KUANDU Jesus moris iha mundu, nia haleno iha dalan kompletu ninia Aman iha lalehan nia hahalok sira. Jesus hatete: “Haʼu la halo buat ida hodi haʼu rasik, maibé haʼu koʼalia buat hirak-neʼe nuʼudar Aman hanorin haʼu . . . haʼu halo nafatin buat neʼebé fó ksolok ba Nia.” (Joao 8:28, 29; Koloso 1:15) Nuneʼe, hodi hatene kona-ba hahalok neʼebé Jesus hatudu ba feto sira, ita bele komprende Maromak nia haree kona-ba feto sira no saida mak ninia hakarak ba sira.

Husi buat neʼebé hakerek iha Evanjellu sira, matenek-naʼin barak sente katak Jesus nia haree kona-ba feto sira mak la hanesan duni ho ema seluk nia hanoin iha tempu neʼebá. Iha dalan saida deʼit mak la hanesan? No importante liu, Jesus nia hanorin nafatin fó liberdade ba feto sira ohin loron ka lae?

Jesus la haree feto sira nuʼudar buat neʼebé atu tenta mane sira. Ulun-naʼin balu husi relijiaun judeu nian, dehan katak se mane sira koʼalia ba feto, ida-neʼe bele book sira atu haburas hakarak seksuál nian. Entaun, tanba ema haree feto sira nuʼudar tentasaun, sira la husik feto atu koʼalia ho mane iha fatin públiku ka atu laʼo bá-mai iha liʼur se la uza veu. Maibé buat neʼebé Jesus halo, la hanesan. Duké haruka feto sira atu haketak  sira-nia an husi ema seluk, Jesus haruka mane sira atu kontrola sira-nia hakarak isin nian no atu hatudu respeitu ba feto sira.—Mateus 5:28.

Tuir ema judeu barak, halo sala-foʼer hasoru feen mak laʼós buat neʼebé sala. Sira-nia Rabbi hanorin katak laʼen ida nunka halo sala-foʼer hasoru ninia feen tanba feen deʼit mak ida neʼebé la hatudu laran-metin. Maibé Jesus hatete: “Mane ida neʼebé soe nia kaben no hola feto seluk halo [sala-foʼer] hasoru nia.” (Marcos 10:11, 12) Jesus nia liafuan neʼe hatudu katak nia la simu amlulik judeu sira-nia hanorin neʼebé husik mane sira atu soe sira-nia feen ho razaun “naran deʼit”. (Mateus 19:3, 9) Livru ida neʼebé esplika Jesus nia liafuan iha Marcos 10:11, 12, hatete katak iha eskritura neʼe “Jesus fó ba laʼen sira responsabilidade neʼebé hanesan ho sira-nia feen, no ida-neʼe hatudu katak feto sira mós iha folin no iha dignidade”.

Oinsá Jesus nia hanorin kona ema kristaun ohin loron: Iha Testemuña ba Jeová nia kongregasaun sira, feto hotu iha liberdade atu halibur hamutuk ho mane sira iha sira-nia reuniaun. Sira la presiza taʼuk katak mane sira sei hatún sira ka mane sira sei besik demais sira ho razaun neʼebé la loos. Tanba mane kristaun hotu haree ‘ferik sira hanesan sira-nia inan, haree feto-raan sira ho laran-moos, hanesan sira-nia feton sira’.—1 Timoteo 5:2.

Jesus uza tempu atu hanorin feto sira. La hanesan ho amlulik judeu sira-nia hanoin neʼebé la husik feto sira atu hatene buat ida, Jesus sempre hanorin feto sira no nia hakarak sira atu fó sai sira-nia hanoin. Kuandu Jesus dehan katak nia lakohi atu Maria lakon oportunidade atu aprende husi nia, Jesus hatudu katak feto sira laʼós deʼit atu serbisu iha dapur. (Lucas 10:38-42) Maria nia biin, Marta, mós simu hanorin barak husi Jesus. Ita bele hatene ida-neʼe husi dalan neʼebé nia hatán ba Jesus ho matenek kuandu Lázaro mate.—Joao 11:21-27.

