Mateteke ty Baiboly ro mitoka i Jesosy tihoe “Anak’Andrianagnahare.” (Jaona 1:49) Trea amy ty rehake tihoe “Anak’Andrianagnahare” fa Andrianagnahare ty namboatse ze kila raha managn’aigne, agnisa izay ty Jesosy. (Salamo 36:9; Apokalypsy 4:11) Tsy mampianatse ty Baiboly tie nanambaly naho niterake manahake o ndatio ty Andrianagnahare.

 Atao ty Baiboly tihoe “Anak’Andrianagnahare” ka o anjelio. (Joba 1:6) Ankoatse izay, mirehake ty Baiboly tie “Anak’Andrianagnahare” ty Adama, i lahilahy voaloha’ey. (Lioka 3:38) Faie i Jesosy ty namboaren’Andrianagnahare voaloha’e sady namboare’e mivantagne, le izay o mahavy ty Baiboly hirehake tihoeo tie anakison’Andrianagnahare.

•  Fa niaigne tan-dagnitse agne vao ty Jesosy taloha ty naha ndaty aze?

•  Inogne ty natao i Jesosy taloha ty niavia’e tan-tane etoy?

 Eka. Fagnahy tan-dagnitse agne ty Jesosy taloha ty naha ndaty aze. Le ty vatantegna’e ro nirehake hoe izao: ‘Nizotso hirike an-dagnitse agne raho.’​—Jaona 6:38; 8:23.

 I Jesosy heike ty namboaren’Andrianagnahare, vaho izay reke namboatse ty raha hafa iaby. Izao ty rehafe ty Baiboly miomba i Jesosy:

•   “Ie ... ty tale amy ze kila raha namboaregne.”​—Kolosianina 1:15.

•   Ie ty ‘namboaren’Andrianagnahare voaloha’e.’​—Apokalypsy 3:14.

 Tanterake tamy i Jesosy i faminaniagne tihoey “fa ela bey ty niboaha’e, ie, fa haehae.”​—Mika 5:2; Matio 2:4-6.

 Nanagne toeragne ambone reke tan-dagnitse agne. Nirehake miomba o toeragne nanagna’e iohoe ty Jesosy naho fa nivavake tie: “O Baba, omeo voninahitse agnila’o eo raho tie amy izao, le i voninahitse nanagnako tagnila’o eo tamy tie mbe tsy nisy ty tontolo toỳ.”​—Jaona 17:5.

 Nagnampe an-dRae’e tamy i famorognagney reke. Niara-niasa taman’Andrianagnahare ty Jesosy sady “mpiasa tena mahay” reke. (Ohabolana 8:30) Hoe ty Baiboly miomba aze: ‘Ie ty nampiasaen’Andrianagnahare naho fa namboatse ty raha hafa iaby an-dagnitse agne naho an-tane etoy.’​—Kolosianina 1:16.

 I Jesosy ty nampiasaen’Andrianagnahare mba hamboaragne ze raha niforognegne iaby, agnisa izay o anjelio naho ze raha trea maso iaby zao. (Apokalypsy 5:11) Niara-niasa manahake o ndaty mpanao pilàny tragnò naho o mpamboatse tragnò iareo miroanake. Ty raike mamorogne i pilàny, le ty raike magnatanterake i asay.

 Mpinday hafatse reke. Rehafe ty Baiboly tihoe ‘ty Tsara’ ty Jesosy tamy ireke mbe tsy tan-tane etoay. (Jaona 1:1) Midika zay tie nampiasaen’Andrianagnahare reke mba hampita fagnazavagne naho toromareke tamy ty anjely hafa.

 Toe i Jesosy ka ty nampiasaen’Andrianagnahare mba hinday ty hafa’e tamo o ndatio an-tane etoy. Azo inoagne tie nampiasa i Jesosy reke naho fa nagnomey toromareke i Adama naho i Eva tamy i tonda i Edenay tao. (Genesisy 2:16, 17) Va’e i Jesosy ka i anjely nitarike o Israelitao tamy iareo tam-patrambey agney, sady nila nagnorike ty raha nirehafe’e ka iareo.​—Eksodosy 23:20-23. a