Orasaun

6 Bele ajuda ita ka lae?

ORASAUN bele ajuda ita ka lae? Tuir Bíblia, resposta mak “sin”. Bíblia hatudu katak orasaun sei ajuda duni Maromak nia atan sira. (Lucas 22:40; Tiago 5:13) Tuir loloos, orasaun ajuda ita atu sente besik ho Maromak, sente kontente iha laran, no iha saúde diʼak. Oinsá?

Entaun, hanoin toʼok situasaun ida-neʼe: Ita-nia oan simu prezente ruma. Ita hanorin nia atu sente deʼit agradese ba ema neʼebé fó prezente neʼe? Ka, Ita hanorin nia atu fó sai agradese neʼe? Kuandu ita fó sai ita-nia sentimentu kona-ba buat neʼebé diʼak, neʼe ajuda ita atu hatene klaru liután oinsá ita loloos sente, no ida-neʼe mós bele ajuda ita atu haburas liután sentimentu neʼe. Hanesan neʼe mós kuandu ita koʼalia ba Maromak. Mai ita hanoin kona-ba ezemplu balu.

Orasaun atu fó-agradese. Kuandu ita fó-agradese ba buat diʼak neʼebé akontese mai ita, ita hanoin kona-ba bensaun sira neʼebé ita simu husi ita-nia Aman. Ida-neʼe ajuda ita atu hafolin liután buat neʼebé Maromak halo mai ita, sai kontente liután, no sente hakmatek.—Filipe 4:6.

Ezemplu: Jesus hatoʼo agradese ba nia Aman tanba Aman rona no hatán ba ninia orasaun.—Joao 11:41.

Orasaun atu husu perdua. Kuandu ita husu Maromak atu fó perdua ba ita-nia sala, ida-neʼe ajuda ita atu komprende katak sala neʼebé ita halo lori rezultadu aat. No mós husu perdua bele book ita-nia laran atu hakribi duni sala neʼe, no book ita atu la halo tan sala neʼe. Liután neʼe, hodi husu Maromak nia perdua, ita bele sente kmaan no hakmatek iha laran.

Ezemplu: David fó sai ninia sala ba Maromak hodi hatudu katak nia arrepende an duni.—Salmo (Mazmur) 51.

Orasaun atu husu matadalan no matenek. Kuandu ita husu Maromak Jeová atu hatudu matadalan mai ita no husu matenek atu halo desizaun neʼebé diʼak, ida-neʼe ajuda ita atu haraik an. Orasaun hanesan neʼe ajuda ita atu hanoin-hetan katak ita presiza duni Maromak nia ajuda no book ita atu tau fiar ba ita-nia Aman iha lalehan.—Provérbios (Amsal) 3:5, 6.

Ezemplu: Salomão husu ho haraik-an atu Maromak fó ba nia matadalan no matenek atu ukun nasaun Israel.—1 Reis (1 Raja-Raja) 3:5-12.

Orasaun iha susar laran. Se ita hatoʼo ita-nia sentimentu ba Maromak kuandu ita laran-susar, ida-neʼe ajuda ita atu sente kmaan no sadere ba Maromak Jeová duké ita-nia kbiit rasik.—Salmo (Mazmur) 62:8.

Ezemplu: Liurai Asa halo orasaun kuandu hasoru inimigu sira neʼebé forte liu ninia nasaun.—2 Crônicas (2 Tawarikh) 14:11.

Orasaun kona-ba ema seluk nia diʼak. Orasaun hanesan neʼe ajuda ita atu la hanoin demais kona-ba ita-nia an rasik, no ajuda mós ita atu hanoin kona-ba ema seluk nia sentimentu.

Ezemplu: Jesus halo orasaun hodi husu Maromak nia tulun ba ninia dixípulu sira.—Joao 17:9-17.

Orasaun atu hahiʼi Maromak. Kuandu ita hahiʼi Maromak Jeová tanba buat diʼak neʼebé nia halo no mós tanba ninia hahalok furak sira, ita sei hafolin no agradese liután ba nia. Orasaun hanesan neʼe mós ajuda ita atu hakbesik liután ba ita-nia Aman Maromak.

Ezemplu: David hahiʼi Maromak nuʼudar Kriadór ba buat hotu-hotu.—Salmo (Mazmur) 8.

Halo orasaun bele lori bensaun ida tan, neʼe mak dame neʼebé Maromak sei rai hela iha ita-nia fuan no laran. (Filipe 4:7) Sin, bensaun neʼe kapás tebes tanba la fasil atu sente dame iha laran kuandu ita moris iha mundu neʼebé nakonu ho susar. Sente dame mós ajuda ita atu iha saúde neʼebé diʼak. (Provérbios [Amsal] 14:30) Maibé, orasaun deʼit toʼo ona ka lae, atu hetan buat diʼak sira-neʼe? Ka, iha buat seluk tan neʼebé importante liu?

[Liafuan ne’ebé foti husi pájina 10]

Orasaun ajuda ita atu sente kontente iha laran, iha saúde diʼak, no liuliu sente besik ho Maromak

[Dezeñu iha pájina 10]