Haʼu hetan dame no domin neʼebé loos

Esperiénsia Husi Egidio Nahakbria

Husi kiʼik haʼu sente ema hotu husik haʼu no la hadomi haʼu. Maibé, agora haʼu sente domin no hetan dame neʼebé loos. Oinsá mak ida-neʼe akontese? Haʼu sei esplika.

H AʼU moris mai iha tinan 1976 iha uma kiʼik ida iha foho iha Timor-Leste, neʼebé uluk parte husi rai-Indonézia. Haʼu mak oan númeru ualu husi ami naʼin-sanulu. Tanba haʼu-nia inan-aman kiak tebes no la bele tau matan ami hotu, sira hakiak haʼu-nia kaduak no sira husu haʼu-nia primu atu hakiak haʼu.

Antes haʼu moris, iha fulan-Dezembru tinan 1975, Indonézia tama atu okupa Timor-Leste. Ida-neʼe hamosu funu neʼebé laʼo ba tinan ruanulu liu. Tan neʼe, husi kiʼik kedas haʼu-nia esperiénsia mak violénsia no terus. Haʼu sei hanoin-hetan kuandu soldadu sira ataka ami-nia suku no halo ema hotu halai hodi salva sira-nia moris. Haʼu no haʼu-nia primu halai ba foho ida neʼebé Timór-oan rihun ba rihun mós subar iha neʼebá.

Maibé, soldadu sira hetan fatin neʼebé ami subar, nuneʼe lakleur deʼit, inimigu sira ataka ami ho bomba. Ida-neʼe estraga buat barak no halo ema barak mate, neʼe halo haʼu taʼuk tebetebes. Kuandu ami fila fali ba ami-nia suku, haʼu sempre sente taʼuk. Ami-nia viziñu barak lakon ka mate, no haʼu taʼuk katak haʼu mós sei mate.

Kuandu haʼu tinan sanulu, haʼu-nia primu sai moras no mate. Nuneʼe haʼu-nia inan-aman haruka haʼu atu hela ho haʼu-nia avó-feto. Haʼu-nia avó mak faluk ida neʼebé hasoru situasaun aat barak iha ninia moris, no nia haree haʼu nuʼudar buat neʼebé todan ba nia. Nia trata haʼu hanesan atan ida. Loron ida, haʼu moras todan no la bele serbisu, haʼu-nia avó baku haʼu no husik haʼu toʼo besik mate. Depois neʼe, haʼu-nia tiu ida lori haʼu atu hela ho ninia família.

Kuandu haʼu tinan 12, haʼu foin tama eskola. Lakleur depois neʼe, haʼu-nia tiu nia feen sai moras, no haʼu-nia tiu sai laran-tun tebes. Tanba haʼu lakohi fó todan tan ba sira, haʼu halai no haʼu tuir soldadu sira husi Indonézia neʼebé hela iha ai-laran. Haʼu sai sira-nia serbisu-naʼin, haʼu fase sira-nia roupa, teʼin hahán, no hamoos sira-nia fatin. Soldadu sira-neʼe haree haʼu diʼak, no haʼu sente katak haʼu iha folin. Maibé fulan balu liu tiha, haʼu-nia família hetan haʼu no sira husu soldadu sira atu haʼu bele fila fali ba haʼu-nia suku.

 Mete iha problema polítiku

Depois haʼu ramata sekundária, haʼu muda bá Timor-Leste nia sidade kapitál, Dili, atu eskola iha universidade. Iha neʼebá haʼu hasoru joven barak neʼebé iha esperiénsia hanesan haʼu. Ami hanoin katak liuhusi polítiku deʼit mak situasaun bele troka no ami-nia rai bele hetan independénsia. Ami organiza demonstrasaun barak. No dala barak demonstrasaun sira-neʼe hamosu violénsia. Haʼu-nia kolega barak hetan kanek no balu mate.

