Irmán Angela a mak irmán klosan ida ho tinan 30 liu ona. Nia hein vizita husi katuas kristaun sira no nia laran taʼuk uitoan. Nia hanoin: ‘Katuas sira sei koʼalia ba haʼu kona-ba saida? Haʼu falta reuniaun dala balu ona, maibé neʼe tanba haʼu serbisu loron-tomak iha ospitál no sai kole tebes.’ Liután neʼe, nia mós hanoin barak kona-ba ninia inan nia saúde.

Se Ita mak katuas kristaun ida neʼebé atu bá vizita irmán Angela, oinsá mak Ita sei fó laran-manas ba nia? Ulukliu, mai ita hanoin kona-ba oinsá mak ita bele prepara atu vizita “ema neʼebé kole loos”.—Jer 31:25.

Ita hotu dala ruma sente kole tanba serbisu atu manán osan ka responsabilidade nuʼudar ema kristaun. Porezemplu, bainhira profeta Daniel haree vizaun ida neʼebé nia la komprende, nia “sai kole loos”. (Dan 8:27) Saida mak ajuda nia? Maromak haruka anju Gabriel atu esplika kona-ba vizaun neʼe no fó fiar ba Daniel katak Jeová simu ona ninia orasaun. Anju neʼe mós bolu Daniel nuʼudar “ema neʼebé Maromak hadomi”. (Dan 9:21-23) Liutiha tempu balu, anju ida seluk mós fó forsa ba Daniel liuhusi liafuan neʼebé halo nia haksolok.—Dan 10:19.

Hodi halo tuir ezemplu neʼe, antes atu vizita ita-nia maluk ida neʼebé kole ka laran-tun, ita bele hanoin didiʼak kona-ba ninia situasaun. Nia hasoru susar saida? Oinsá mak susar neʼe halo nia laran-tun? Hahalok diʼak saida deʼit mak nia hatudu? Irmaun Richard, neʼebé serbí nuʼudar katuas ba tinan 20 liu ona, hatete: “Haʼu hanoin kona-ba haʼu-nia maluk sira-nia hahalok diʼak no  sira-nia situasaun antes atu halo vizita. Ida-neʼe ajuda haʼu hatene oinsá atu fó laran-manas ba sira ida-idak hodi tuir sira-nia presiza.” Se katuas rua mak halo planu atu vizita maluk ruma hamutuk, karik diʼak atu koʼalia uluk kona-ba irmaun ka irmán neʼe nia situasaun.

Karik ita hotu sente moe atu koʼalia kona-ba ita rasik nia sentimentu. Tan neʼe, oinsá mak ita bele ajuda ita-nia maluk atu fó sai ninia hanoin? Ita-nia oin-midar no liafuan diʼak bele ajuda nia atu sente kmaan no koʼalia nakloke kona-ba ninia situasaun. Irmaun Michael, neʼebé serbí nuʼudar katuas ba tinan 40 liu ona, dala barak nia hatete liafuan hanesan: “Knaar ida neʼebé halo ami katuas sira haksolok mak vizita irmaun-irmán sira iha sira-nia uma no koñese malu ho didiʼak. Tan neʼe, haʼu kontente atu vizita Ita ohin.”

Ita mós bele halo orasaun hamutuk antes atu koʼalia ba malu. Kuandu ita hatoʼo orasaun, diʼak atu temi kona-ba ita-nia maluk nia hahalok diʼak sira, hanesan ninia fiar, domin, ka laran-metin. Ida-neʼe mak buat neʼebé apóstolu Paulo halo ba ninia maluk kristaun sira. (1 Tes 1:2, 3) Hodi halo hanesan neʼe sei prepara ita rasik no ita-nia maluk nia laran atu bele koʼalia ba malu ho didiʼak. Ita-nia orasaun mós bele halo ita-nia maluk sente kmaan. Irmaun Ray neʼebé iha esperiénsia barak ona nuʼudar katuas hatete: “Dala ruma ita hotu haluha kona-ba buat diʼak neʼebé ita kumpre. Tan neʼe, kuandu ema seluk fó-hanoin ita kona-ba ida-neʼe, ita sente kmaan duni.”

