1, 2. Aia ty ahatreavantikagne fitampinagne azo antoke amy hinane zao?

INOGNE ty hatao’o naho tra ty tiobey an-dalagney? I lagnitsey amy zao mihamaiegne erike. Magnelatse naho mangotroke ka i androy. Avy bey i oragney. Mimane lia rehe sady mitolitolike mipay fitampinagne. Trea’o fa misy fitampinagne ty agnolo i lalagney eo. Mafe naho fonitse soa ty eo sady soasoa. Falefale rehe fa nahatrea o fitampinagne iohoe!

² Hoe agnate ty tiobey ka tikagne amy hinane zao. Miharaty ty fiaignagne an-tane etoy. Faie misy fitampinagne raike azo antoke. Miaro antikagne amy ze raha va’e hanimba antikagne o fitampinagne iohoe. Inogne zay? Hoe ty Baiboly: “Hirehake amy i Jehovah raho tie: ‘Fitampinako rehe, vaho fiarovagne mafe ho ahy, sady Andrianagnahareko hatokisako.’ ”—Salamo 91:2.

3. Inogne ty raha toko’e hataontikagne, mba hahavy i Jehovah ho fitampinagne ho antikagne?

³ Vetsevetseo hey zao: Ho fitampinantikagne ty Jehovah, i Mpamboatse naho Mpanjaka  ze kila rahay. Hiaro antikagne lognandro reke fa mahery ambone ze kila raha va’e hanimba antikagne. Ndra tie misy raha raty mahazo antikagne, le hai’e ty magnafake ty voka izay. Inogne ty toko’e hataontikagne, mba hahavy i Jehovah ho fitampinagne ho antikagne? Toko’e hatoky aze tikagne. Mandrisike antikagne ka ty Saontsi’e tie: “Ko isintahagne ty hatean’Andrianagnahare.” (Joda 21) Toko’e tsy hisintake amy ty hatea i Raentikagne an-dagnitse agney vata’e tikagne. Tsy toko’e hengantikagne hihegne ty hateantikagne aze. Izay ty hahavy aze ho fitampinantikagne. Akore ka ty hahavy antikagne ho soa filongoagne aman’Andrianagnahare?

4, 5. Akore ty anoroa i Jehovah ty hatea’e antikagne?

⁴ Naho tsy te hisintake amy ty hatean’Andrianagnahare tikagne, le toko’e hahafantatse ty fomba anoroa’e ty hatea’e antikagne. Eretsereto ty fagnanara ty Baiboly nitrea’o tamy ty boke toy ato. Nimey i Jehovah hitobohantikagne ty tane toy sady fanjaka ty nanoa’e aze. Nifenoe’e hanegne, rano, biby mahaveregne, faritse soasoa, sady nisia’e raha maro hafa ty etoy. Nampanoratse ty Baiboly ka reke, sady nampahafantare’e antikagne agnate’e ao ty tahina’e naho ty toetoe’e. Treantikagne ao ka fa nirahe’e ho an-tane etoy ty Jesosy, Anak’iso’e, sady nenga’e hijale naho ho mate ho antikagne. (Jaona 3:16) Inogne ty soa rambesentikagne boake amy izay? Manjary mitamà hoavy fanjaka tikagne.

⁵ Miankigne amy ty raha hafa raike natao i Jehovah Andrianagnahare ty hoavintikagne. Nagnoregne fanjakagne an-dagnitse agne reke, le ty Fanjakà i Mesia. Fa kidikidy ty sisa, le hagnafake o fijaleagneo o Fanjakagne iohoe sady hagnova ty tane toy ho paradisa. Dineho hey toy: Hiadagne naho ho sambatse nainai’e tikagne naho fa amo o paradisa iohoe ao. (Salamo 37:29) Amparake ty hiavia izay, le mea i Jehovah tari-dalagne tikagne mba hanagnantikagne fiaignagne soa. Nimea’e lalagne hivavake ama’e ka tikagne, le azontikagne atao ty  mirehake ama’e lognandro. Mbe ty ila’e amy ty fomba anoroa i Jehovah ty hatea’e o ndatio iaby naho ty hatea’e azo o raha rehoe.

