Misy An’Andrianagnahare Iaby vao ze Kila Toeragne?
Vale’e ara-baiboly
Vazohon’Andrianagnahare ze kila raha, sady afake manao raha reke ndra aia ndra aia amy ze iteava’e aza. (Ohabolana 15:3; Hebreo 4:13) Faie tsy mirehake ty Baiboly tie, misy an’Andrianagnahare iaby ze kila toeragne ndra ombia ndra ombia, ndra misy aze iaby ze kila raha. Rehafe ty Baiboly fa managne ty toeragne misy aze reke.
Ty vata’e: Fagnahy ty Andrianagnahare. (Jaona 4:24) Tsy trea maso areke reke. (Jaona 1:18) Faie misy toeragne voafaritse misy aze fa tsy tihoe amy ze kila toeragne reke naho fa henteagne ty fahitagne miomba aze amy Baiboly ao.—Isaia 6:1, 2; Apokalypsy 4:2, 3, 8.
Ty misy aze: Amy ty toeragne tsy trea maso agne reke tie miambesatse, ty dika izay amy ty toeragne tsy agnisa ty raha finoro’e. Rehafe ty Baiboly tie ‘an-dagnitse misy aze’ ao ty misy o toeragne iohoe. (1 Mpanjaka 8:30) Rehafe ty Baiboly ka fa misy fotoagne “sambe nitoboke tamy ty toera’e tagnatreha i Jehovah eo” a o anjelio. (Joba 1:6) Midika zay fa misy toeragne voafaritse soa ty misy an’Andrianagnahare.
Afake magnampe ahy vao ty Andrianagnahare naho tsy egne ho egne reke?
Eka. Tena mikarakara ty ndaty tsikiraidraike ty Andrianagnahare. Ndra tie an-dagnitse agne reke, le vazoho’e tie ia amy ty ndaty an-tane etoy ty tena te hampifale aze. Ampea’e i ndatỳ naho fa avy eo. (1 Mpanjaka 8:39; 2 Tantara 16:9) Intoagne iaby ty fomba agnampea i Jehovah ty tena mpanompo’e:
Naho fa mivavake: Le avy le zanjy i Jehovah eo naho eo ty vavake atao’o.—2 Tantara 18:31.
Naho fa kivy: “Marine ze torotoro fo ty Jehovah, sady magnavotse ze mamoe fo.”—Salamo 34:18.
Naho fa mipay tari-dalagne: ‘Hanao ze hampahiratse naho hanoro azo’ reke, amy ty alala ty Saontsi’e, le ty Baiboly.—Salamo 32:8.
Heve-diso miomba an’Andrianagnahare
Heve-diso: Egne ho egne ty Andrianagnahare, sady misy aze iaby ze kila raha finoro’e.
Ty tena maregne: Tsy miambesatse an-tane etoy ty Andrianagnahare sady tsy agnate ze kila raha. (1 Mpanjaka 8:27) Maregne fa ‘magnambara ty voninahin’Andrianagnahare’ o vasiagneo naho ty raha finorogne hafa. (Salamo 19:1) Hipetrake agnate ty sare hoso-doko namboare’e vao i ndaty namboatse azey? Aha’a, hoe izay ka ty Andrianagnahare, tsy hiambesatse amy ty raha finoro’e reke. Manjare mahafantatse raha ila’e miomba i ndaty namboatse sare hoso-dokoy tikagne naho fa magnente i sare namboare’ey. Manjare fatantikagne ka ty toetse i Mpamorogney, le ty “toetse’e tsy trea maso”, naho fa mandineke ty raha finoro’e tikagne. Agnisa izay tihoe managne hery naho fahendreagne reke sady bey hatea.—Romanina 1:20.
Heve-diso: Tsy maintsy egne ho egne ty Andrianagnahare fa naho tsy izay, le tsy hahafantatse ze kila raha reke, sady tsy fara’e mahery.
Ty tena maregne: Hery ampiasaen’Andrianagnahare o fagnahy masigneo. I fagnahy masigney ro ampiasae’e, le vazoho’e iaby ze raha miseho ndra aia ndra aia, ndra ombia ndra ombia sady afake manao raha ndra aia ndra aia amy ty fotoagne iaby ka reke fa tsy voatere ho mbamy ty toeragne raike mbeo.—Salamo 139:7.
Heve-diso: Egne ho egne ty Andrianagnahare satria hoe ty Salamo 139:8: “Fa naho mban-dagnitse mbeo raho, le egne rehe. Sady naho mamelatse ty fandreako an-Kibory ao raho, le agne ka rehe.”
Ty tena maregne: Tsy mirehake miomba ty toeragne misy an’Andrianagnahare o andine’e iohoe. Te hirehake io fa ndra aia ndra aia misy antikagne, le tsy ho lavitse an’Andrianagnahare tikagne, fa ho afake hagnampe antikagne avao reke.
a I Jehovah ty tahinan’Andrianagnahare amy Baiboly ao.
Va'e ho Tea'o Ka
VALEM-PAGNONTENEAGNE ARA-BAIBOLY
Inogne moa o Fagnahy Masigne Zao?
Nagnino ty Baiboly ro mirehake fa ‘fitan’Andrianagnahare’ o fagnahy masigneo?
MIOMBA ANAY
Hangatake Hotilihegne
Miharoa midineke miomba ty Baiboly ndra ianaro soa ty miomba ty Vavolombelo i Jehovah.