Hatudu respeitu ba ema neʼebé idade ona
“Ó tenke hatudu respeitu ba ema neʼebé idade ona.”—LEVÍTICO (IMAMAT) 19:32.
1. Ema hasoru situasaun susar saida deʼit?
BAINHIRA Maromak Jeová kria ema primeiru, nia hakarak ema atu haksolok ho saúde diʼak iha paraízu. Nia lakohi sira atu hetan susar, moras no sai idade. Maibé agora, “kriasaun hotu kontinua halerik hamutuk no sente moras”. (Roma 8:22) Tuir ita-nia hanoin, Maromak sente oinsá kuandu nia haree problema neʼebé mosu tanba ema halo sala? Liután neʼe, katuas no ferik barak hetan susar tanba la iha ema atu ajuda sira kuandu sira presiza.—Salmo (Mazmur) 39:5; 2 Timóteo 3:3.
2. Tanbasá mak ita sente kontente atu iha katuas-ferik sira iha kongregasaun?
2 Ita nuʼudar Maromak Jeová nia povu sente kontente atu iha maluk kristaun sira neʼebé idade ona iha kongregasaun. Ita bele aprende husi sira-nia matenek no halo tuir sira-nia ezemplu kona-ba fiar. Maski katuas ka ferik sira hanesan neʼe mak ita-nia família rasik ka maluk kristaun deʼit, maibé ita hotu hakarak atu ajuda sira. (Galásia 6:10; 1 Pedro 1:22) Entaun, mai ita koʼalia kona-ba Maromak nia hanoin ba katuas-ferik sira neʼebé laran-metin ba nia. Ita mós sei koʼalia kona-ba família no kongregasaun nia responsabilidade atu tau matan ba katuas-ferik sira-neʼe.
“KETA SOE HELA HAʼU”
3, 4. (a) Ema neʼebé hakerek Salmo 71 husu saida ba Jeová? (b) Ema neʼebé idade ona iha kongregasaun bele husu saida ba Maromak?
3 Salmo 71:9 dehan: “Keta soe hela haʼu iha tempu haʼu katuas ona; bainhira haʼu-nia forsa la iha ona, keta husik haʼu.” Karik David mak hakerek liafuan sira-neʼe. David serbí Maromak iha ninia moris tomak, no Jeová uza nia atu halo buat barak. (1 Samuel 17:33-37, 50; 1 Reis [Raja-Raja] 2:1-3, 10) Maski nuneʼe, kuandu David sai idade, nia sente katak nia presiza husu ba Jeová atu tau matan ba nia.—Lee Salmo (Mazmur) 71:17, 18. a
4 Ohin loron, irmaun-irmán barak mós sente hanesan ho David. Maski idade ona no hasoru susar oioin, sira kontinua hakaʼas an atu hahiʼi Maromak. (Eclesiastes [Pengkhotbah] 12:1-7) Sira barak karik la bele ona halo buat hotu neʼebé uluk halo, inklui serbisu haklaken. Maibé sira mós bele husu Jeová atu kontinua fó bensaun no tau matan ba sira. Katuas-ferik sira-neʼe bele fiar katak Maromak sei hatán sira-nia orasaun tanba sira-nia orasaun hanesan deʼit ho David nian neʼebé Jeová mak book nia atu hatoʼo.
5. Oinsá mak Jeová nia haree kona-ba katuas-ferik sira neʼebé laran-metin?
5 Maromak Jeová hafolin tebes katuas-ferik sira neʼebé laran-metin no nia mós hakarak atu ninia atan sira hatudu respeitu ba ema sira hanesan neʼe. (Salmo [Mazmur] 22:24-26; Provérbios [Amsal] 16:31; 20:29) Levítico (Imamat) 19:32 hatete: “Iha ema fuuk mutin nia oin, ó tenke hamriik, no ó tenke hatudu respeitu ba ema neʼebé idade ona, no ó tenke hamtaʼuk ó-nia Maromak. Haʼu mak Jeová.” Sin, hodi hatudu respeitu ba katuas-ferik sira iha kongregasaun mak responsabilidade neʼebé boot husi tempu uluk toʼo ohin loron. Maibé sé mak iha responsabilidade atu tau matan ba sira?
