Talily Soa Nisorate i Lioka 4:1-44
-
Nitsapae i Devoly hevetse ty Jesosy (1-13)
-
Nanomboke nitory ta Galelia agne ty Jesosy (14, 15)
-
Tsy neké ty ndaty ta Nazareta tao ty Jesosy (16-30)
-
Tamy i sinagoga ta Kapernaomy aoy (31-37)
-
Nisitragnegne i rafoza i Simona ampelay naho ty ndaty hafa (38-41)
-
Nitrea i vahoakey tamy ty toeragne mitokagne ty Jesosy (42-44)
4 Nifeno fagnahy masigne ty Jesosy naho fa niala boake amy i Renerano i Jordana-y eo. Nente i fagnahy masigney tam-patrambey agne reke.
2 Nijanogne tagne tagnate ty 40 andro reke. Tsy nihinagne reke tagnate ze 40 andro zay, hafarà’e nikeré. Le nitsapae i Devoly hevetse ty Jesosy.
3 Hoe ty Devoly tama’e: “Naho toe anan’Agnahare vata’e rehe, le ampanjareo mofo ty vato toy.”
4 Faie hoe ty navale i Jesosy aze: “Voasoratse* tie: ‘Tsy mofo avao ro mahavelogne o ndatio.’”
5 Le nente i Devoly ambone ze vohitse raike zay agne reke, le natoro’e aze tsiela ze fanjakagne iaby ambone tane etoy.
6 Le hoe ty Devoly tama’e: “Homeako azo iaby o fanjakagne rehoe naho ty voninahi’e satria fa nimeigne ahy. Ze teako homeagne ireo ro homeako aze.
7 Naho miankohoke amako eto indraike avao areke rehe mba hivavake amako, le homeako azo reo.”
8 Le hoe ty navale i Jesosy aze: “Voasoratse tie: ‘I Jehovah Andrianagnahare’o avao ro tsy maintsy ivavaha’o, le ireke raike avao ka ro tsy maintsy tompoe’o.’”
9 Nente i Devoly ho a Jerosalema agne reke, le natao’e amy ty toeragne fara’e abo amy ty manda i tempolỳ eo, le hoe reke tama’e: “Naho toe anan’Agnahare vata’e rehe, le mitontà ambane agne,
10 satria voasoratse tie: ‘Hagnirake o anjeli’eo reke mba hiaro azo,’
11 naho tihoe: ‘Hindese iareo an-tagna iareo ey rehe, amy izay tsy hidofotse amo o vatò i tombo’oy.’”
12 Le hoe ty navale i Jesosy aze: “Voasoratse tie: ‘Ko mitsapa hevetse i Jehovah Andrianagnahare’o.’”
13 Naho fa boake nitsapa hevetse i Jesosy tamy ze raha rezay ty Devoly, le nenga’e hey reke amparake ty ahatreava’e fotoagne hafa mete indraike.
14 Le nitarihe i fagnahy masin’Agnaharey* ho a Galelia agne ty Jesosy. Nalaza nagneragne ty faritse nagnodidigne ey ty raha soa natao’e.
15 Nanomboke nitory tamo o sinagogao agne ka reke, le niderae o ndatio iaby.
16 Nandeha a Nazareta agne amy i tanàgne nahabey azey agne ty Jesosy. Isake Sabata, le fatao’e ty nandeha amy i sinagogay ao. Naho fa nitsangagne mba hamaky Soratse Masigne reke,
17 le nimeagne aze i horognam-boke i Isaia mpaminanỳ. Nisokafe’e i horognam-bokey naho fa niavy eo, le nipaliae’e ao ty misy ty soratse toy:
18 “Nimey i Jehovah ty fagnahi’e raho satria tinendre’e mba hagnambara i talily soay amo o mahantrao. Nirahe’e raho mba hagnambara tie: Hafahagne ze ndevo, le hampahatreavegne ze goa. Nirahe’e ka raho mba hagnafake ze mijale,
19 naho hitory miomba i taogne hanehoa i Jehovah hasoa fagnahy lahibeỳ.”
20 Naho fa nivita’e vaky o andine’e iohoe, le nahoro’e i horognam-bokey sady nimea’e i mpikarakara i sinagogaỳ. Nitoboke reke naho fa niavy eo, le nagnente aze iaby ty ndaty tamy i sinagogay ao.
21 Hoe areke ty Jesosy tamy iareo: “Androany ro tanterake i andinin-teny nivakieko anianikey.”
22 Le nirehake raha soa miomba aze iaby iareo sady nigaga noho ty rehake fanjaka nirehafe’e, le hoe iareo: “Tsy i ana i Josefay v’io?”