6. Inogne ty havale’o ty hatea i Jehovah azo?

⁶ Izao ty fagnonteneagne toko’ze ho dinehe’o: Inogne ty havaleko ty hatea i Jehovah? Maro ty hirehake tie: “Toko’e ho teako ka ty Jehovah.” Faie, le tea aze vata’e vao rehe? Nirehake ty Jesosy fa izao ty lily fara’e lahibey: “Teào amy ty fo’o naho amy ty fiai’o vaho amy ty sai’o ty Jehovah Andrianagnahare’o.” (Matio 22:37) Tsy farahiegne fa anto’e maro ty iteà’o i Jehovah Andrianagnahare. Ty fieretseretagne tie tea i Jehovah vao, le fa magnamaregne tie tea aze amy ty fo’o naho amy ty fiai’o vaho amy ty sai’o rehe?

7. Hazavao fa tsy toko’e hatao agn’eretseretse avao ty hatea an’Andrianagnahare.

⁷ Hazavae ty Baiboly fa tsy agn’eretseretse avao ty hatea an’Andrianagnahare. Soa ty fahafantaragne tie tea i Jehovah tikagne, faie mbe fiatomboha ty hatea aze avao zay. Mipay voa poma rehe naho te hahavokatse poma. Ho fale vao rehe naho ty voa i pomay agnate’e ao avao ty meigne azo, ihe amy izao te hihinagne poma? Tsy ho fale! Hambagne amy izay ka fa vaho fiatomboha ty fieretseretagne miomba ty hatea i Jehovah Andrianagnahare zay. Hoe ty Baiboly: “Izao ty hatea an’Andrianagnahare, le ty hagnorihantikagne ty lili’e. Tsy mavesatse ty lili’e.” (1 Jaona 5:3) Trea amy ty vokatse soa indese’e ty hatea an’Andrianagnahare. Toko’e hatoro amy ze raha atao ty hatea aze.—Vakio Matio 7:16-20.

8, 9. Akore ty anoroantikagne fa tea an’Andrianagnahare naho ze raha anoe’e tikagne?

⁸ Manoro ty hateantikagne an’Andrianagnahare tikagne naho fa magnorike ty lili’e naho ty fanoroa’e. Tsy le sarotse loatse ty fanoagne izay. Tsy mavesatse ty lili’e, fa nanoegne hagnampeagne antikagne hanagne fiaignagne fanjaka naho mahafalefale  sady mahafa-po. (Isaia 48:17, 18) Naho fa magnorike ty fanoroa i Raentikagne an-dagnitse agney tikagne, vaho izay manoro fa teàntikagne vata’e ty raha nanoe’e ho antikagne. Mampanahelo fa tsy ampe avao ty ndaty tea izay amy hinane zao. Tsy irientikagne ty tsy hahay misaotse manahake i ndaty tamy ty andro i Jesosy rey. Nampijangagne ndaty folo niazo ty angamae ty Jesosy faie raike avao ty niheregne nisaotse aze. (Lioka 17:12-17) Te hanahake i lahilahy nahay nisaotsey tikagne fa tsy te hanahake i sive tsy nahay nisaotse rey!

⁹ Inogne ty lily i Jehovah toko’e hambenantikagne? Fa nisy nianarantikagne tamy ty boke toy ato, faie hiheregnantikagne indraike ty ila’e. Tsy hisintake amy ty hatean’Andrianagnahare tikagne naho miambegne ty lili’e.

10. Hazavao tie nagnino ty fianaragne miomba i Jehovah Andrianagnahare ro paliaegne?

¹⁰ Mahasoa ty fianaragne miomba i Jehovah mba hiharineagne aze. Tsy toko’e hajanogne ty fianaragne miomba aze. Intoy misy ohatse. Mamindro an-kiririsa ey  rehe, amy ty andro halegne manara. Henga’o hikipe vao i lelan’afoy himateza’e? Tsy henga’o, fa ho tovogna’o hatae avao i afoy mba hirebareba naho hafana. Va’e hiankigna ty fiai’o zay! Hoe hatae mampirehetse afo ty “fahafantaragne an’Andrianagnahare.” Mampirebareba ty hateantikagne i Jehovah ty fahafantaragne aze.—Ohabolana 2:1-5.

