Arake ty fagnadikadignagne raike tan’Amerika agne, le ty 80 isan-jato ty tanora agne ro mivavake. Faie ty an-tsasa’e amy iareo avao ro mivavake isan’andro. Va’e hieretseretse areke ty ila’e amy iareo tie: ‘Tena raha lahibey vao ty vavake, sa natao mba handaminagne saigne avao?’

•  Ino ty atao tihoe mivavake?

•  Tena mijanjigne vavake vao ty Andrianagnahare?

•  Ino iaby ty azo rehafegne naho fa mivavake?

•  Ty heve ty tanora manahake azo

 Mirehake amy i Mpamorogne ze kila rahay tikagne naho fa mivavake. Tena tombotsoa tsisy hoe’e zay! Ambone lavitse mihoatse o olombelogneo ty Jehovah, faie “tsy lavitse antikagne tsikiraidraike reke.” (Asan’ny Apostoly 17:27) Mandrisike antika aza ty Baiboly tie: “Magnarinea an’Andrianagnahare, le hagnarine anareo reke.”​—Jakoba 4:8.

 Akore ty fomba hagnarineagne an’Andrianagnahare?

•   Mivavake. Mirehake aman’Andrianagnahare rehe naho fa manao io.

•   Mianatse Baiboly. “Misaontsy” ama’o ty Andrianagnahare naho fa manao io rehe.

 Hagnampe azo hifandrambe soa aman’Andrianagnahare ty mivavake naho ty mianatse Baiboly.

 “Tena tombotsoa tsisy hoe’e ze o mirehake amy i Jehovah zao. Satria ireke ty Fara’e Ambone.”​—Jeremy.

 “Vao mainke mihamarine an’Andrianagnahare raho, naho fa rehafeko ama’e iaby ze tena am-poko ao.”​—Miranda.

 Va’e ho sarotsarotse ama’o avao ty hino tie mijanjigne vavake ty Andrianagnahare, ndra tie mino aze naho mivavake ama’e aza rehe. Faie mirehake ty Baiboly fa “Mpijanjigne vavake” ty Jehovah. (Salamo 65:2) Mandrisike azo aza reke tie ‘ankigno ama’e ze raha mampinekoneko azo.’ Ino ty anto’e? ‘Satria mikarakara azo reke.’​—1 Petera 5:7.

 Eretsereto zao: Mirehake mateteke amy ty nama’o maifitse azo vao rehe? Hoe izay ka ty toko’e hatao’o aman’Andrianagnahare. Mivavaha ama’e lognandro, sady tognono i tahinagne tihoey Jehovah naho fa manao izay rehe. (Salamo 86:5-7; 88:9) Mandrisike azo hoe izao ty Baiboly: “Mivavaha lognandro.”​—1 Tesalonianina 5:17.

 “Mirehake amy i Babako an-dagnitse agney raho naho fa mivavake, sady afake mamorake ze am-poko ato ama’e.”​—Moises.

 “Mitovy amy ty ataoko amy Nene naho amy ty namako maifitse ahy ty ataoko naho fa mirehake amy i Jehovah raho. Rehafeko ama’e iaby ze am-poko ato.”​—Karen.

 Mirehake ty Baiboly tie: “Amy ze kila raha, le ampahonigno an’Andrianagnahare ty fangataha’areo amy ty alala ty vavake naho ty fihalaleagne vaho ty fisaoragne.”​—Filipianina 4:6.

 Midika vao zay fa azontikagne rehafegne aman’Andrianagnahare iaby ze olagne mahazo antikagne? Eka! Mirehake ty Baiboly tie: “Ankigno amy i Jehovah ze raha magnavesatse azo, fa hanohagne azo reke.”​—Salamo 55:22.

 Faie tsy ze olagne mahazo azo avao ro horehafe’o naho fa mivavake rehe. Hoe ty somondrara raike atao tihoe Chantelle: “Tsy tena nama i Jehovah raho, naho mangatake avao isake tie mivavake ama’e. Toko’e hisaotse aze hey raho, sady toko’e ho maro ty raha isaorako aze.”

 Eretsereto zao: Ino iaby ty raha azo’o isaoragne i Jehovah? Mieretsereta raha telo azo’o isaoragne aze androany.

 “Naho fa mahatrea folera soasoa rehe, le fa afake misaotse i Jehovah.”​—Anita.

 “Eretsereto tie inogne amo o raha finorogneo ty tena mahagaga azo, ndra andinin-teny tena mampahery azo, le isaoro ty Jehovah naho fa avy eo.”​—Brian.