FAMÍLIA NIA RESPONSABILIDADE
6. Jesus hatudu ezemplu saida kona-ba tau matan ba inan-aman?
6 Maromak nia Liafuan dehan: “Hatudu respeitu ba ó-nia inan no aman.” (Êxodo [Keluaran] 20:12; Éfeso 6:2) Jesus hatudu katak ukun-fuan neʼe mak importante kuandu nia siʼak ema farizeu no eskriba sira neʼebé lakohi tau matan ba sira-nia inan-aman. (Marcos 7:5, 10-13) Jesus mós hatudu ezemplu diʼak kona-ba tau matan ba inan-aman. Porezemplu, kuandu nia besik ona atu mate iha ai-riin terus nian, nia hanoin kona-ba ninia inan, neʼebé karik sai faluk ona. Tan neʼe, Jesus entrega ninia inan ba dixípulu João neʼebé nia hadomi tebes.—João 19:26, 27.
7. (a) Apóstolu Paulo fó sai matadalan saida kona-ba tau matan ba inan-aman sira? (b) Paulo koʼalia kona-ba saida iha eskritura neʼe?
7 Iha apóstolu Paulo nia karta ba Timóteo, nia hakerek katak ema kristaun tenke tau matan ba sira-nia umakain rasik. (Lee 1 Timóteo 5:4, 8, 16.) Paulo fó sai matadalan neʼe kuandu nia koʼalia kona-ba ema neʼebé bele hetan kongregasaun nia ajuda hodi taka sira-nia presiza loroloron nian. Nia hatete ho klaru katak oan, bei-oan ka família seluk mak iha responsabilidade atu tau matan ba feto-faluk neʼebé idade ona, hodi nuneʼe, labele lori todan ba kongregasaun. Nuneʼe mós ho ohin loron, ita bele hatudu ita-nia domin ba Maromak hodi tau matan ba ita-nia família nia presiza.
8. Tanbasá mak Bíblia la fó sai ukun-fuan barak kona-ba tau matan ba inan-aman neʼebé idade ona?
8 Ema kristaun sira neʼebé boot ona iha responsabilidade atu tau matan ba inan-aman nia presiza. Maski Paulo koʼalia kona-ba família neʼebé “fiar-naʼin”, maibé se ema kristaun ida iha inan-aman neʼebé laʼós fiar-naʼin, nia mós tenkesér tau matan ba sira. Tanba família ida-idak nia situasaun la hanesan, sira tenke halo desizaun rasik kona-ba oinsá atu tau matan ba inan-aman. Ema ida-idak nia saúde, presiza, no hahalok la hanesan. Katuas-ferik balu iha oan barak, balu seluk iha oan ida deʼit. Balu bele hetan apoiu husi governu, balu seluk lae. Liután neʼe, katuas-ferik ida-idak nia hakarak mós la hanesan. Tan neʼe, ita labele kritika desizaun neʼebé ema ida-idak foti hodi tau matan ba sira-nia família neʼebé idade ona. Jeová sei fó bensaun ba ema neʼebé halo desizaun hodi tuir Bíblia, hanesan nia ajuda ninia povu iha tempu antigu.—Números (Bilangan) 11:23.
9-11. (a) Situasaun susar saida mak ema balu hasoru? (Haree foto iha pájina 20.) (b) Tanbasá mak oan neʼebé boot ona labele ansi atu halo desizaun hodi husik ninia knaar espesiál iha Jeová nia serbisu? Esplika toʼok.
9 Kuandu oan sira hela dook husi inan-aman, karik ida-neʼe halo susar liután atu tau matan ba inan-aman nia presiza. Porezemplu, kuandu inan-aman nia saúde sai aat derrepente deʼit, tanba karik sira monu, ruin tohar, ka problema seluk, oan sira presiza bá vizita sira lalais. Liutiha neʼe, karik inan-aman presiza ajuda husi oan sira ba tempu uitoan ka ba tempu naruk. b—Haree nota iha kraik.