11. Inogne ty voka ty fagnanara i Jesosy tamy ze mpanonjohy ty lia’e?

¹¹ Nirie i Jesosy hirebareba tagnate fo i mpiana’e rey ao lognandro ty hatea iareo i Jehovah naho ty Saontsi’e maregne sady sarobily. Naho fa nivelogne indraike reke, le nagnazava tamy i mpiana’e roe lahy rey ty raha ila’e nitokie ty Soratse Hebereo niavy ama’e. Inogne ty voka’e? Hoe i mpiana’e rey naho fa tafara atoy: “Tsy hoe nisy afo nirebareba hao ty fontikagne tamy ie nirehake tamantikagne tan-dalagneỳ, naho tamy ie nagnazava soa tamantikagne ty Soratse Masigney?”—Lioka 24:32.

12, 13. a) Manao akore ty hatea ty ndaty maro an’Andrianagnahare naho ty hatea’e ty Baiboly amy hinane zao? b) Inogne ty raha toko’e hanoentikagne mba tsy hampanitsigne ty hateantikagne?

¹² Nanao akore rehe naho fa nahafantatse ty raha ampianare ty Baiboly? Fale vao ty fo’o le nanjary nafana fo naho tea an’Andrianagnahare rehe? Azo antoke zay. Ndaty maro ka ty nanao hoe izay. Toko’e hikezake tikagne tsy hampihegne o hatea iohoe manomboke amy izao, fa hampitombo aze ndra tie tsy mora ty fanoagne izay. Tsy toko’e hanahake ty tontolo toy tikagne. Nirehake ty Jesosy fa “hihamanitsigne ty hatea ty ndaty maro.” (Matio 24:12) Inogne ty toko’e hatao’o mba tsy hampanitsigne ty hatea’o i Jehovah naho ty hamarenagne agnate Baiboly ao?

¹³ Ianaro ty miomba i Jehovah Andrianagnahare naho i Jesosy Kirisity. (Jaona 17:3) Eretsereto soa ze raha ianara’o agnate Baiboly ao sady dineho tie: ‘Inogne ty ianarako miomba i Jehovah Andrianagnahare boake amy izay? Inogne ty anto’e hafa treako etoa, mahavy ahy ho tea aze amy ty foko naho ty fiaiko vaho amy ty saiko?’ (Vakio 1 Timoty 4:15.) Hirebareba avao ty hatea’o i Jehovah naho izay avao ty dinehe’o.

14. Amy ty akore ty vavake ro mahavy ty hateantikagne an’Andrianagnahare tsy hihegne?

 ¹⁴ Mivavaha lognandro tikagne, soa tie hirebareba avao ty hateantikagne i Jehovah. (1 Tesalonianina 5:17) Treantikagne tamy Toko faha-17 ao fa raha sarobily nimein’Andrianagnahare ty vavake. Mifandoetse soa o ndatio naho fa mifampirehake aman-kasoa fagnahy lognandro. Hifandoetse soa amy i Jehovah lognandro ka tikagne naho fa mivavake ama’e tsy tapake. Faie tsy toko’e hatao fahazaragne avao ty vavake anoegne. Ohatse raha raike avao ro aherekeregne anianiany, ndra tsy avy am-po sady tsy misy dika’e ty raha rehafegne. Toko’e hirehake amy i Jehovah manahake ty ajaja mirehake amy ty rae’e tea aze tikagne. Hiasy i Jehovah tikagne naho fa mifampirehake ama’e sady ho vorahentikagne ama’e ze agnate fontikagne ao. (Salamo 62:8) Raha lahibey amy ty fanompoantikagne ty fianaragne raike ty Baiboly naho ty vavake avy am-po. Izay ty magnampe antikagne tsy hisintake amy ty hatean’Andrianagnahare.

15, 16. Nagnino ty magnambara i Fanjakagney ro voninahitse naho vara ho antikagne?

