Armagedon ema balu hanoin saida kona-ba neʼe?

“Sira bolu liurai sira hamutuk iha fatin ida naran ‘Armagedon’ lia ema ebreu sira-nian.”—APOKALIPSE 16:16.

KUANDU Ita rona liafuan “Armagedon”, Ita hanoin kona-ba saida? Karik Ita hanoin kona-ba dezastre boot. Maski liafuan neʼe mosu dala ida deʼit iha Bíblia, maibé televizaun, rádiu no ulun-naʼin relijiaun sira temi beibeik liafuan neʼe.

Ema barak nia hanoin kona-ba Armagedon hanesan ho buat neʼebé Bíblia hanorin ka lae? Importante atu hatene resposta ba pergunta neʼe. Tanbasá? Tanba lia-loos kona-ba Armagedon bele halo ita livre husi taʼuk, fó esperansa mai ita kona-ba futuru, no ajuda ita iha hanoin neʼebé loos kona-ba Maromak.

Hanoin toʼok kona-ba pergunta tolu tuirmai, no kompara ema barak nia hanoin kona-ba Armagedon ho buat neʼebé Bíblia loloos hanorin kona-ba neʼe.

  1. ARMAGEDON MAK DEZASTRE NEʼEBÉ EMA HAMOSU KA LAE?

Dala barak jornalista no ema matenek sira uza liafuan “Armagedon” atu koʼalia kona-ba dezastre boot neʼebé ema hamosu. Porezemplu, ema koʼalia kona-ba Funu Mundiál Primeiru no Segundu nuʼudar Armagedon. Depois funu sira-neʼe, ema barak taʼuk katak Estadus Unidus no Uniaun Soviétika sei uza bomba atu ataka malu. Iha tempu neʼebá, televizaun no jornál sira uza liafuan “Armagedon nukleár” atu koʼalia kona-ba buat neʼebé bele mosu entre nasaun sira-neʼe. Ohin loron, ema matenek sira hanoin katak poluisaun sei halo mudansa boot iha ambiente no sira dehan katak ida-neʼe bele hamosu “Armagedon ambiente”.

Sira-nia hanoin hatudu saida? Sira-nia hanoin neʼe hatudu katak ema mak kontrola mundu nia futuru no buat moris hotu iha mundu. Se governu sira la halo buat ida, mundu sei hetan estraga toʼo la bele hadiʼa ona.

Saida mak Bíblia hanorin? Maromak sei la husik ema atu kontinua estraga mundu. Bíblia hatete katak Jeová * la kria rai “ho saugati deʼit”. Tuir loloos, “nia halo mundu hodi ema hela iha mundu neʼe”. (Isaías [Yesaya] 45:18) Duké husik ema estraga mundu neʼe ba nafatin, Maromak sei “halo aat sira hotu neʼebé halo aat raiklaran neʼe”.—Apokalipse 11:18.

2. ARMAGEDON MAK DEZASTRE NATURÁL KA LAE?

Dala ruma jornalista sira uza liafuan “Armagedon” atu koʼalia kona-ba dezastre naturál boot. Porezemplu, iha tinan 2010, jornál ida koʼalia kona-ba “‘Armagedon’ iha Haití”. Jornál neʼe koʼalia kona-ba rai-nakdoko makaʼas iha rai-Haití neʼebé hamosu terus, estraga uma barak, no halo ema barak mate. Jornalista no ema sira neʼebé halo filme uza liafuan “Armagedon” laʼós atu koʼalia deʼit kona-ba akontesimentu sira neʼebé liu tiha ona, maibé mós atu koʼalia kona-ba buat neʼebé sira hanoin sei akontese iha futuru. Porezemplu, sira uza liafuan “Armagedon” atu koʼalia kona-ba buat neʼebé sira hanoin bele akontese se asteroide, ka fatuk boot husi lalehan monu tun hodi kona rai.

Sira-nia hanoin hatudu saida? Sira-nia hanoin neʼe hatudu katak Armagedon bele mosu iha tempu naran deʼit no oho ema naran deʼit neʼebé la halo sala. No ema la bele halo buat ida atu proteje sira-nia an husi Armagedon.

Saida mak Bíblia hanorin? Armagedon la mosu iha tempu naran deʼit no la oho ema naran deʼit. Tuir loloos, iha Armagedon ema aat sira deʼit mak sei lakon. Bíblia promete katak lakleur tan ‘ema laran-aat sei la iha, no Ita sei hateke duni ba ninia fatin, no nia sei la iha’.—Salmo (Mazmur) 37:10.

3. MAROMAK SEI HALAKON RAI IHA ARMAGEDON KA LAE?

Ema barak neʼebé tuir relijiaun, fiar katak sei iha funu ikus entre buat neʼebé aat no buat neʼebé diʼak, no rezultadu husi ida-neʼe mak ita-nia planeta rai sei lakon. Organizasaun ida (Princeton Survey Research Associates) halo entrevista ba ema balu neʼebé tinan 21 ba leten iha Estadus Unidus no sira haree katak porsentu 40 fiar katak mundu sei lakon iha “funu Armagedon”.

Sira-nia hanoin hatudu saida? Sira-nia hanoin neʼe hatudu katak Maromak la planu atu ema hela iha rai ba nafatin, no katak rai neʼe mós sei la hela ba nafatin. Maromak kria ema ho planu katak ikusmai sira hotu sei mate.

Saida mak Bíblia hanorin? Bíblia hatete ho klaru katak Maromak “halo tiha rai iha fatin neʼebé metin; neʼebé sei la nakdoko toʼo tempu neʼebé la bele sura, ka ba nafatin”. (Salmo 104:5) Kona-ba ema sira neʼebé hela iha rai, Bíblia hatete: “Ema loos rasik sei simu rai, no sira sei moris ba nafatin iha neʼebá.”—Salmo 37:29.

Klaru katak ema barak nia hanoin kona-ba Armagedon la hanesan duni ho buat neʼebé Bíblia hanorin. Entaun, Bíblia hanorin lia-loos saida?

[Nota–rodapé]