10 Irmaun-irmán sira neʼebé serbí Maromak tempu-tomak iha fatin neʼebé dook husi inan-aman, dala ruma presiza halo desizaun neʼebé susar. Porezemplu, sira neʼebé serbí iha Betel, misionáriu, ka katuas área nian, sira haree sira-nia knaar nuʼudar buat neʼebé folin-boot hanesan bensaun husi Jeová. Maibé, kuandu sira-nia inan-aman sai moras, karik buat primeiru neʼebé sira hanoin mak: ‘Ami presiza husik ami-nia knaar no fila ba uma hodi tau matan ba inan-aman.’ Se ita mak hasoru situasaun hanesan neʼe, diʼak atu halo orasaun no hanoin didiʼak kona-ba ita-nia inan-aman nia hakarak no presiza. Keta ansi atu husik ita-nia knaar husi Jeová, no dala ruma ita la presiza husik kedas ida-neʼe. Karik ita-nia inan-aman nia moras mak ba tempu uitoan deʼit, ka ema balu iha ita-nia inan-aman nia kongregasaun prontu atu ajuda.—Provérbios (Amsal) 21:5.
11 Porezemplu, kaben-naʼin ida iha rai-Japaun iha oan-mane naʼin-rua neʼebé serbí iha rai dook. Ida serbí nuʼudar misionáriu iha rai-Paraguai, no ida seluk serbí iha sede-jerál iha Brooklyn, Novaiorke. Bainhira sira-nia inan-aman neʼebé idade ona presiza ajuda, oan naʼin-rua neʼe no sira-nia feen bá vizita inan-aman hodi haree saida mak sira bele halo no oinsá mak sira bele tau matan. Iha tempu neʼe, kaben-naʼin neʼebé serbí nuʼudar misionáriu komesa hanoin atu husik sira-nia knaar no fila fali ba uma. Maibé, sira simu telefone husi koordenadór ba grupu katuas nian iha sira-nia inan-aman nia kongregasaun. Katuas kristaun sira-neʼe koʼalia hamutuk ona no hakarak atu misionáriu neʼe kontinua halaʼo sira-nia knaar ba tempu kleur. Katuas kristaun sira-neʼe hafolin kaben-naʼin neʼe nia serbisu no sira halo desizaun katak sira sei hakaʼas an atu ajuda hodi tau matan ba sira-nia inan-aman. No família tomak hafolin tebes domin boot neʼebé katuas sira-neʼe hatudu!
12. Saida mak família kristaun tenke hanoin kuandu halo desizaun atu tau matan ba inan-aman?
12 Tuir loloos, família kristaun ida-idak mak tenke halo desizaun kona-ba oinsá atu tau matan ba inan-aman neʼebé idade, maibé importante ba ita hotu atu hanoin kona-ba Jeová nia naran. Ita lakohi duni atu sai hanesan ulun-naʼin relijiaun nian iha Jesus nia tempu. (Mateus 15:3-6) Ita hakarak ita-nia desizaun fó hahiʼi ba Maromak no lakohi hafoʼer kongregasaun nia naran.—2 Korinto 6:3.
KONGREGASAUN NIA RESPONSABILIDADE
13, 14. Oinsá mak ita bele hatene katak Bíblia haruka kongregasaun kristaun atu tau matan ba sira neʼebé idade ona?
