Wainhira haʼu sei kiʼik, haʼu-nia família hela iha rai-Alemaña Leste, besik fronteira Repúblika Xeka no rai-Polónia nian. Haʼu sei tinan neen, ami komesa muda ona ba nasaun oioin tanba haʼu-nia aman nia serbisu. Ami muda tiha ba rai-Brazíl depois bá fali rai-Ekuadór.

Wainhira haʼu tinan 14, haʼu komesa tama asrama iha rai-Alemaña. Tanba haʼu-nia inan-aman hela dook iha Amérika Súl, haʼu tenke tau matan ba haʼu-nia an rasik. Neʼe halo haʼu toman atu halo buat hotu mesak deʼit. Haʼu ladún hanoin kona-ba ema seluk nia sentimentu.

No haʼu tinan 17, haʼu-nia inan-aman fila fali ba rai-Alemaña. Foufoun ami hela hamutuk maibé tanba haʼu toman hela mesak kleur ona, haʼu lakohi rona ba sira no la halo tuir sira. Ami problema hela deʼit. Tan neʼe bainhira haʼu tinan 18, haʼu sai tiha husi uma hodi hela ketak.

Haʼu komesa sente haʼu-nia moris hanesan vida laiha no haʼu hakarak buka objetivu neʼebé loloos ba haʼu-nia moris. Haʼu haree ema halaʼo moris oioin no iha grupu oioin neʼebé luta makaʼas atubele hadiʼa mundu neʼe. Haʼu-nia hanoin mak: ‘Diʼak liu ba haʼu atu laʼo lemo-rai haleʼu mundu furak neʼe no goza moris tiha deʼit, tanba lakleur tan ema sei estraga totál mundu neʼe.’

Depois haʼu sai husi rai-Alemaña, haʼu hola motór ida atu bá rai-Áfrika. Maibé haʼu tenke fila fali ba Europa tanba motór aat tiha iha dalan klaran no presiza hadiʼa. Depois haʼu toʼo tiha iha rai-Portugál. Loron ida, haʼu tuur mesak iha tasi-ibun no haʼu komesa hanoin: ‘Nuʼusá la husik tiha motór neʼe no saʼe deʼit ró mak bá?’

Haʼu hasoru joven balu neʼebé atu bá pasiar ho ró liuhusi Tasi-Boot Atlántiku. Entaun haʼu bá hamutuk ho sira. Joven sira-neʼe ida mak feto neʼebé ikusmai sai haʼu-nia ferik-oan. Nia naran Laurie. Primeiru ami bá pasiar iha illa sira iha Tasi Karibe, depois bá rai-Porturriku. Ida-neʼe hotu tiha ami fila fali ba Europa. Ami planu atu sosa ró kiʼik ida atu hadiʼa fali sai hanesan uma ida iha ró neʼebé bele hela. Maibé ami buka ba fulan tolu mós la hetan no planu neʼe labele sai loos tanba derrepente deʼit haʼu tenkesér bá fali rai-Alemaña atu tuir treinu militár.

 Haʼu tama forsa marítima ba fulan 15. Durante tempu neʼe, haʼu ho Laurie kaben no halo planu fali atu laʼo lemo haleʼu mundu. Bainhira ami seidauk kaben ami hola ró kiʼik ida neʼebé aat uitoan. Haʼu sei serbisu hela nuʼudar forsa marítima, iha tempu hanesan ami mós neineik-neineik hadiʼa fali ró neʼe. Ami-nia hanoin mak atu hela iha ró neʼe hodi bele pasiar tan haleʼu mundu furak neʼe. Depois haʼu-nia serbisu militár ramata tiha ona no ró neʼebé ami hadiʼa seidauk hotu, iha tempu neʼebá mak ami hasoru Testemuña ba Jeová no komesa estuda Bíblia.

Foufoun, haʼu sente haʼu-nia moris diʼak ona. Haʼu la presiza troka buat barak tanba haʼu kaben ona no para ona fuma sigarru. (Éfeso 5:5) Kona-ba ami-nia planu atu haleʼu mundu, haʼu hanoin neʼe mak objetivu diʼak liu tanba bele haree Maromak nia kriasaun hotu neʼebé furak.

Maibé tuir loloos haʼu presiza duni hadiʼa haʼu-nia moris, liuliu haʼu-nia hahalok. Tanba haʼu hanoin an deʼit, saida mak haʼu halo ona, haʼu-nia abilidade sira, neʼe halo haʼu foti-an no fiar an demais. Haʼu-nia hanoin hotu no moris tomak mak kona-ba haʼu-nia an deʼit.

