REUNIAUN tinan nian husi Watch Tower Bible and Tract Society of Pennsylvania sempre halo ita haksolok. Nuneʼe mós ho reuniaun tinan nian ba dala 127, neʼebé halaʼo iha loron-sábadu, 1 Outubru 2011. Irmaun-irmán sira husi mundu tomak neʼebé hetan konvite, halibur iha Reuniaun-Fatin ba Reuniaun Boot husi Testemuña ba Jeová iha Sidade Jersey, Nova Jersey, iha Estadus Unidus Amérika.

Irmaun Gerrit Lösch husi Grupu Administradór hahú hodi fó benvindu ba rona-naʼin hotu neʼebé mai tuir reuniaun. Nia hatete ba sira neʼebé mai husi rai maizumenus 85 katak sira haksolok daudauk ho unidade neʼebé ema seluk la iha. Unidade hanesan neʼe fó sasin diʼak ba ema seluk no fó glória ba Jeová. Iha reuniaun neʼe, irmaun sira koʼalia beibeik kona-ba unidade.

RELATÓRIU DIʼAK HUSI RAI-MÉXIKU

Parte primeiru iha reuniaun neʼe fó sai ezemplu oioin kona-ba unidade iha Jeová nia povu nia leet. Irmaun Baltasar Perla halo entrevista ho ninia maluk naʼin-tolu husi Betel Méxiku kona-ba arranju foun, katak agora sukursál neen iha Amérika Sentrál sai ida deʼit ho sukursál Méxiku. Ho mudansa neʼe, família Betel iha rai-Méxiku iha irmaun-irmán barak husi rai oioin no kultura oioin, no ida-neʼe halo sira hotu sai laran-manas liután hodi ransu malu. Mudansa ida-neʼe hanesan Maromak foti apagadór boot ida no halakon ona fronteira sira neʼebé haketak rai.

Mudansa neʼe mós lori susar ida, neʼe mak kona-ba oinsá atu ajuda irmaun-irmán sira sente katak sira la dook husi Jeová nia organizasaun maski sukursál la iha ona iha sira-nia rai. Tan neʼe, irmaun sira halo arranju atu kongregasaun hotu, inklui mós kongregasaun neʼebé dook tebes husi sidade, bele haruka karta ba sukursál liuhusi internét.

RELATÓRIU HUSI JAPAUN

Irmaun James Linton husi sukursál Japaun konta kona-ba ita-nia maluk sira neʼebé kona dezastre husi rai-nakdoko no tsunami iha fulan-Marsu 2011. Sira barak lakon família, kolega, uma no sasán. Tan neʼe, Testemuña sira iha área seluk fó hela-fatin hamutuk 3.100 liu no mós karreta atus ba atus. Sira neʼebé serbisu hamutuk ho Grupu atu Arranja Harii Reuniaun-Fatin, la para atu halo serbisu hodi hadiʼa maluk kristaun sira-nia uma. Irmaun-irmán naʼin-1.700 liu halo serbisu voluntáriu iha fatin neʼebé presiza ajuda. Irmaun-irmán sira naʼin-575, inklui grupu ida neʼebé mai husi Estadus Unidus, mós ajuda atu hadiʼa Reuniaun-Fatin sira.

Maromak nia organizasaun mós halo arranju oioin atu fó kmaan ba irmaun-irmán sira neʼebé kona dezastre no hametin sira-nia fiar. Porezemplu, katuas kristaun naʼin-400 bá iha área neʼe hodi tau matan ba Jeová nia bibi sira. Grupu Administradór mós haruka katuas zona naʼin-rua husi sede-jerál hodi fó laran-manas ba irmaun-irmán sira neʼebé kona dezastre. Sira hetan kmaan no haksolok husi maluk Testemuña sira iha mundu tomak neʼebé hatudu domin ba sira.

