ka lae? Saida mak Maromak nia hakarak ba ita ema nia futuru?

Testemuña ba Jeová kontente atu ajuda Ita estuda Bíblia. Iha ami-nia sítiu jw.org dehan: “Ami Testemuña ba Jeová kontente atu hanorin ema hotu kona-ba Bíblia, maibé ami nunka obriga ema atu tama ami-nia relijiaun. Liután neʼe ami fó sai buat neʼebé Bíblia hanorin ho respeitu, no ami rekoñese katak ema hotu iha direitu atu hili sira-nia fiar rasik.”

Loos duni, Ita-nia fiar tenkesér bazeia ba evidénsia neʼebé Ita rasik hetan liuhusi lee Bíblia no tetu didiʼak. Se Ita halo nuneʼe, Ita halo tuir fiar-naʼin sira iha apóstolu nia tempu neʼebé ‘simu Maromak nia liafuan ho laran-manas, no loron-loron buka-hatene didiʼak Eskritura atu haree se buat sira-neʼe loos ka lae’.—Apóstolu 17:11.

“Neʼe mak moris rohan-laek: Katak sira hatene didiʼak Ita, Maromak loos mesak deʼit, no ida neʼebé Ita haruka mai, Jesus Kristu.”​—João 17:3.