Ikusmai Timor-Leste hetan independénsia iha tinan 2002, maibé buat hotu iha rai laran sobu tiha ona no ema rihun ba rihun lakon sira-nia uma ka mate. Haʼu hein katak situasaun iha haʼu-nia rai sai diʼak. Maibé iha tempu neʼe ema sei kiak, la iha serbisu, no problema kona-ba buat polítiku nian kontinua nafatin.

Haʼu hetan dalan foun

Iha tempu neʼe, haʼu hela ho haʼu-nia família seluk, inklui mós haʼu-nia sobriñu ida naran Andre. Andre estuda Bíblia ho Testemuña ba Jeová. Nuʼudar ema katóliku ida, haʼu la gosta katak haʼu-nia família ida envolve an iha relijiaun seluk. Maski nuneʼe, haʼu hakarak hatene kona-ba Bíblia, no dala ruma haʼu lee Andre nia Bíblia neʼebé nia rai iha ninia kuartu. Buat neʼebé haʼu lee, kona duni haʼu-nia laran no book haʼu atu hakarak hatene liután.

Iha tinan 2004, Andre fó konvite mai haʼu atu tuir Memoriál hodi komemora Jesus nia mate. Haʼu deside atu tuir. Tanba haʼu lee sala konvite, haʼu toʼo sedu iha reuniaun-fatin oras rua antes programa komesa. Kuandu Testemuña sira toʼo reuniaun-fatin, sira neʼebé Timór-oan no mós malae, kaer-liman ho haʼu no sira hotu simu haʼu. Ida-neʼe halo haʼu hakfodak. Durante diskursu, haʼu hakerek iha haʼu-nia nota eskritura hotu neʼebé diskursu-naʼin temi. Kuandu haʼu fila uma, haʼu lee eskritura sira-neʼe husi haʼu-nia Bíblia rasik atu haree se buat neʼebé diskursu-naʼin hatete, neʼe loos ka lae. Afinál neʼe loos duni.

Semana tuirmai, haʼu tuir misa iha haʼu-nia igreja. Tanba ami balu toʼo tarde, padre foti ai-sanak no ho hirus duni sai ami husi igreja. Nuʼudar ami hamriik iha liʼur, padre ramata misa ho liafuan tuirmai neʼe: “Jesus nia dame hela ho imi.” Feto brani ida hatán ho lian makaʼas: “Ita foin duni sai ema sira-neʼe husi igreja, no agora Ita koʼalia kona-ba dame?” Padre la rona. Haʼu husik tiha igreja no nunka fila fali.

Lakleur depois neʼe, haʼu komesa estuda Bíblia no tuir reuniaun husi Testemuña sira hamutuk ho Andre. Ami-nia família rona kona-ba neʼe no sira komesa kontra ami. Andre nia avó-feto ameasa ami hodi hatete: “Haʼu sei keʼe kuak no hakoi imi naʼin-rua se imi kontinua estuda ho relijiaun foun neʼe.” Maibé, neʼe la halo ami taʼuk. Ami hakarak duni atu laʼo ba oin hodi aprende kona-ba Bíblia.

Haʼu halo mudansa

Nuʼudar haʼu estuda Bíblia, haʼu bele haree katak iha haʼu-nia moris, haʼu nunka sente domin. Haʼu ema siʼak, ulun-toos, no susar ba haʼu atu tau fiar ba ema seluk. Maski nuneʼe, Testemuña sira hatudu interese mai haʼu. Kuandu haʼu sai moras no haʼu-nia família la tau matan mai haʼu, Testemuña sira vizita no ajuda haʼu. Sira-nia domin ba ema laʼós “ho liafuan deʼit” maibé sira hadomi ema “ho hahalok no lia-loos”.—1 Joao 3:18.

Maski ema seluk haree haʼu hanesan ema siʼak-teen, maibé Testemuña sira haree haʼu diʼak, sira “hanoin” haʼu no hatudu “domin” mai haʼu. (1 Ped 3:8) Ba dala primeiru iha haʼu-nia moris, haʼu komesa sente katak ema hadomi haʼu. Neʼe halo haʼu-nia hahalok sai mamar, no haʼu komesa haburas domin ba Maromak no ba ema seluk. Ikusmai, iha fulan-Dezembru tinan 2004, haʼu hatudu ba ema seluk katak haʼu dedika ona haʼu-nia moris ba Maromak Jeová hodi hetan batizmu. Lakleur, Andre mós hetan batizmu.