 MANÁN KAZU IHA TRIBUNÁL

Tuirmai, rona-naʼin sira see tilun ba irmaun Stephen Hardy husi sukursál Bretaña neʼebé konta kona-ba kazu sira neʼebé ita foin manán iha tribunál. Porezemplu, governu Fransa haruka asosiasaun husi Testemuña ba Jeová atu selu impostu hamutuk dolar 82.000.000. Maibé, Tribunál Europeu ba Direitus Umanus rezolve kazu neʼe hodi foti desizaun neʼebé apoia ita, katak governu Fransa la halo tuir Artigu 9 husi Konvensaun Europeu, neʼebé proteje ema nia liberdade atu halaʼo relijiaun. Liafuan husi desizaun neʼe hatudu katak kazu neʼe laʼós kona-ba osan, hodi dehan: “Kuandu lakohi rekoñese asosiasaun relijiaun ida, ka buka atu halakon asosiasaun neʼe, ka koʼalia aat kona-ba relijiaun ida, neʼe mak hahalok neʼebé hanetik ema nia direitu neʼebé hakerek iha Artigu 9 husi Konvensaun neʼe.”

Tribunál Europeu mós foti desizaun neʼebé apoia ita kona-ba kazu ida neʼebé envolve rai-Arménia. Husi tinan 1965, tribunál neʼe fó sai katak Konvensaun Europeu la proteje ema neʼebé lakohi halo serbisu militár neʼebé governu mak haruka. Maibé, Tribunál Europeu nia Komité Boot neʼebé aas liu foti desizaun katak kuandu ema ida nia laran la husik nia atu halo serbisu militár, Konvensaun Europeu sei proteje ema neʼe nia direitu atu moris tuir ninia fiar. Agora, rai-Arménia tenke halo tuir desizaun neʼe, no ida-neʼe mós kona rai sira seluk hanesan Azerbaijaun no Turkia.

PROJETU KONSTRUSAUN OIOIN

Tuirmai, irmaun Guy Pierce husi Grupu Administradór hatete katak rona-naʼin sira sei kontente atu hatene kona-ba ita-nia projetu sira iha Novaiorke. Nia hatudu vídeo kona-ba projetu sira iha Wallkill, Patterson, no mós iha rai neʼebé foin sosa iha Warwick no Tuxedo, iha Novaiorke. Iha Wallkill, projetu atu harii uma foun ho kuartu 300 liu neʼebé sai irmaun-irmán sira-nia hela-fatin sei ramata iha tinan 2014.

Agora daudauk, irmaun sira halo planu atu uza rai luan ho ektare 100 iha Warwick. Irmaun Pierce hatete: “Maski ami seidauk hatene ho loloos kona-ba Jeová nia hakarak ba Warwick, ami kontinua halo planu hodi bele muda fali sede-jerál husi Testemuña ba Jeová iha neʼebá.” Irmaun sira mós iha planu atu uza rai ho ektare 20 neʼebé dook kilómetru 10 iha parte norte husi Warwick hodi rai mákina no materiál atu halo projetu neʼe. Irmaun Pierce hatete: “Kuandu hetan tiha lisensa, ita hein atu halo hotu projetu neʼe iha tinan haat nia laran. . . . Depois, uma sira iha Brooklyn bele faʼan.”

Irmaun Pierce husu: “Grupu Administradór troka ona sira-nia hanoin katak terus boot sei kleur ka lae?” Depois, nia hatán: “Lae, se terus boot hanetik ita-nia planu, neʼe diʼak tebetebes!”

KUIDADU HO SATANÁS

Tuirmai, irmaun Stephen Lett, neʼebé mós serbí iha Grupu Administradór, esplika 1 Pedro 5:8, neʼebé dehan: “Keta lanu bá, maibé matan-moris. Imi-nia funu-balun, katak, Diabu, laʼo mai laʼo bá hanesan leaun ida, hodi buka atu han ema ruma.” Irmaun Lett hatete katak kuandu ita hanoin kona-ba leaun mak animál hanesan saida, ita bele komprende katak Pedro nia ai-knanoik neʼe kona duni Diabu nia hahalok.