¹⁵ Va’e hanao fianaragne raike naho hivavake tikagne tsikiraidraike. Handineke ty raha ila’e miomba ty fanompoagne ataontikagne agnatreha o ndaty maro itikagne hinane zay. Tsy inogne zay fa ty firehafantikagne miomba ty raha inoantikagne. Fa nirehake miomba ty hamarenagne agnate Baiboly ao tama o ndaty hafa vao rehe? Voninahitse lahibey ho azo ty fanoagne izay. (Lioka 1:74) Mandrambe anjara amy ty asa lahibey raike nankinegne amy ty Kirisitianagne iaby tikagne naho fa mirehake ty raha nianarantikagne miomba i Jehovah Andrianagnahare. Ty fagnambaragne ty talily soa ty Fanjakàn’Andrianagnahare o asa iohoe.—Vakio Matio 24:14; 28:19, 20.

¹⁶ Sarobily tamy i apositoly Paoly ty fanompoagne nanoe’e, kanao nohare’e amy vara. (2 Korintianina 4:7) Ty mirehake ty miomba i Jehovah naho ty raha safirie’e ro asa fara’e soa. Tompo fara izay fanjaka reke, sady minday soa maro ty fanompoagne aze. Naho fa mandrambe anjara amy izay rehe, le  magnampe ty ndaty soa fo hiharine i Raentikagne an-dagnitse agney sady handeha amy ty lalagne mbamy i havelogne nainai’ey mbeo! Aia ty hisy asa mahafa-po ambone izay? Magnamafe ty finoa’o naho mampitombo ty hatea’o i Jehovah ty fagnambaragne miomba aze naho ty Saontsi’e. Mahafale i Jehovah  ty kezake mafe anoe’o miomba izay. (Hebreo 6:10) Tsy hisintake i hatea’ey rehe naho mazoto manao o asa iohoe lognandro.—Vakio 1 Korintianina 15:58.

17. Nagnino ty asa fagnambaragne i fanjakagney ie mekeo?

¹⁷ Ko haligno fa meke ty asa fagnambaragne i Fanjakagney. Hoe ty Baiboly: “Ambarao o saontsio, sady ko agnorihagne andro ty fanoagne izay.” (2 Timoty 4:2) Nagnino ty fanoagne o asa iohoe amy izao ie mekeo? Izao ty rehafe ty Saontsin’Andrianagnahare: “Marine ty andro lahibey i Jehovah. Fa marine o andro iohoe sady lomay miharine mbetoa.” (Zefania 1:14) Fa kidikidy ty sisa le handrava ty tontolo toy ty Jehovah. Toko’e hampitaoegne o ndatio. Toko’e ho fanta’e fa izao ty andro hijobognagne i Jehovah ho Mpanjaka. “Tsy halaogne” ty fiavy i fara’ey.—Habakoka 2:3.

18. Inogne ty anto’e iharoantikagne manompo i Jehovah amo o Kirisitianagne vata’eo?

¹⁸ Teà i Jehovah hanompo aze miharo amo o Kirisitianagne vata’eo tikagne. Izay ty mahavy ty Saontsi’e hanao tihoe: “Andao tika hisafiry ty hifampagnosihan-tikagne aman-katea naho am-pitolognagne soa, le tsy hahafoe ty fiharoantikagne mivory, manahake ty ila’e fa zatse tsy mivory, fa hifampionogne, somandrake tie fa trea’areo tie mihamarine i andro zay.” (Hebreo 10:24, 25) Mandrenge naho manompo i Andrianagnahare tea antikagney vata’e tikagne, naho fa miharo mivory amo o mpiharo finoagne amantikagneo. Mifanohagne ka tikagne naho fa agne.

19. Inogne ty raha toko’e hataontikagne hampitombo ty hatea o fiangonagne kirisitianagneo?

¹⁹ Mampitombo ty hatea naho ty filongoagne amo o fiangonagneo eo tikagne naho miharo amy ze mpanompo i Jehovah. Toko’e hagnente ty toetoetse soa anagna o ndatio tikagne, manahake ty atao i Jehovah mivazoho ty toetoetse soa anagnantikagne. Ko mitamà tie ho voririke ty mpiharo finoagne ama’o. Ko haligno fa tsy mitovy ty fiovagne vitantikagne amy ty fanompoagne i Jehovah, sady sambe manao hadisoagne tikagne iaby. (Vakio Kolosianina 3:13.) Mikezaha hiragnetse amy  ze ndaty tea i Jehovah, naho te handroso am-pagnahy. Tsy hisintake amy ty hatea i Jehovah rehe, naho manompo aze miharo amo o rahalahi’o naho rahavave’o kirisitianagne reo. Inogne ty valesoa mey i Jehovah ze mpanompo’e tsy mivalike sady tsy misintake amy ty hatea’e?