Loron ida, bainhira haʼu lee Jesus nia liafuan iha Mateus kapítulu 5-7 haʼu sai bilán tiha. Ninia liafuan mak kona-ba oinsá ema bele hetan ksolok. Haʼu la komprende: ‘Tanbasá mak dehan ksolok ba sira neʼebé “hamlaha no hamrook”? (Mateus 5:6) Ema neʼebé hamlaha no hamrook mós bele moris haksolok ka?’ Maibé haʼu kontinua estuda Bíblia no neineik-neineik haʼu komprende, neʼe katak ita hotu presiza tebes matadalan husi Maromak, no ita tenke rekoñese ida-neʼe ho haraik an. Hanesan Jesus dehan: “Ksolok ba ema sira neʼebé kiak iha laran.”—Mateus 5:3, Liafuan diak ba imi, segunda edisaun.

Haʼu ho Laurie komesa estuda Bíblia iha rai-Alemaña, depois ami muda tiha ba rai-Fransa no muda fali ba rai-Itália. Iha fatin neʼebé deʼit mak ami bá, ami sempre buka atu hasoru Testemuña ba Jeová sira. Sira-nia domin ba malu no unidade halo haʼu gosta tebes sira. Haʼu haree katak sira mak hanesan família ida deʼit iha mundu tomak. (João 13:34, 35) Liutiha tempu balu, haʼu ho Laurie hetan batizmu no sai Testemuña ba Jeová.

Depois ami batizmu tiha, haʼu nafatin hakaʼas an hodi hadiʼa liután haʼu-nia hahalok. Haʼu ho Laurie saʼe ró dala ida tan liu Tasi-Boot Atlántiku besik rai-Áfrika atu bá rai-Estadus Unidus. Toʼo iha tasi klaran, ami naʼin-rua deʼit mak iha ró kiʼik laran, haʼu haree ba sorin-sorin tasi boot neʼe hanesan rohan la iha. Iha momentu neʼebá haʼu foin sente katak haʼu mak kiʼik tebetebes no la vale buat ida se kompara ho haʼu-nia Maromak Kriadór Boot. Loron ba loron liu daudaun iha ró laran haʼu iha tempu barak atu lee Bíblia. Haʼu gosta liu lee istória hotu kona-ba Jesus wainhira nia sei iha rai. Nia mak ema perfeitu, nunka iha sala no iha abilidade makaʼas tebes. Maibé nia nunka gaba an ka buka oin. Ninia moris tomak nia nunka buka diʼak deʼit ba nia an maibé sempre halo tuir ninia Aman iha lalehan nia hakarak.

Haʼu hanoin nafatin kona-ba Jesus nia ezemplu neʼe no kompara ho haʼu-nia an rasik. Haʼu foin komprende katak haʼu tenke buka uluk Maromak nia Ukun no labele hanoin ulukliu kona-ba haʼu-nia hakarak. (Mateus 6:33) Bainhira ami toʼo tiha iha rai-Estadus Unidus, ami deside atu hela metin iha neʼebá no hakarak adora Maromak ho ami-nia neon no kbiit tomak.

Uluk haʼu sadere deʼit ba haʼu-nia hanoin no fiar an demais. Neʼe halo haʼu-nia laran la hakmatek tanba haʼu sempre duvida kona-ba desizaun sira neʼebé haʼu halo. Maibé agora haʼu bele sadere ba Maromak nia matenek neʼebé nunka sala. (Isaías [Yesaya] 48:17, 18) Haʼu mós iha objetivu neʼebé loloos ba haʼu-nia moris. Neʼe mak adora Maromak Jeová no ajuda ema atu aprende kona-ba Nia.

Tanba ami halo tuir matadalan sira husi Bíblia, ami-nia moris kaben nian sai metin liután. Ami mós simu bensaun furak ida tan. Neʼe mak ami-nia oan-feto. Nia mós aprende barak no hadomi tebes Maromak Jeová.

Loloos ami-nia moris loron-loron nian laʼós diʼak hela deʼit, dala ruma mós ami hasoru susar. Maibé ho Maromak Jeová nia ajuda, ami laran-metin atu nunka husik ami-nia adorasaun no sadere nafatin ba Nia.—Provérbios (Amsal) 3:5, 6.