Leaun iha forsa no halai lalais liu fali ema. Satanás mós iha forsa boot, ita la bele kontra ka halai husi nia ho ita-nia kbiit rasik. Ita presiza Jeová nia ajuda. (Isa 40:31) Leaun mós baibain ataka subasubar iha nakukun laran. Se ita lakohi Satanás atu kaer ita, ita tenke hasees an husi nakukun espirituál nian. Hanesan leaun buka atu oho animál fraku ka animál oan neʼebé toba hela, Satanás mós la hatudu  laran-sadiʼa no hakarak duni atu oho ita. Liután neʼe, leaun han toʼo mohu animál sira. Nuneʼe mós ho ema kristaun neʼebé Satanás kaer, ema neʼe “nia situasaun ikus nian aat liu fali uluk nian”. (2 Ped 2:20) Tan neʼe, ita presiza kontra hasoru Satanás hodi halo tuir nafatin matadalan sira neʼebé ita aprende husi Bíblia.—1 Ped 5:9.

HAFOLIN SERBISU IHA JEOVÁ NIA UMA

Depois neʼe, irmaun Samuel Herd husi Grupu Administradór hatete: “Hafolin ita-nia serbisu iha Jeová nia uma.” Neʼe katak ema kristaun hotu iha ninia serbisu iha Jeová nia uma ka templu espirituál, katak arranju atu adora Maromak liuhusi Jesus nia sakrifísiu. Ita kontente tebes kona-ba ita-nia serbisu, no hanesan David, ita hakarak atu “hela iha Jeová nia uma iha [ita-nia] moris tomak”.—Sal 27:4.

Irmaun Herd koʼalia kona-ba Salmo 92:12-14 no esplika oinsá mak Jeová ajuda ninia povu atu halaʼo sira-nia moris ho didiʼak. Maromak mós fó kmaan mai ita, proteje ita, no fó bee lia-loos nian ba ita. Tuirmai, irmaun Herd fó laran-manas ba rona-naʼin, hodi dehan: “Mai ita hatoʼo agradese nafatin ba Maromak kona-ba neʼe. No mai ita haksolok hodi hela iha Jeová nia uma, laʼós ba tempu uitoan deʼit, maibé ba nafatin.”

EMA KRISTAUN HAFOLIN BÍBLIA

Irmaun David Splane neʼebé mós serbí iha Grupu Administradór esplika iha ninia diskursu katak ema kristaun loos sempre hafolin Maromak nia Liafuan. Iha apóstolu sira-nia tempu, sira sadere ba Maromak nia Liafuan atu hadiʼa problema kona-ba sirkunsizaun. (Apos 15:16, 17) Maibé, maizumenus tinan atus ida liu tiha, ema kristaun balu komesa hafolin filozofia gregu nian duké Bíblia. Tuirmai, ema balu troka Bíblia nia hanorin ho hanoin husi ukun-naʼin Roma nian no igreja nia ulun-naʼin sira hodi hamosu doutrina falsu oioin.

Irmaun Splane mós esplika katak Jesus nia ai-knanoik ida hatudu katak husi tempu uluk toʼo ohin loron sempre iha ema kristaun kose-mina sira iha rai, neʼebé defende lia-loos. (Mt 13:24-30) Maski ita la hatene sira mak sé loos, maibé durante tinan atus ba atus, sempre iha ema neʼebé la simu hanorin ka hahalok sira neʼebé la tuir Bíblia. Ema sira-neʼe balu  mak arsebispu Agobard husi Lyons (maizumenus tinan 800), Pedro husi Bruys, Henry husi Lausanne, no Valdo (maizumenus tinan 1100), John Wycliffe (maizumenus tinan 1300), William Tyndale (maizumenus tinan 1500), no Henry Grew no George Storrs (maizumenus tinan 1800). Ohin loron, Testemuña ba Jeová kontinua kaer metin ba Bíblia nia matadalan no rekoñese katak Bíblia mak lia-loos nia hun. Tan neʼe mak Grupu Administradór hili Joao 17:17 nuʼudar eskritura tinan nian ba tinan 2012, neʼebé dehan: “Ita-nia liafuan mak lia-loos.”