Simu bensaun sira maski iha susar

Depois haʼu hetan batizmu, haʼu-nia hakarak atu ajuda ema neʼebé nunka hatene kona-ba domin neʼebé loos no justisa, sai makaʼas tebes. Tan neʼe, haʼu komesa serbí Maromak tempu-tomak. Testemuña ba Jeová bolu serbisu neʼe nuʼudar pioneiru. Haʼu sente katak hola parte iha serbisu atu fahe mensajen husi Bíblia, halo haʼu sente kmaan liu duké hola parte iha demonstrasaun sira kona-ba polítiku no envolve an iha violénsia. Agora, haʼu ajuda ema iha dalan neʼebé diʼak liu.

Iha tinan 2006, krize mosu fali iha Timor-Leste. Problema kona-ba polítiku no odi malu  hamosu fali funu. Buat hotu iha sidade Dili sai runguranga. Ema barak husi lorosaʼe neʼebé hela iha Dili halai ba sira-nia rai atu salva sira-nia moris. Haʼu, hamutuk ho Testemuña balu, ami muda ba sidade naran Baucau, maizumenus dook kilómetru 120 husi Dili. Maski ami-nia situasaun iha neʼebá susar uitoan, maibé ami simu bensaun. Ami harii kongregasaun foun iha neʼebá, kongregasaun segundu iha Timor-Leste.

Liu tiha tinan tolu, iha tinan 2009, haʼu simu konvite atu tuir eskola espesiál ba sira neʼebé serbí Maromak tempu-tomak. Haʼu tuir eskola neʼe iha Jakarta, Indonézia. Testemuña sira iha Jakarta simu haʼu iha sira-nia uma no iha sira-nia fuan-laran. Sira-nia domin neʼebé loos book duni haʼu. Haʼu sente katak haʼu parte husi “maun-alin” neʼebé hanesan “família” boot iha mundu tomak, neʼebé hadomi tebes haʼu.—1 Ped 2:17.

Ikusmai haʼu hetan dame

Kuandu eskola neʼe ramata, haʼu fila fali ba Baucau, no toʼo agora haʼu hela nafatin iha neʼebá. Haʼu kontente tebes atu ajuda ema iha fatin neʼe atu hatene kona-ba Maromak, hanesan Testemuña sira halo tiha ona ba haʼu. Porezemplu, iha suku ida, dook uitoan husi Baucau, haʼu ho maluk Testemuña balu, ami hanorin Bíblia ba ema maizumenus naʼin-20, inklui mós ferik-katuas balu neʼebé la hatene lee no hakerek. Ema naʼin-20 neʼe, tuir reuniaun semana-semana, no naʼin-tolu husi sira sai ona ami-nia “família” hodi hetan batizmu no sai Testemuña ba Jeová.

Tinan balu liubá, haʼu hasoru feto laran-diʼak ida naran Felizarda. Nia simu lia-loos husi Bíblia no lakleur deʼit hetan batizmu. Ami kaben iha tinan 2011. Haʼu kontente atu fó-hatene katak haʼu-nia sobriñu Andre serbí iha Testemuña ba Jeová nia eskritóriu iha Timor-Leste. Haʼu mós kontente tanba ema barak husi ami-nia família, inklui Andre nia avó-feto neʼebé hakarak hakoi ami, agora respeitu ami-nia fiar.

Uluk, haʼu sempre hirus, no sente katak ema la bele hadomi haʼu. Maibé haʼu agradese ba Maromak Jeová, tanba agora haʼu hetan dame no domin neʼebé loos.

[Dezeñu iha pájina 19]

Kuandu Egidio sei mete iha problema polítiku nian

[Dezeñu iha pájina 21]

Egidio no Felizarda hamutuk ho maluk sira husi kongregasaun Baucau, Timor-Leste