1, 2. (a) Saida mak ajuda ita atu halo desizaun atu serbí Maromak? (b) Iha lisaun neʼe, ita sei koʼalia kona-ba pergunta saida deʼit?

 ITA barak halo ona desizaun matenek atu serbí Maromak Jeová no halo tuir Jesus Kristu nia ain-fatin. (Mt 16:24; 1 Ped 2:21) Desizaun atu dedika an ba Maromak mak desizaun neʼebé importante tebes. Ita foti desizaun neʼe laʼós tanba ita hatene ona eskritura balu, maibé, tanba ita estuda Bíblia ho didiʼak no hametin ita-nia fiar ba liman-rohan husi Jeová. Nia sei fó liman-rohan neʼe ba ema hotu neʼebé ‘hatene nia no Jesus Kristu neʼebé nia haruka mai’.—Joao 17:3; Rom 12:2.

² Se ita hakarak nafatin iha relasaun diʼak ho Aman Jeová, ita presiza kontinua halo desizaun neʼebé halo nia kontente. Iha lisaun neʼe, ita sei koʼalia kona-ba pergunta sira hanesan: Ita-nia liman-rohan husi Maromak mak saida? Ita-nia hanoin kona-ba ita-nia liman-rohan tenkesér oinsá? Saida deʼit mak ita presiza halo atu kaer metin ba liman-rohan neʼe? Saida deʼit mak bele ajuda ita atu halo desizaun diʼak?

3. (a) Ema kristaun kose-mina sira sei hetan liman-rohan saida? (b) Liman-rohan saida mak “bibi seluk” sira sei hetan?

³ Ema kristaun uitoan deʼit mak hein atu simu moris rohan-laek iha lalehan no halaʼo knaar espesiál atu ukun hamutuk ho Kristu. (1 Ped 1:3, 4) Sira neʼebé atu hetan liman-rohan neʼe, sira tenkesér “moris fali” ona, neʼe katak hetan sasin husi espíritu santu katak sira mak ema kose-mina duni. (Joao 3:1-3) Maibé oinsá ho Jesus nia “bibi seluk” rihun ba rihun neʼebé serbisu hamutuk ho ema kose-mina sira hodi haklaken kona-ba Maromak nia Ukun? (Joao 10:16) Sira sei simu liman-rohan  neʼebé Adão ho Eva la simu. Neʼe mak moris rohan-laek iha fatin hanesan jardín furak iha mundu neʼe, neʼebé la iha tan susar, terus no mate. (Apok 21:1-4) Kuandu Jesus iha ai-riin terus nian, nia promete ba ema aat ida iha ninia sorin: “Haʼu hatete loloos ba ó ohin, ó sei hamutuk ho haʼu iha Paraízu.”—Lc 23:43, MF.

4. Ita haksolok daudauk ho bensaun saida deʼit?

⁴ Ita-nia liman-rohan husi Maromak inklui mós bensaun oioin neʼebé ita hetan daudauk. Porezemplu, tanba ita tau fiar ba Jesus Kristu nia sakrifísiu, ita sente dame iha laran no iha relasaun besik ho Maromak. (Rom 3:23-25) Ita bele komprende ho loloos buat neʼebé Bíblia promete. Liután neʼe, ita haksolok hamutuk ho irmaun-irmán sira iha mundu tomak neʼebé hatudu domin ba malu. Ita mós iha knaar espesiál atu fó sasin kona-ba Jeová. Sin, ita hafolin bensaun sira-neʼe nuʼudar ita-nia liman-rohan!

5. Satanás koko atu halo saida ba Maromak nia povu? Atu hamriik metin hasoru Satanás nia babeur, ita presiza halo saida?

⁵ Hodi nafatin kaer metin ba liman-rohan neʼe, ita presiza kuidadu ba Satanás nia lasu sira. Satanás sempre koko atu book Maromak nia povu atu halo desizaun neʼebé sala, hodi nuneʼe sira sei lakon sira-nia liman-rohan. (Núm 25:1-3, 9) No ohin loron, Satanás hakaʼas an liután atu intenta ita, tanba nia hatene katak ninia tempu hela uitoan deʼit. (Lee Apokalipse 12:12, 17.) Se ita hakarak hamriik metin “hasoru Diabu nia babeur aat hotu”, ita tenke hafolin nafatin ita-nia liman-rohan. (Ef 6:11) Atu halo ida-neʼe, mai ita haree ezemplu neʼebé ladiʼak husi Isaac nia oan-mane ida naran Esaú.

6, 7. Sé mak Esaú? Nia iha oportunidade atu simu liman-rohan saida?