13 Laʼós ema hotu bele ajuda sira neʼebé serbí Jeová tempu-tomak hanesan foin temi. Maibé, Bíblia hatudu ho klaru katak kongregasaun tenke tau matan ba irmaun-irmán sira neʼebé hatudu ezemplu diʼak. Iha tempu apóstolu nian, “la iha ema ida neʼebé kuran buat ruma” iha kongregasaun iha Jeruzalein. Neʼe la dehan katak sira hotu riku. Tuir loloos, sira balu kiak, maibé sira apoia malu hodi fó sasán ‘tuir ida-idak nia presiza’. (Apóstolu 4:34, 35) Maibé lakleur, problema ida mosu iha kongregasaun neʼe. Feto-faluk balu “la hetan ai-han neʼebé fahe loroloron”. Tan neʼe, apóstolu sira hili mane sira neʼebé kumpre kritériu hodi halo arranju atu tau matan ba feto-faluk sira. (Apóstolu 6:1-5) Sira presiza halo nuneʼe tanba durante Pentekostes tinan 33, ema barak husi rai seluk sai ema kristaun no hela iha Jeruzalein hodi hametin liután sira-nia fiar. Maski arranju neʼe ba tempu uitoan deʼit, maibé apóstolu sira-nia desizaun hatudu katak kongregasaun bele duni atu tau matan ba maluk kristaun sira neʼebé idade ona.
14 Paulo fó sai ba Timóteo kona-ba kritériu sira neʼebé feto-faluk kristaun ida tenke kumpre hodi bele hetan ajuda husi kongregasaun. (1 Timóteo 5:3-16) Tiago mós hakerek katak ema kristaun iha responsabilidade atu tau matan ba oan-kiak, feto-faluk, no ema seluk neʼebé hasoru susar. (Tiago 1:27; 2:15-17) Apóstolu João mós dehan: “Se ema iha sasán mundu neʼe nian no nia haree katak nia maluk kuran buat ruma, no nia lakohi hatudu laran-sadiʼa ba nia maluk, entaun oinsá mak Maromak nia domin hela iha nia?” (1 João 3:17) Se ema kristaun ida-idak iha responsabilidade atu tau matan ba ema neʼebé presiza ajuda, neʼe katak kongregasaun mós tenke halo nuneʼe.
![[Dezeñu iha pájina 23]](https://assetsnffrgf-a.akamaihd.net/assets/m/2014206/univ/wpub/2014206_univ_cnt_2_xs.jpg)
Se mosu problema ruma, oinsá mak kongregasaun bele ajuda? (Haree parágrafu 15, 16)
15. Hodi ajuda maluk kristaun neʼebé idade ona, ida-neʼe envolve saida?
15 Iha rai balu, ema neʼebé idade ona hetan ajuda husi governu, hanesan pensaun ka buat seluk. (Roma 13:6) Iha rai seluk, karik la iha ajuda hanesan neʼe. Tan neʼe, ajuda neʼebé katuas-ferik sira hetan husi família no kongregasaun depende ba situasaun ida-idak. Se oan neʼebé fiar-naʼin hela dook husi inan-aman, karik ida-neʼe kona dalan neʼebé sira ajuda inan-aman. Entaun, oan sira presiza koʼalia hamutuk ho katuas kristaun sira iha inan-aman nia kongregasaun atu sira hotu bele komprende kona-ba família nia situasaun. Porezemplu, katuas sira bele ajuda atu buka-hatene kona-ba governu nia ajuda. Sira mós bele ajuda oan neʼebé boot ona hodi fó informasaun ba sira kona-ba inan-aman nia tusan ruma ka kona-ba sira-nia ai-moruk. Informasaun hanesan neʼe bele ajuda família atu rezolve problema sira lalais. Kuandu iha ema neʼebé fó apoia no fó konsellu ba oan sira neʼebé hela dook, ida-neʼe bele ajuda atu situasaun la sai aat liu no ajuda oan sira-neʼe atu la hanoin barak demais.
16. Ajuda saida deʼit mak ema kristaun balu iha kongregasaun fó?
16 Tanba domin, ema kristaun balu uza sira-nia tempu no forsa neʼebé sira iha atu fó ajuda ba belun neʼebé idade ona. Sira tau matan ba ferik-katuas sira-neʼe hanesan sira-nia família rasik. No atu fó ajuda ba katuas-ferik, iha mós maluk kristaun sira neʼebé troka malu hodi tau matan ba sira. Maski sira rasik nia situasaun la husik sira atu serbí Maromak tempu tomak, maibé sira kontente atu ajuda katuas-ferik sira-neʼe nia oan atu kontinua halo serbisu tempu tomak ba Maromak. Neʼe mak hahalok diʼak neʼebé ita presiza gaba! Klaru katak sira-nia laran-diʼak neʼe la halo oan sai livre husi responsabilidade atu halo buat neʼebé sira bele halo hodi tau matan ba inan-aman.