Jesus hafolin feto sira-nia hanoin. Iha tempu neʼebé Jesus moris iha mundu, feto judeu sira fiar katak xave atu sai kontente mak atu iha oan-mane neʼebé iha naran-boot, karik hanesan profeta ida. Kuandu feto ida hakilar hodi dehan ba Jesus: “Ksolok ba knotak neʼebé koʼus Ita,” Jesus uza oportunidade neʼe atu fó-hatene ba feto neʼe kona-ba buat neʼebé diʼak liu. (Lucas 11:27, 28) Hodi dehan katak halo tuir Maromak mak importante liu, Jesus hatudu ba feto neʼe katak iha buat seluk neʼebé importante liu fali kostume atu iha oan-mane.—Joao 8:32.

Oinsá Jesus nia hanorin kona ema kristaun ohin loron: Sira neʼebé hetan knaar atu hanorin iha kongregasaun kristaun, simu feto sira-nia komentáriu iha reuniaun kongregasaun nian. Sira hatudu respeitu ba feto sira neʼebé iha esperiénsia barak ona tanba sira “sai mestra diʼak” ho sira-nia ezemplu iha tempu hotu. (Tito 2:3) Sira mós presiza feto sira-nia ajuda atu haklaken liafuan  diʼak kona-ba Maromak nia Ukun.—Salmo (Mazmur) 68:11; haree kaixa “Apóstolu Paulo bandu feto sira atu koʼalia ka lae?” iha pájina 9.

Jesus hanoin no tau matan ba feto sira. Iha tempu Bíblia, ema hafolin liu oan-mane duké oan-feto. Livru Talmude mós apoia ideia ida-neʼe. Livru neʼe hatete: “Kontente ba nia neʼebé ninia oan mak mane, no triste ba nia neʼebé ninia oan mak feto.” Inan-aman balu haree sira-nia oan-feto nuʼudar buat neʼebé todan tanba sira sei presiza atu buka laʼen ba nia no fó folin, no sira la bele depende ba nia atu apoia sira kuandu sira sai ferik-katuas.

Jesus hatudu katak feto nia moris mós importante hanesan mane nian. Porezemplu, Jesus fó moris hiʼas ba Jairo nia oan-feto hanesan nia fó moris hiʼas ba feto-faluk nia oan-mane. (Marcos 5:35, 41, 42; Lucas 7:11-15) Jesus mós fó isin-diʼak ba “feto neʼebé espíritu aat ida halo moras tinan sanulu-resin-ualu”, no Jesus bolu feto neʼe “Abraão nia oan-feto”. Iha ema judeu sira-nia livru, sira nunka bolu feto iha dalan hanesan neʼe. (Lucas 13:10-16, MF) Hodi bolu feto neʼe “Abraão nia oan-feto”, Jesus hatudu laran-diʼak no respeitu ba nia, no Jesus hatudu katak hanesan ema hotu, feto neʼe mós ema importante iha komunidade. Ho liafuan neʼe Jesus mós rekoñese katak feto neʼe iha fiar neʼebé boot.—Lucas 19:9; Galasia 3:7.

Oinsá Jesus nia hanorin kona ema kristaun ohin loron: Lia-dadolin ida iha rai-Ásia hatete: “Haboot oan-feto mak hanesan rega viziñu nia jardín.” Neʼe katak soe tempu deʼit atu haboot oan-feto. Maibé aman kristaun sira neʼebé hadomi sira-nia oan nunka iha hanoin hanesan neʼe. Sira tau matan ba sira-nia oan hotu, katak oan-mane no oan-feto sira. Inan-aman kristaun sira tenke haree katak sira-nia oan hotu simu buat neʼebé sira presiza atu hetan edukasaun neʼebé diʼak no atu iha saúde diʼak.

