Maro ty ndaty namoe ty longo’e tamy i loza ignehoe, le nametrake o fagnonteneagne iohoe. Tsy ty vale o fagnonteneagne iohoe avao ro paliave iareo fa mipay fampionognagne ka iareo. Ty ila’e ka mieretseretse tie igne ty raha fara izay ty raty natao o ndatio. Ty voka’e, sarotse amy iareo ty hino tie misy ty Andrianagnahare.

Heve-diso: Tsy mete ty magnontane tie nagnino ro nengàn’Andrianagnahare hamono ndaty indray miarake o Naziao.

 Ty maregne: Ndra o ndaty nanam-pinoagneo aza mba nagnontane tie nagnino ro nengàn’Andrianagnahare hisy ty haratiagne. Nagnontane aze hoe izao, ohatse, ty Habakoka mpaminany: ‘Nagnino raho ro enga’o hahatrea ndaty manao raty? Nagnino ro vazohoe’o avao o ndaty mampahore ty hafao? Nagnino ka raho ro atao’o mahatrea ndaty mpandrava naho hampiarotegne?’ (Habakoka 1:3) Tsy niboseke tamy i Habakoka ty Andrianagnahare. I fagnontenea’e rey aza nampanorate’e agnate Baiboly ao mba ho treantika.

Heve-diso: Tsy midare ty fijalea o ndatio ty Andrianagnahare.

 Ty maregne: Hejen’Andrianagnahare o haratiagneo naho ty fijaleagne atera izay. (Ohabolana 6:16-19) ‘Nikoretse zao ty arofo’e’ naho fa nifeno haratiagne ty tambone tane etoa, tamy ty andro i Noa. (Genesisy 6:5, 6) Azo antoke areke fa nalahelo ty Andrianagnahare tamy i Famonoagne Ndaty Maro Indray Miarakey.​—Malakia 3:6.

Heve-diso: Raha nataon’Agnahare mba hagnasazeagne o Jiosio ty anto i Famonoagne Ndaty Maro Indray Miarakey.

 Ty maregne: Maregne fa nengàn’Andrianagnahare handrava i Jerosalema o Romanao tamy ty taonjato voaloha’e. (Matio 23:37–24:2) Faie tafara izay, le tsy nagnasaze ndra nankasitrake foko raike manokagne ty Andrianagnahare. Ty anto’e, ‘tsy misy hafa o ndatio ty ama’e, ndra Jiosy ndra jentilisa.’​—Romanina 10:12, Dikan-drehake Protestanta.

Heve-diso: Naho toe Andrianagnahare bey hatea naho fara izay ty mahery vata’e reke, le tsy ho nenga’e hiseho i Famonoagne Ndaty Maro Indray Miarakey.

 Ty maregne: Tsy boake aman’Andrianagnahare ty fijaleagne, fa enga’e hiseho avao kindraike. Faie tsy henga’e hitohy nainai’e zay.​—Jakoba 1:13; 5:11.

 Taloha bey tagne, le nisy aly hevetse miomba ty soa naho ty raty niseho. Niteàn’Andrianagnahare halamigne i rahay, le izay ty nahavy aze nagnenga o fijaleagneo hisy naho tsy nikalagne i Famonoagne Ndaty Maro Indray Miarakey tsy hiseho. Rehafe ty Baiboly mazava soa fa tsy Andrianagnahare ty mifehe ty tontolo toy amy izao fa i Devoly. (Lioka 4:1, 2, 6; Jaona 12:31) Hirehake anto’e roe nahavy an’Andrianagnahare hagnenga i Famonoagne Ndaty Maro Indray Miarakey hiseho ty lahatsoratse toy.

1.   Ia ty tena tompon’andraikitse tamy i raha niseho ignehoe? Nisaontsien’Andrianagnahare tamy i Adama naho i Eva ty raha nitea’e hatao iareo. Faie tsy namorese iareo hankatò aze ty Andrianagnahare. Iareo avao ty nijobogne ze raha hevere iareo ho soa naho raty. Raty ty raha nijobògne iareo hatao, manahake ty natao o ndaty marò naho fa tafara tatoy. Ty voka’e, nanjare nifeno haoreagne ty fiaigna o ndatio. (Genesisy 2:17; 3:6; Romanina 5:12) Hoe ty Toro Lala ty Fivavahagne Jiosy (angilé): “Noho itika nanao safidy raty ty nahavy ty ankamaroa ty fijaleagne ambone tane etoa.” Faie tsy tihoe nengàn’Andrianagnahare hanagne safidy sasa o ndatio. Nimei’e fotoagne aza iareo mba hamahà iareo rerike i olagne nanjò iareoy.

2.   Vitan’Andrianagnahare ty mamoagne ty voka-draty natera i Famonoagne Ndaty Maro Indray Miarakey sady tena hanao izay reke. Nampitamà ty Andrianagnahare fa hovelome’e indraike ty ndaty an-tapetrisa’e fa nimate, agnisa izay i aze nimate tamy i Famonoagne Ndaty Indray Miarakey. Va’e ho ore mafe ka i ndaty tsy nimate tamy i fampijaleagne ignehoe naho fa mahatsiaro i raha natao tamy iareoy. Faie hafahan’Andrianagnahare tsy ho an-tsay iareo ao sasa zay. (Isaia 65:17; Asan’ny Apostoly 24:15) Tena ikokoan’Andrianagnahare o ndatio, le azo antoke tie tsy maintsy hagnatanterake i fampitamà’e rey reke.​—Jaona 3:16.

 Tsy nivalike taman’Andrianagnahare sady tsy le tena nikivy loatse ty ankamaroa i ndaty nimate tamy i Famonoagne Ndaty Maro Indray Miarakey. Ty anto’e nihay iareo ty anto’e nagnengàn’Andrianagnahare o fijaleagneo hisy. Hay iareo ka tie magniry hagnafoagne ty voka-draty io reke.