Karik Ita haree ona katak relijiaun barak fokus liu atu halibur osan duké ajuda ema atu adora Maromak. Porezemplu, sira halo promosaun no buka atu hetan osan. No mós, relijiaun barak nia ulun-naʼin hetan saláriu boot no moris diʼak. Haree toʼok ezemplu tuirmai neʼe:

•   Investigasaun ida hatete, bispu ida husi igreja Katólika uza igreja nia osan ba ninia an rasik. Durante tinan 13, nia halo viajen ho aviaun privadu besik dala 150 no aluga karreta luxu (limosin) maizumenus dala 200. Nia mós gasta osan dolar millaun haat atu hadiʼa igreja nia uma neʼebé nia hela.

•   Ulun-naʼin igreja ida iha Áfrika halo beibeik atividade relijiaun nian neʼebé ema rihun ba rihun mak tuir. Iha ninia igreja, nia faʼan sasán oioin hanesan mina milagre nian, toalla, no faru neʼebé iha dezeñu ho ninia oin. Ulun-naʼin neʼe riku tebes, maibé maioria husi ninia membru mak moris kiak.

•   Iha foho santu haat ba ema Buda iha Xina, maibé husi foho haat neʼe foho rua kompañia boot sira mak uza atu halaʼo bisnis. Templu Shaolin neʼebé famozu mós envolve iha projetu bisnis barak. Ema koñese ulun-naʼin ba templu neʼe nuʼudar “biksu CEO” (biksu neʼebé mós nuʼudar diretór bisnis nian).

•   Iha Amérika, kompañia barak selu ema atu halaʼo rituál relijiaun nian no fó matadalan espirituál ba sira-nia serbisu-naʼin.

 Ita sente oinsá ho relijiaun sira neʼebé envolve ho bisnis? Tuir Ita-nia hanoin, Maromak sente oinsá kona-ba ema sira neʼebé koko hetan lukru liuhusi atividade relijiaun nian?

 Maromak la kontente kuandu kahur relijiaun ho bisnis. Bíblia hatete iha tempu uluk Maromak hirus ba amlulik sira neʼebé dehan sira reprezenta Nia maibé “simu kolen”. (Miqueias 3:11) Maromak la kontente ho ema kaan-teen sira neʼebé halo ninia fatin adorasaun sai fali nuʼudar “naʼok-teen sira-nia knuuk”.—Jeremias 7:11.

 Hanesan Maromak, Jesus mós hakribi ema neʼebé uza relijiaun atu hetan lukru ba sira-nia an rasik. Iha Jesus nia tempu, ulun-naʼin relijiaun sira hetan lukru hodi fó lisensa ba negósiu-naʼin kaan-teen sira atu halo negósiu iha templu iha Jeruzalein. Negósiu-naʼin sira hamatak ema neʼebé mai atu halaʼo adorasaun. Jesus ho brani duni negósiu-naʼin sira sai husi templu, hodi dehan: “Keta halo haʼu-nia Aman nia uma sai fali fatin negósiu nian!”—João 2:14-16.

 Jesus hatene katak Maromak lakohi nia atu hetan lukru husi ninia knaar. (João 8:28, 29) Nia nunka husu osan bainhira hanorin ema barak kona-ba Maromak ka halo milagre, hanesan fó ai-han ba ema neʼebé hamlaha, kura ema moras, no fó moris-hiʼas ba ema mate. Jesus nunka uza ninia knaar atu sai riku. Nia mós la iha uma.—Lucas 9:58.

 Jesus lakohi ninia dixípulu sira atu buka lukru husi sira-nia knaar. Nia hatete: “Imi simu hodi la selu, tan neʼe fó mós hodi la hein atu ema selu imi.” (Mateus 10:8) Jesus nia dixípulu sira neʼebé ikusmai sai ema Kristaun, halo tuir Jesus nia mandamentu neʼe. Haree toʼok ezemplu tuirmai:

•   Mane ida naran Simão oferese osan ba apóstolu Pedro tanba nia hakarak hetan podér no pozisaun boot. Pedro korrije kedas nia, hodi hatete: “Ó-nia osan-mutin sei lakon hamutuk ho ó, tanba ó hanoin katak ho osan mak ó bele hetan Maromak nia prezente neʼebé la presiza selu.”—Apóstolu 8:18-20.

•   Apóstolu Paulo mak ema ida neʼebé badinas haklaken kona-ba liafuan diʼak iha fatin oioin. Ba tinan barak nia serbisu makaʼas ba kongregasaun Kristaun barak, maibé nia nunka buka atu hetan lukru. Nia no ninia maluk Kristaun sira “la faʼan Maromak nia liafuan hanesan ema barak halo”. (2 Korinto 2:17) Paulo hatete: “Bainhira ami haklaken liafuan diʼak kona-ba Maromak ba imi, ami serbisu loron no kalan hodi hetan ami-nia presiza atu labele hatodan imi.”—1 Tesalónika 2:9.

 Klaru katak, ema Kristaun sira-neʼe presiza osan atu selu buat balu atu halaʼo serbisu haklaken iha fatin barak no mós atu ajuda ema neʼebé presiza. Maibé sira nunka husu osan ba knaar neʼebé sira halo. Ema bele fó kontribuisaun se sira hakarak, hodi tuir prinsípiu sira tuirmai:

•   2 Korinto 8:12: “Tanba Maromak kontente bainhira ema hakarak fó buat ruma husi laran, hodi tuir buat neʼebé sira iha, laʼós tuir buat neʼebé sira la iha.”

   Neʼe katak: Importante liu mak ema nia motivu, laʼós osan hira ema neʼe fó.

•   2 Korinto 9:7: “Diʼak atu ema ida-idak fó tuir buat neʼebé nia deside ona iha laran, laʼós ho laran-todan ka obriga an, tanba Maromak hadomi ema neʼebé fó ho laran haksolok.”

   Neʼe katak: Maromak lakohi ema ida fó buat ruma tanba obriga an. Maromak kontente bainhira ema ida fó buat ruma tanba hakarak rasik.

 Bíblia hatudu ho klaru katak laʼós relijiaun hotu ka adorasaun hotu mak Maromak simu. (Mateus 7:21-23) Bíblia mós fó sai katak organizasaun relijiaun mak hanesan feto-aat, tanba sira serbisu hamutuk ho governu atu hetan osan no lukru. Rezultadu mak ema barak iha mundu tomak sai vítima. (Apokalipse 17:1-3; 18:3) Bíblia mós fó sai katak la kleur tan Maromak sei halakon relijiaun falsu hotu.—Apokalipse 17:15-17; 18:7.

 Ohin loron, Maromak lakohi atu ema laʼo sala dalan ka dook husi nia tanba relijiaun falsu nia hahalok neʼebé aat. (Mateus 24:11, 12) Nia hein katak ema neʼebé laran-maus sei aprende dalan neʼebé loos atu adora Nia no sai husi relijiaun falsu.—2 Korinto 6:16, 17.