⁶ Besik tinan 4.000 liubá, Isaac no Rebeca iha oan-kaduak, Esaú ho Jacob. Kuandu labarik rua neʼe sai boot, sira hatudu hahalok neʼebé la hanesan. Esaú sai “matenek atu kasa”, maibé “Jacob ema neʼebé loos, no gosta hela iha tenda”. (Gên 25:27) Bíblia bolu Jacob nuʼudar “ema neʼebé loos” tanba nia laran-metin ba Maromak no iha laran neʼebé moos.

⁷ Kuandu Esaú ho Jacob tinan 15, sira-nia avó Abraão mate, maibé Jeová la haluha kona-ba buat neʼebé nia promete ba Abraão. Tan neʼe, liutiha tempu balu, Jeová repete fali ninia promesa neʼe ba Isaac hodi hatete katak nasaun hotu iha mundu neʼe sei hetan bensaun liuhusi Abraão nia bei-oan. (Lee Gênesis 26:3. a) Neʼe katak “bei-oan” neʼebé temi iha Gênesis 3:15, neʼebé sai nuʼudar Mesias, nia sei mai husi Abraão nia oan. No tanba Esaú mak Isaac nia oan primeiru, nia iha direitu atu hetan bensaun neʼe. Esaú iha oportunidade espesiál atu simu liman-rohan neʼebé diʼak tebes! Maibé nia hafolin ida-neʼe ka lae?

8, 9. (a) Desizaun saida mak Esaú halo kona-ba ninia liman-rohan? (b) Ikusmai, Esaú rekoñese saida kona-ba ninia desizaun? No nia halo saida?

⁸ Loron ida, kuandu Esaú laʼo ba rai-fuik no depois fila fali, nia haree Jacob “daʼan hela koto”. Esaú hatete: “Lalais, fó hahán uitoan mai haʼu husi buat mean, mean neʼebá, tanba haʼu kole tebes!” Jacob hatán: “Faʼan uluklai mai haʼu Ita-nia direitu nuʼudar oan-boot!” Desizaun saida mak Esaú halo? Nia hatete: “Direitu nuʼudar oan-boot iha folin saida mai haʼu?” Sin, Esaú deside atu husik ninia direitu nuʼudar oan-boot hodi bele han deʼit koto bikan ida! Ho ninia resposta neʼe, Jacob husu Esaú atu faʼan duni ninia direitu, hodi dehan: “Jura uluklai mai haʼu!” Esaú jura kedas atu faʼan ninia  direitu nuʼudar oan-boot ba Jacob. Depois neʼe, “Jacob fó ba Esaú paun no koto daʼan, no Esaú komesa han no hemu. Tuirmai, nia hamriik no bá”. Hodi halo nuneʼe, Esaú hatudu katak ninia direitu nuʼudar oan-boot mak buat neʼebé la importante ba nia.—Gên 25:29-34.

⁹ Liutiha tinan barak kuandu Isaac hanoin katak nia besik atu mate, Rebeca halo arranju oioin hodi Jacob mak bele hetan direitu neʼebé Esaú faʼan ona ba nia. Ikusmai, bainhira Esaú rekoñese katak nia halo ona desizaun neʼebé beik tebes, nia husu ba Isaac: “Haʼu-nia aman, fó bensaun mós mai haʼu! . . . Ita la iha bensaun ruma atu fó mai haʼu?” Maibé, Isaac hatete katak nia la bele foti fali bensaun neʼebé nia fó ona ba Jacob. Ho ida-neʼe, “Esaú komesa tanis ho lian makaʼas”.—Gên 27:30-38.

10. Jeová sente oinsá kona-ba Esaú no Jacob? Tanbasá?

¹⁰ Istória neʼe hatudu saida kona-ba Esaú? Esaú nia hahalok hatudu katak halo tuir deʼit ninia hakarak isin nian mak importante liu duké simu bensaun sira iha futuru nuʼudar ninia liman-rohan. Esaú la hafolin ninia direitu nuʼudar oan-boot no la hadomi Maromak ho laran. Liután neʼe, nia mós la hanoin ho didiʼak kona-ba rezultadu husi ninia desizaun neʼebé sei kona ninia oan no bei-oan sira. Maibé la hanesan ho Esaú, Jacob hafolin tebes liman-rohan neʼebé nia simu. Porezemplu, Jacob halo tuir ninia inan-aman nia konsellu kona-ba buka feen. (Gên 27:46–28:3) Maski nia presiza hatudu pasiénsia no halo sakrifísiu oioin, maibé tanba nia halo desizaun diʼak kona-ba kaben, ikusmai nia sai Mesias nia beiʼala. Jeová sente oinsá kona-ba Esaú no Jacob? Nia hatete: “Haʼu hadomi Jacob, no haʼu hakribi Esaú.”—Mal 1:2, 3.