20, 21. Inogne ty atao tihoe ‘havelogne vata’e’, le inogne ty maha fanjaka i fampitamagne zay?

²⁰ Havelogne ty valesoa mey i Jehovah ze mpanompo’e tsy mivalike. Havelogne manao akore izaò? Fa velogne soa vao ty fahatreava’o ihe hinane zao? Hirehake varagne ty ankamaroantikagne tie: ‘Tsy fa velogne soa vao tikagne kanao miaigne, homagne, naho minon-drano!’ Naho fa mahazoazo aigne tikagne, le va’e hirehake tie: “Izao o fiaignagne vata’e zao!” Faie atoro ty Baiboly fa tsy misy ndaty miaigne vata’e ty amo o andro hinane zao.

²¹ Mandrisike antikagne “hitagne mafe i havelogne vata’ey” ty Saontsin’Andrianagnahare. (1 Timoty 6:19) Amy ty hoavy tikagne vaho izay hahazo o ‘havelogne vata’e’ iohoe. Naho fa voririke tikagne vaho izay ho velogne vata’e, fa ho amy ty nisafirian’Andrianagnahare aze ty fiaignantikagne. Naho fa jangagne naho miadagne sady sambatse vata’e amy i paradisa an-tane etoỳ tikagne, vaho izay managne “i havelogne vata’ey.” Izay ro atao tihoe havelogne nainai’e. (1 Timoty 6:12) Tsy raha tamaegne fanjaka vao zay?

22. Inogne ty toko’e hatao’o mba hitana’o mafe “i havelogne vata’ey”?

²² Akore ty hahavy antikagne “hitagne mafe i havelogne vata’ey”? Naho fa nirehake miomba izay ty Paoly, le nandrisike ty Kirisitianagne “hanao soa” naho “ho mpagnarivo amy ty asa soa.” (1 Timoty 6:18) Miankigne amy ty fagnorihantikagne ze hamarenagne ianarantikagne agnate Baiboly ao ty hahavy antikagne hitagne i havelogne vata’ey. Te hirehake vao ty Paoly fa takalo ty soa ataontikagne “i havelogne vata’ey”? Tsy izay, fa “ty hasoa fagnahy tsy misy hoe’e” boake aman’Andrianagnahare ty  hahazoantikagne o havelogne fara izay fanjaka iohoe. (Romanina 5:15) Mahafale i Jehovah ty mamale soa ze mpanompo’e tsy mivalike. Teà’e hahazo “i havelogne vata’ey rehe.” Hahazo i havelogne mahasambatse naho mampiadagne sady maharetse nainai’e zay ze ndaty tsy misintake amo o hatea iohoe

23. Nagnino rehe ro tsy toko’e hisintake amy ty hatean’Andrianagnahare?

²³ Toko’e handineke ty tsikiraidraike amantikagne tie: ‘Manompo an’Andrianagnahare mifanandrife amy ze sinaontsi’e agnate Baiboly ao vao raho?’ Fanjaka ty raha ataontikagne naho mikezake manao izay sanandro tikagne. Matoky tikagne fa fitampinagne ho antikagne ty Jehovah. Hiaro ze mpanompo’e tsy mivalike amo o andro fara’e mikorontagne zao reke. Handrombake antikagne ka reke, le hinday antikagne amy i tontolo vaovao fanjaka fa mariney ao. Ho fale vata’e tikagne naho fa avy i andro zay! Ho fale ka tikagne fa nahay nijobogne tagnate i andro fara’ey! Naho izay ty jobogne’o manomboke amy izao, le hahazo “i havelogne vata’ey” rehe. Havelogne nirie i Jehovah Andrianagnahare ho azo, sady ho nainai’e zay!