Jesus tau fiar ba feto sira. Iha tribunál ema judeu sira-nian, ema haree feto sira-nia testemuña nuʼudar la bale buat ida, hanesan deʼit ho atan nia testemuña. Matenek-naʼin ida neʼebé moris iha apóstolu sira-nia tempu, naran Josefo hatete: “Labele simu evidénsia husi feto sira tanba sira ema neʼebé fraku.”

Maibé Jesus la hanesan duni. Jesus husik feto sira atu haree ho matan rasik ninia moris-hiʼas. (Mateus 28:1, 8-10) Maski feto sira-neʼe haree kuandu ema oho no hakoi sira-nia Naʼi, maibé apóstolu sira sente susar atu fiar ba feto sira-neʼe nia liafuan. (Mateus 27:55, 56, 61; Lucas 24:10, 11) Maibé kuandu Jesus moris-hiʼas ona, nia mosu uluk ba feto sira, neʼe hatudu katak nia tau fiar ba sira atu bele fó sasin kona-ba nia hanesan ninia dixípulu sira seluk.—Apostolu 1:8, 14.

 Oinsá Jesus nia hanorin kona ema kristaun ohin loron: Iha kongregasaun sira husi Testemuña ba Jeová, mane sira neʼebé hetan responsabilidade, hatudu respeitu ba feto sira hodi simu sira-nia hanoin kona-ba buat ruma. Nuneʼe mós, laʼen kristaun sira “hamtaʼuk” sira-nia feen hodi rona didiʼak ba sira.—1 Pedro 3:7; Gênesis (Kejadian) 21:12.

Kuandu mane sira banati-tuir Kristu nia ezemplu, feto sira sei simu respeitu no liberdade neʼebé Maromak hakarak fó ba sira horiuluk kedas. (Gênesis 1:27, 28) Duké haburas hanoin katak mane sira diʼak liu fali feto, laʼen kristaun sira husik Bíblia nia matadalan atu dirije sira, no ida-neʼe ajuda duni hodi sira-nia feen sente kontente.—Efeso 5:28, 29.

Kuandu feto ida naran Yelena komesa atu estuda Bíblia, nia hetan terus husi ninia laʼen neʼebé trata aat nia. Iha fatin neʼebé ninia laʼen sai boot, ema iha toman atu halo violénsia, no baibain sira naʼok feto neʼebé sira hakarak atu kaben. Yelena hatete: “Buat neʼebé haʼu aprende husi Bíblia fó forsa mai haʼu. Haʼu aprende katak iha ida neʼebé hadomi tebes haʼu, hafolin no tau matan mai haʼu. Haʼu komprende katak se haʼu-nia laʼen estuda Bíblia, neʼe sei ajuda nia troka ninia hahalok.” Yelena nia mehi neʼe sai loos kuandu ikusmai ninia laʼen simu atu estuda Bíblia no hetan batizmu nuʼudar Testemuña ba Jeová. Yelena hatete: “Nia hatudu ezemplu diʼak kona-ba kontrola an. Ami aprende atu fó perdua ba malu.” Nia hatutan tan: “Bíblia nia matadalan ajuda duni haʼu atu sente katak haʼu iha folin, no mós proteje ami-nia moris kaben nian.”—Koloso 3:13, 18, 19.

Yelena nia esperiénsia neʼe laʼós úniku. Feto kristaun rihun ba rihun kontente tanba sira no sira-nia laʼen hakaʼas an atu halo tuir Bíblia nia matadalan iha sira-nia moris kaben nian. Sira simu respeitu, sente kmaan, no iha liberdade iha sira-nia maluk kristaun nia leet.—Joao 13:34, 35.

Ema kristaun hotu, mane no feto, rekoñese katak sira mak parte husi Maromak nia kriasaun neʼebé sai sala-naʼin. Maibé, hodi haburas relasaun diʼak ho sira-nia Maromak no Aman, Jeová, sira iha esperansa atu “sai husi situasaun atan nian” no haksolok hodi “halo parte, nuʼudar Maromak nia oan, iha ema neʼebé laʼós atan nia kmanek”. Sin, ema hotu, mane hamutuk ho feto sira iha duni esperansa kapás husi Maromak.—Roma 8:20, 21.