11. (a) Oinsá mak Esaú nia ezemplu ladiʼak ajuda ita? (b) Tanbasá mak Paulo fó avizu kona-ba sala-foʼer hodi temi Esaú nia ezemplu?

¹¹ Istória kona-ba Esaú ajuda duni ita ohin loron ka lae? Sin. Apóstolu Paulo fó avizu ba ninia maluk kristaun: “Keta husik sala-foʼer mosu, no imi ida keta hatún relijiaun [“la hafolin buat neʼebé santu”, MF] hanesan Esaú neʼebé faʼan nia liman-rohan ho ai-han . . . dala ida deʼit nian.” (Ebr 12:15, 16) Ita mós presiza halo tuir avizu neʼe. Ita tenke hafolin nafatin buat neʼebé sagradu, hodi la haburas hakarak isin nian no kaer metin ba ita-nia liman-rohan husi Maromak. Maibé, tansá mak Paulo fó avizu kona-ba sala-foʼer hodi temi Esaú nia ezemplu? Tanba se ita la kontrola ita-nia hakarak isin nian hanesan Esaú, karik sai fasil ba ita atu halo sala boot hanesan sala-foʼer, no ida-neʼe bele halo lakon ita-nia liman-rohan husi Jeová.

12. (a) Oinsá mak Satanás koko ita ida-idak atu monu ba sala? (b) Fó toʼok ezemplu husi Bíblia neʼebé bele ajuda ita atu tahan hasoru tentasaun.

¹² Nuʼudar Maromak Jeová nia atan, ita hakaʼas an atu sees husi situasaun neʼebé intenta ita atu halo hahalok neʼebé la tuir morál. No se ema ruma intenta ita, ita halo orasaun ba Jeová hodi husu ninia ajuda atu la monu ba tentasaun neʼe. (Mt 6:13) Maski ita hakaʼas an atu laran-metin nafatin iha mundu aat neʼe, maibé Satanás koko nafatin atu halo ita-nia relasaun ho Jeová sai fraku. (Ef 6:12) Diabu Satanás hatene oinsá atu aproveita ita ida-idak nia hakarak isin nian atu halo ita monu ba tentasaun. (1 Kor 10:8, 13) Se ita hasoru tentasaun atu fó haksolok ba ita-nia hakarak isin nian iha dalan neʼebé sala, desizaun saida mak ita sei halo? Ita sei sai hanesan Esaú hodi monu kedas ba tentasaun? Ka, ita sei tahan hasoru tentasaun neʼe hanesan Jacob nia oan José, neʼebé halai-sees kedas husi tentasaun husi Potifar nia feen?—Lee Gênesis 39:10-12. b

13. (a) Oinsá mak ema kristaun barak hatudu hahalok hanesan José? Maibé oinsá mak ema balu hatudu hahalok hanesan Esaú? (b) Saida mak ita presiza halo atu la hatudu hahalok hanesan Esaú?

¹³ Ita-nia irmaun-irmán barak hasoru ona situasaun neʼebé sira presiza hili atu sai hanesan Esaú ka hanesan José. No sira barak foti desizaun diʼak neʼebé halo Jeová kontente. (Prov 27:11) Maibé, iha mós maluk balu neʼebé hili atu sai hanesan Esaú hodi la hafolin sira-nia relasaun ho Jeová. No tuir loloos, sira barak hetan dixiplina makaʼas ka tenke hasai husi kongregasaun tanba halo sala-foʼer. Tan neʼe, importante tebes ba ita atu prepara nanis ita-nia laran antes atu hasoru situasaun neʼebé koko ita-nia laran-metin! (Sal 78:8) Entaun, mai ita koʼalia kona-ba hakat rua neʼebé ajuda ita atu tahan hasoru tentasaun no halo desizaun neʼebé diʼak.