HATUDU RESPEITU BA SIRA NEʼEBÉ IDADE ONA LIUHUSI LIAFUAN
17, 18. Hahalok saida deʼit mak importante ba ema neʼebé idade ona no mós sira neʼebé tau matan?
17 Ema neʼebé idade ona no mós sira neʼebé tau matan ba sira bele hakaʼas an atu halo situasaun sai ksolok liu hodi hatudu hahalok diʼak. Dala ruma, ema neʼebé idade ona sai laran-tun tebes, ka karik sente depresaun. Tan neʼe, ita presiza hakaʼas an atu hatudu respeitu no fó laran-manas ba sira. Oinsá mak ita bele halo ida-neʼe? Dalan ida mak hodi gaba ita-nia maluk sira neʼebé kleur ona serbí Maromak ho laran-metin. Maromak Jeová la haluha buat neʼebé sira halo ona atu serbí nia, entaun ita mós tenke halo hanesan neʼe.—Lee Malaquias (Maleakhi) 3:16; c Ebreu 6:10.
18 Liután neʼe, se ema neʼebé idade ona ka ema neʼebé ajuda mak halo kómiku uitoan iha tempu neʼebé loos, ida-neʼe bele halo susar loroloron nian sai kmaan liu. (Eclesiastes [Pengkhotbah] 3:1, 4) Katuas-ferik balu hakaʼas an atu la husu buat barak. Sira hatene katak se sira hatudu laran-diʼak, ema barak sei gosta atu vizita sira. Dala barak ema neʼebé vizita dehan: “Haʼu bá atu fó laran-manas ba haʼu-nia maluk ida neʼebé idade ona, maibé ikusmai haʼu mak sente laran-manas fali.”—Provérbios (Amsal) 15:13; 17:22.
19. Saida mak bele ajuda ita hotu atu tahan hasoru ita-nia susar?
19 Ita hotu hein namanas ba tempu neʼebé la iha tan susar no problema sira. Maibé antes tempu neʼe, Maromak nia atan sira tenke kontinua kaer metin ba esperansa neʼebé rohan-laek. Ita-nia fiar ba Maromak nia promete mak hanesan ankor iha tempu susar nia laran. Ita-nia fiar halo ita ‘la rende an. Maski ita-nia isin sai fraku iha liʼur, maibé iha laran ita simu kbiit foun loroloron’. (2 Korinto 4:16-18; Ebreu 6:18, 19) Maibé saida tan mak bele ajuda ita atu tau matan ba ema neʼebé idade ona? Iha lisaun tuirmai ita sei koʼalia kona-ba neʼe.
a Salmo 71:17, 18: “17 Oh Maromak, Ita mak hanorin haʼu husi haʼu-nia tempu joven, no toʼo agora haʼu nafatin fó-hatene kona-ba buat furak oioin neʼebé Ita halo. 18 Toʼo haʼu katuas no fuuk mutin, oh Maromak, keta soe hela haʼu. Husik haʼu atu fó-hatene jerasaun tuirmai kona-ba ita-nia kbiit, no kona-ba Ita-nia forsa ba sira hotu neʼebé atu mai.”
b Lisaun tuirmai sei koʼalia kona-ba dalan balu neʼebé diʼak ba katuas-ferik sira no oan sira atu apoia malu.
c Malaquias 3:16: “Iha tempu neʼebá, sira neʼebé taʼuk ba Jeová koʼalia ba malu, sira ida-idak ho nia maluk, no Jeová kontinua atu see tilun no rona ba sira. No iha nia oin komesa hakerek livru ida hodi hanoin-hetan sira neʼebé taʼuk ba Jeová no ba sira neʼebé hanoin kona-ba nia naran.”