Dalan ida neʼebé ita bele halo atu fahe “kmanek espirituál” ba ita-nia maluk mak hodi uza Bíblia maski loke versíkulu ida deʼit. (Rom 1:11) Porezemplu, ita bá vizita irmaun ida neʼebé laran-tun tebes no sente katak nia la iha folin. Karik, ita bele hatudu liafuan husi ema neʼebé hakerek salmu, neʼebé sente katak nia sai hanesan “botir  kulit nian iha ahi-suar” neʼebé namkurut ona. Maski nuneʼe, nia hatete ba Maromak: “Haʼu la haluha Ita-nia ukun-fuan sira.” (Sal 119:83, 176) Nuʼudar ita esplika eskritura neʼe, ita bele fó sai ita-nia fiar katak irmaun neʼe mós sei “la haluha” Maromak nia ukun-fuan.

Ba irmán ida neʼebé ladún bá reuniaun ona, oinsá mak ita bele uza Bíblia atu fó laran-manas ba nia? Karik diʼak atu temi ai-knanoik kona-ba osan drakma neʼebé lakon. (Lc 15:8-10, MF) Osan neʼe mak parte husi korrente neʼebé uza osan-mutin barak. Hodi esplika ai-knanoik neʼe, karik ita bele book irmán neʼe nia laran atu hatene katak nia mós parte importante husi kongregasaun, no esplika katak Jeová hafolin tebes nia nuʼudar ninia bibi-oan ida.

Baibain, ita hotu hakarak fó sai ita-nia hanoin kona-ba eskritura sira. Tan neʼe, ita tenke kuidadu atu la koʼalia demais! Kuandu ita lee eskritura ruma neʼebé kona duni sira-nia situasaun, ita bele dada sira-nia atensaun ba liafuan ida no husu sira atu fó sai sira-nia hanoin. Porezemplu, se ita lee 2 Korinto 4:16, ita bele husu: “Ita mós iha esperiénsia ruma kona-ba oinsá mak Jeová hafoun Ita?” Pergunta hanesan neʼe bele loke dalan ba ita atu “hametin malu” ho ita-nia maluk kristaun.—Rom 1:12.

Karik ita mós bele fó laran-manas ba ita-nia maluk hodi koʼalia kona-ba ema ruma husi Bíblia neʼebé hasoru situasaun hanesan ho nia. Porezemplu, ba irmaun ka irmán neʼebé laran-tun, ita bele koʼalia kona-ba Ana ka Epafrodito, neʼebé sai laran-tun maibé nafatin folin-boot iha Jeová nia oin. (1 Sam 1:9-11, 20; Flp 2:25-30) Karik diʼak mós atu koʼalia kona-ba ezemplu seluk husi Bíblia hodi tuir ita-nia maluk ida-idak nia situasaun.

Ita bele hatudu katak ita hanoin ita-nia maluk sira hodi kontinua hatudu interese ba sira. (Apos 15:36) Porezemplu kuandu atu ramata ita-nia vizita, ita bele halo planu ruma atu bá haklaken hamutuk. Irmaun Bernard, neʼebé iha esperiénsia barak ona nuʼudar katuas, nia iha toman atu hakbesik fali ba maluk kristaun neʼebé nia halo vizita, hodi husu: “Irmaun, matadalan neʼebé horibainhira ita koʼalia, ida-neʼe lori diʼak ba Ita ka lae?” Hodi hanoin nafatin sira, ita bele hatene se ita presiza halo buat seluk tan atu ajuda sira.

Agora mak tempu neʼebé ita-nia maluk presiza duni ema neʼebé hanoin sira, komprende no hadomi sira. (1 Tes 5:11) Tan neʼe, antes atu halo vizita ba ita-nia maluk kristaun, hanoin didiʼak kona-ba sira-nia situasaun. Halo orasaun. Buka eskritura neʼebé kona sira-nia situasaun. Hodi halo buat hirak-neʼe, ita bele hatoʼo liafuan neʼebé monu loos ba sira-nia laran no fó kmaan ba “ema neʼebé kole loos”!