Manao Akore ty Pozipozy i Jesosy?
Vale’e ara-baiboly
Tsy misy ndaty mahay tie nanao akore vata’e ty pozipozy i Jesosy. Ty anto’e, tsy mirehake ty miomba izay ty Baiboly. Midika zay fa tsy lahibey ty hahafantaragne izay. Faie ty Baiboly le magnampe antika hahazo sare an-tsaigne tie nanao akore ty pozipozi’e.
Ty tarehe’e: Jiosy ty rene’e, le azo antoke fa nitovy tamy i rene’e reke. (Hebreo 7:14) Azo inoagne fa tsy le tena niambake ty tarehe’e. Nietaketake avao, ohatse, reke tie indraike zay, tamy ireke boake a Galilia agne homba Jerosalema mbeoy, le tsy nisy ndaty nahafantatse aze. (Jaona 7:10, 11) Tsy tena niambake tamo o mpiana’eo ka reke. Tsy le avy le nihay i ndaty hitsepake aze rey, ohatse, ty Jesosy naho tsy i Jodasy Iskariota ro nanoro iareo aze.—Matio 26:47-49.
Ty halava ty volo’e: Tsy lava volo ty Jesosy, satria mirehake ty Baiboly tie “naho lava volo ty lahilahy, le hegnatse ho aze zay.”—1 Korintianina 11:14.
Ty vao’e: Nisy vaoke ty Jesosy. Nankatò ty Lalàna Jiosy natao hoahy ty lahilahy toy reke: “Ko agnafahagne ty sisy o vao’ò.” (Levitikosy 19:27; Galatianina 4:4) Mirehake miomba ty vao i Jesosy ka ty Baiboly amy i faminaniagne miomba ty fijaleagne hahazo azey.—Isaia 50:6.
Ty vata’e: Maro ty porofo tie tena natanjake ty Jesosy. Nahavita nandeha tomboke lavitse, ohatse, reke tamy ireke nanao ty fanompoa’e tan-tane etoay. (Matio 9:35) Indroe nagnalio i tempolỳ ka reke. Natonta’e ty lataba o ndaty mpanakalo vola tamy izaio, sady nisy fotoagne niroahe’e tamy ty karavantsy i biby harégne navarotse tao rey. (Lioka 19:45, 46; Jaona 2:14, 15) Mirehake ty Fangalan-kilala (angilé) naboa i McClintock naho i Strong tie ‘natanjake naho nisalama soa ty Jesosy naho henteagne ty raha rehafe o Filazantsarao.’ —Boke Faha-5, peje 884.
Ty endre’e: Soa fagnahy naho nitretré ndaty ty Jesosy, le azo antoke fa nitrea tamy ty endre’e zay. (Matio 11:28, 29) Ndaty sambe karaza’e ty nipay aze, satria te hampea’e naho hampahereze’e. (Lioka 5:12, 13; 7:37, 38) Ndra o ajajao aza tsy natahotahotse naho fa niarake tama’e.—Matio 19:13-15; Marka 9:35-37.
Heve-diso miomba ty pozipozy i Jesosy
Heve-diso: Misy mihevetse tie Afrikana ty razambey i Jesosy. Ty anto’e, nao mirehake zao ty boke Apokalypsy tie manahake o volon’agnondrio ty volo’e sady manahake o ‘saba nifotsiegneo’ ty tombo’e.—Apokalypsy 1:14, 15.
Ty maregne: “Famantaragne” ty raha rehafegne amy ty boke Apokalypsy ao. (Apokalypsy 1:1) Fagnoharagne avao i fagnazavagne miomba ty volo i Jesosy naho ty tombo’e rey, fa tsy ara-bakiteny. Ty anto’e, tsy ty pozy i Jesosy tamy ireke tan-tane etoay ty tea’e horehafegne, fa tafara i namelomagne aze tamy ty matey. Mirehake ty Apokalypsy 1:14 tie ‘foty manjopiake manahake o volon’agnondrio ty volon-doha’e.’ Inogne ty dika izay? Tsy te hirehake io tie manahake o volon’agnondrio ty volo i Jesosy. Ty loko ty volo’e ro ampitovie’e amo o volon’agnondrio. Rehafegne tie ‘foty manjopiake’ ty volo’e satria fa ela niaignagne reke le manam-pahendreagne.—Apokalypsy 3:14.
Manahake o ‘saba vita fotsy le mamilepiletse agnate laforo aò’ ty tombo i Jesosy. (Apokalypsy 1:15) “Manahake o masoandro mamilepiletseo” ty tarehe’e. (Apokalypsy 1:16) Tsy hisy ndaty hanagne vatagne hoe izay. Fagnoharagne avao areke reo, sady raha indesegne hirehafagne tie naho fa nivelomegne tamy ty mate ty Jesosy, le nanjare ‘nitoboke amy ty hazavagne tsy hay iharineagne ao.’—1 Timoty 6:16.
Heve-diso: Malemeleme ty Jesosy.
Ty maregne: Trea tamy ty raha natao i Jesosy tie lahilahy vata’e reke fa tsy votro. Naho fa niavy hitsepake aze, ohatse, i vahoake ninday fialiagne rey, le tena sahy reke ty nirehake tie: ‘Izaho o Jesosio.’ (Jaona 18:4-8) Tsy maintsy ho natanjake ka reke satria mpandrafitse ty asa’e. Ndra tie nampiasa fitaovagne aza reke tamy izay, le ty tagnagne ro tena niasa bey.—Marka 6:3.
Nagnino ty Jesosy ro nipay fagnampeagne tamy ireke ninday i oren-kataeỳ? Sady nagnino ro ireke ty nimate taloha i ndaty nipehegne tamy ty oren-katae teo rey? (Lioka 23:26; Jaona 19:31-33) Tena nirokake ty Jesosy taloha ty namonoagne aze. Tsy niroro reke tamy i halegney, satria ninekoneko sady mbe nampijalé o Jiosio. Mbe nampijale aze ka o Romanao naho fa ni-maraindray. (Matio 26:67, 68; Lioka 22:42-44; Jaona 19:1-3) Izay ty anto’e nahavy aze nimate aloha.
Heve-diso: Nalahelo lava naho tsy mba nihehe ty Jesosy.
Ty maregne: Mirehake ty Baiboly fa “Andrianagnahare falefale” ty Jehovah Baba i Jesosy. Tena nitovy tamy ty toetsen-dRae’e ty toetse i Jesosy. (1 Timoty 1:11; Jaona 14:9) Ireke aza nampianatse o ndatio tie ino ty toko’e hatao naho te ho falefale vaho ho sambatse iareo. (Matio 5:3-9; Lioka 11:28) Trea amo o porofo reo areke fa ndaty falefale ty Jesosy sady nitrea mateteke tamy ty endre’e zay.
Va'e ho Tea'o Ka
ESSENTIAL BIBLE TEACHINGS
Ino ty Porofo fa Maregne o Baibolio?
Toko’e hiambake amy ty boke hafa ty Baiboly naho Andrianagnahare ty nampanoratse aze.
MIOMBA ANAY
Hangatake Hotilihegne
Miharoa midineke miomba ty Baiboly ndra ianaro soa ty miomba ty Vavolombelo i Jehovah.