MUDANSA KONA-BA ESKOLA NO KNAAR OIOIN

Irmaun Anthony Morris husi Grupu Administradór fó-hatene mudansa kona-ba misionáriu no pioneiru tempu-tomak. Iha fulan-Setembru 2012, Eskola Bíblia ba Kaben-Naʼin Kristaun sira sei halaʼo iha rai oioin neʼebé hili tiha ona. No iha mós mudansa kona-ba Eskola Gilead. Hahú husi fulan-Outubru tinan kotuk, kaben-naʼin sira neʼebé tuir eskola neʼe mak sira neʼebé serbí ona ba tempu tomak, hanesan misionáriu sira neʼebé seidauk tuir eskola neʼe, pioneiru tempu-tomak, katuas neʼebé vizita kongregasaun, no mós sira neʼebé serbí iha Betel. Irmaun-irmán sira neʼebé ramata eskola neʼe sei hetan knaar atu hametin sira-nia maluk hodi serbí iha sukursál, ka serbí nuʼudar katuas neʼebé vizita kongregasaun, ka serbí iha kongregasaun sira neʼebé iha sidade, hodi nuneʼe sira bele ajuda kongregasaun sira iha serbisu haklaken.

Liután neʼe, hahú husi 1 Janeiru 2012, sira balu neʼebé tuir Eskola Bíblia ba Irmaun sira-neʼebé Laiha Kaben no mós Eskola Bíblia ba Kaben-Naʼin Kristaun sei hetan knaar nuʼudar pioneiru tempu-tomak ba tempu balu. Sira sei haklaken iha área neʼebé dook husi sidade, neʼebé ladún iha haklaken-naʼin sira. Sira sei serbí nuʼudar pioneiru tempu-tomak ba tinan ida no depois sei kontinua tinan ida tan. Liutiha tinan tolu, sira neʼebé hetan rezultadu diʼak karik sei simu konvite atu kontinua serbí nuʼudar pioneiru tempu-tomak ba nafatin.

Sin, reuniaun tinan nian ba tinan 2011 mak tempu ksolok. Ita kontinua husu ba Jeová atu haraik bensaun ba arranju foun sira-neʼe atu aumenta ita-nia serbisu haklaken no atu hametin ita-nia unidade hodi fó glória no hahiʼi ba Maromak Jeová.

[Kaixa/Dezeñu iha pájina 18]

BUKA ATU KOÑESE DIDIʼAK

Iha programa neʼe mós halo entrevista ba irmán faluk naʼin-lima neʼebé sira-nia laʼen uluk serbí iha Grupu Administradór. Irmán sira-neʼe nia naran mak Marina Sydlik, Edith Suiter, Melita Jaracz, Melba Barry, no Sydney Barber. Irmán sira-neʼe esplika kona-ba oinsá sira aprende lia-loos no halo serbisu tempu-tomak ba Jeová. Sira ida-idak konta fali buat diʼak kona-ba sira-nia laʼen no bensaun neʼebé sira simu hamutuk. Tuirmai, rona-naʼin sira kanta knananuk númeru 86, ho títulu: “Feto kristaun neʼebé laran-metin.”

[Dezeñu]

(Leten) Daniel no Marina Sydlik; Grant no Edith Suiter; Theodore no Melita Jaracz

(Okos) Lloyd no Melba Barry; Carey no Sydney Barber

[Mapa iha pájina 16]

Sukursál neen neʼebé sai ida deʼit ho sukursál Méxiku

MÉXIKU

GUATEMALA

ONDURAS

ELSALVADÓR

NIKARÁGUA

KOSTARRIKA

PANAMÁ

[Dezeñu iha pájina 17]

Dezeñu kona-ba harii sede-jerál husi Testemuña ba Jeová iha Warwick, Novaiorke