23 Le hoe reke tamy iareo: “Mino raho fa hampiasae’areo amako i fomba firehake tihoey tie: ‘O dokotera, sitragno hey ty vata’o. Anò an-tanendraza’o etoagne ka i raha iaby nirei’ay tie natao’o ta Kapernaomy agne rey.’”
24 Hoe areke ty Jesosy: “Volagneko ama’areo,* fa tsy misy mpaminany hajae ty ndaty boake amy ty tane niavia’e zao.
25 Nimaro zao ohatse ty ampela vantotse ta Israely agne tamy ty andro i Elia. Tsy niavy tagnate ty telo taogne naho tapa’e i oragney, hafarà’e nisy hakeré ty nagneneke i Israely.
26 Faie tsy tamy ty ampela vantotse ta Israely agne ty nagnirahagne i Elia, fa tamy i ampela vantotse ta Zarefata a Sidona agney.
27 Maro ka ty ndaty nivoa ty habokagne ta Israely agne tamy ty andro i Elisa mpaminany, faie tsy nisy tamy i ndaty rey nisitragnegne, naho tsy i Namana Siriana avao.”
28 Le tena niboseke ze naharey ze raha zay tamy i sinagogay ao.
29 Nitsangagne iareo, le nente iareo ivela i tanàgney agne ty Jesosy. Nente iareo an-dengo i vohitse nisy i tanà iareoy agne reke mba hampitotagne aze ambane agne.
30 Faie nisoroke tagnivo iareo eo ty Jesosy, le nandeha.
31 Le nandeha a Kapernaomy agne reke. A Galelia agne ty misy o tanàgne iohoe. Nampianatse iareo reke tamy i andro Sabatay,
32 le nigaga tamy ty fomba fampianara’e iareo satria boake aman’Agnahare ty raha nampianare’e iareo.
33 Nisy lahilahy raike nisy demonia zay ty tamy i sinagogay ao nikorakorake hoe izao:
34 “O Jesosy te Nazareta, ino ty idira’o amy ty afera’ay? Hamono anay vao ty niavia’o? Haiko anio fa ihe i Masigne nirahen’Andrianagnaharey.”
35 Faie nagnendake aze ty Jesosy tie: “Mamantsy rehe, le miakara boake amo o lahilahy iohoe ao!” Naho fa boake natonta’e i lahilahỳ, le niakatse boake ao reke faie tsy nandratse i lahilahỳ.
36 Nigaga i ndaty rey iaby, le nifampirehake tie: “Henhenke rikiahe ty reha’e i demoniay! Komandie’e avao le avy le miakatse!”
37 Nalaza tamy ty faritse nagnodidigne tey areke reke.
38 Naho fa niakatse boake amy i sinagogay ao ty Jesosy, le nizilike tan-tragno i Simona ao. Nivoa ty tazo mahery i rafoza i Simona ampelay, le nangatake i Jesosy iareo mba hagnasitragne aze.
39 Nitsangagne tamy i fandreagne nisy i rafoza i Simonay eo areke ty Jesosy, le nikomandie’e i tazogney mba hiala amy i rakembay. Le avy le nitsangagne i rakembay, le nanomboke nikarakara hanegne hoahy iareo.
40 Faie naho fa nitsofotse i androy, le nindese ty longo’e mbamy i Jesosy mbeo ze ndaty narare. Nisitragne i ndaty rey naho fa nametra-tagnagne tamy iareo ty Jesosy.
41 Maro ka ty demonia niroahe’e tamo o ndatio, le nikorakorake tihoe: “Anan’Agnahare rehe.” Faie nandily iareo mba tsy hirehake ty Jesosy, satria nihay iareo tie ireke o Kristio.
42 Niala tamo o toeragne iohoe reke naho fa nimaraindray bey, le nandeha tamy ze toeragne mitokagne zay agne. Nipay aze o ndatio, le nahatrea aze tamy ty fara’e. Nitea iareo ho nitanagne tamy iareo eo avao reke.
43 Faie hoe reke tamy iareo: “Tsy maintsy mitory ty talily soa miomba i Fanjakàn’Andrianagnaharey amy ty tanàgne hafa agne ka raho, satria izay ty nagnirahagne ahy.”
44 Le nandeha nitory tamy ty sinagoga a Jodia agne reke.
Fagnamarehagne ambane peje
^ Ndra: “rehafe ty Soratse Masigne.”
^ Abt: “amy ty hery ty fagnahy.”
^ Abt: “Volagneko ama’areo to vata’e.”