14. Atu ‘hadook buat aat husi ita-nia laran no kaer metin buat neʼebé diʼak’, pergunta saida deʼit mak bele ajuda ita?

¹⁴ Hakat primeiru mak hanoin didiʼak kona-ba rezultadu husi sala. Kuandu ita hadomi liu Jeová, ita mós sei hafolin liután liman-rohan neʼebé ita simu husi nia. Tuir loloos, se ita hadomi ema ruma, ita lakohi hakanek ninia laran, maibé hakaʼas an atu halo nia kontente. Tan neʼe, ita presiza hanoin didiʼak ita-nia hahalok sala sei lori rezultadu saida ba ita rasik, Maromak, no ema seluk. Ita presiza husu ba ita-nia an: ‘Haʼu-nia hahalok neʼe sei kona haʼu-nia relasaun ho Jeová oinsá? Haʼu-nia hahalok sala neʼe sei lori rezultadu saida ba haʼu-nia família? Oinsá ho haʼu-nia maluk sira iha kongregasaun? Haʼu sei halo ema seluk sidi ka lae?’ (Flp 1:10) Ita mós bele husu: ‘Haʼu hakarak atu haksolok ba tempu uitoan maibé depois triste ba tempu kleur ho rezultadu aat? Haʼu hakarak sai hanesan Esaú neʼebé ikusmai tanis kuandu nia hetan rezultadu aat husi ninia sala?’ (Ebr 12:17) Hodi hanoin didiʼak pergunta sira hanesan neʼe sei ajuda ita atu ‘hadook buat aat husi ita-nia laran no kaer metin buat neʼebé diʼak’. (Rom 12:9) No liuliu, se ita hadomi Jeová ho laran, ida-neʼe sei book ita atu kaer metin ba liman-rohan neʼebé ita simu.—Sal 73:28.

15. Hodi halo saida deʼit mak ita bele hametin ita-nia an atu tahan hasoru tentasaun?

¹⁵ Hakat tuirmai mak prepara an atu  labele monu ba tentasaun. Jeová fó ona buat barak neʼebé ajuda ita atu prepara an atu tahan hasoru tentasaun oioin iha mundu aat neʼe. Neʼe inklui estuda Bíblia, tuir reuniaun, haklaken, no halo orasaun. (1 Kor 15:58) Kuandu ita fó sai ita-nia hanoin no sentimentu ba Jeová liuhusi orasaun no ita haklaken ho didiʼak, neʼe katak ita prepara an atu hamriik metin hasoru tentasaun oioin. (Lee 1 Timoteo 6:12, 19.) Maibé, ida-neʼe mós depende ba ita rasik nia hakaʼas-an. (Gal 6:7) Kona-ba neʼe, mai ita haree eskritura husi livru Provérbios kapítulu 2.

16, 17. Saida deʼit mak bele ajuda ita atu halo desizaun diʼak?

¹⁶ Provérbios kapítulu 2 fó laran-manas mai ita atu buka matenek. Matenek neʼe bele ajuda ita atu hatene buat neʼebé loos no buat neʼebé sala, no ajuda ita atu kontrola an duké buka deʼit haksolok ba ita-nia hakarak isin nian. Maibé atu hetan matenek neʼe, ita presiza hakaʼas an duni. Bíblia dehan: “Haʼu-nia oan, se ó simu haʼu-nia liafuan sira no rai haʼu-nia lei sira ba ó-nia an, hodi rona didiʼak ba matenek ho ó-nia tilun, no hodi fó ó-nia laran ba matenek; liután neʼe, se ó husu atu hatene no husu atu hetan matenek, se ó kontinua buka ida-neʼe hanesan buka osan-mutin, no kontinua buka ida-neʼe hanesan rikusoin neʼebé subar hela, se nuneʼe ó sei hatene taʼuk ba Jeová, no ó sei hetan matenek husi Maromak. Tanba Jeová rasik mak fó matenek; husi ninia ibun mak liafuan matenek no koñesimentu sai.”—Prov 2:1-6.

¹⁷ Se ita halo tuir eskritura neʼe, ita bele hetan matenek atu halo desizaun neʼebé diʼak. Sin, se ita simu ho laran Jeová nia liafuan, se ita halo orasaun beibeik hodi husu Jeová nia matadalan, no se ita kontinua buka Jeová nia matenek hanesan buka rikusoin neʼebé subar hela, se ita halo buat hirak-neʼe mak ita bele hamriik metin nafatin hodi hasoru tentasaun oioin.

18. Ita hakarak kontinua atu halo saida? Tanbasá?

¹⁸ Maromak Jeová sei fó matenek ba ninia atan sira neʼebé hakaʼas an atu hetan ida-neʼe. Kuandu ita hakaʼas an liután atu buka matenek neʼe no halo tuir, ita mós hakbesik liután ba Jeová. No ita-nia relasaun ho Jeová sei proteje ita husi tentasaun oioin. Se ita besik nafatin ba Jeová no lakohi halo nia triste, ita sei hasees an husi hahalok sala. (Sal 25:14; Tgo 4:8) Tan neʼe, mai ita kontinua atu halo desizaun diʼak no kaer metin ba ita-nia liman-rohan husi Jeová hodi nafatin hakbesik ba nia no halo tuir ninia matenek.