Terake tamy 1934 raho. Boake a Soisa agne ty rae aman-dreneko sady nitoboke ta Timmins, tanàgne fihaliagne vato sarobily a Ontario a Kanada agne zahay. Nanomboke namaky ty gazete Fitalakesan-davitse naho nagnatreke ty fivoria ty Vavolombelo i Jehovah ty reneko tamy 1939 tagne ho agne. Nandese’e nivory reketse i troke raike amako rey raho. Tsy ela tafara izay reke, le nanjare Vavolombelo i Jehovah.

Tsy nahafale i Babako ze fanapahan-keve i Nene zay. Faie tapa-kevetse ty hipiteke amy ty hamarenagne avao ty Nene satria tena tea’e io. Ndra tie rinara aza ty asa ty Vavolombelo i Jehovah ta Kanada agne, tamy ty voalohandoha ty taogne 1940 tagne ho agne, le nipiteke amy ty hamarenagne avao reke. Nisoa fagnahy naho nagnaja i Baba avao ka reke ndra tie nasiaha’e aza. Nahavy ahy naho i troke raike amako enegne rey hagnorike ty hamarenagne ty modely nimei’e. Mahafale fa naho fa nandeha ty fotoagne, le niova ty Baba sady nanjare nisoa fagnahy tama’ay.

Nagnatreke havoriambey manan-tantara ta New York agne raho tamy Aogositra 1950. Nandrisike ahy hampitombo ty fanompoako ty fifandrambesako amy ty rahalahy naho rahavave boake amy ty tane sambe hafa naho ty nitsanogne fagnadikadignagne mpianatse nahavita Sekoly i Gileada. Vao mainke nitapa-kevetse ty hanompo marain-tsy hariva areke raho. Tsindraike niavy tan-tragno agne raho, le avy le nameno fangatahagne ho mpisava lalagne maharetse. Faie nandefa taratasy ho ahy, ty birò i sampa i Kanada tie toko’e hatao badisa heike raho. Natao badisa areke raho tamy 1 Oktobra 1950. Nanjare mpisava lalagne maharetse raho  vola’e raike tafara izay, le tinendre ta Kapuskasing agne. Io ty fanendreagne niazoko voaloha’e. Tena lavitse ty nisy anay o toeragne iohoe.

Nanasa ze Vavolombelogne mahay mirehake Frantsay ty birò i sampagne tamy 1951, mba hifindra amy ty faritane mampiasa firehake Frantsay a Québec agne. Tena nipay mpitory maro ty agne. Nahay firehake Frantsay naho Angilé raho, le nagneke i fanasagney. Tinendre a Rouyn agne areke raho. Tsisy ndaty nifantako ty tagne fa le fa adiresy avao ty nanagnako, arake i nirehafeko tam-boaloha’e tagney. Faie nilamigne avao ze kila raha. Nanjare mpinamagne zahay amy i Marcel, sady tena nahafale ahy ty nanompo ta Québec agne. Tinendre ho mpisava lalagne manokagne raho efatse taogne tafara tatoy.

Nahavoarae fanasagne hagnatreke Sekoly i Gileada kilasy faha-26 ta Lansing Atimo, a New York agne raho, tamy iraho ta Québec agney. Tamy 12 Fevrie 1956 ty andro nizaragne i Diplomay, le tinendre amy ty faritse an’Afrika Atignanagne agne raho. I Ghana b ty itokavagne o toeragne iohoe ty amy izao. Aloha ty nandehanako, le tsy maintsy niheregne ta Kanada agne heike raho amparake ty hahavità i taratasy fifindragne rey. Roe ndra telo heregnandro avao ty nieretsereteko hijanognagne agne.

Tagnate ty fito volagne ty nandignasako o taratasy rehoe ta Toronto agne. Tagnate ze fotoagne zay, le nipetrake tamy i ry rahalahy Cripps tao raho. Izay ty nahafantarako i Sheila, i anak’ampela iareoy. Nanjare nifankatea zahay. Ie raho honirehake ama’e tie hangalake aze ho valy, ndra niavy i taratasỳ. Niarake nivavake zahay amy i Sheila, le nanapa-kevetse tie handeha amy fanendreagne ahikey agne heike raho. Faie nifandefa taratasy zahay sady nandigne mba hahatreavagne naho ho afake hifanambaly avao naho fa afara agne. Ie aloha tsy mora ty nanao izay faie nitsapa’ay naho fa tafara tatoy tie nimete i fanapahan-kevetsey.

Niavy ta Accra, a Ghana agne raho naho fa nandeha lamasina, sambo vaho ropilany tagnate ty vola’e raike. Tinendre ho mpiandraikitse vondrom-paritse  raho tie tagne. Nitilike nagneragne i Ghana naho ty faritse nagnodidigne aze raho, agnisa izay ty Ivory Coast (Côte d’Ivoire amy izao) naho i Togoland (Togo amy izao). Mateteke le ty tomabile i sampagne ty nampiasaeko. Tena teako ty nitilike o rahalahio!

Naho fa fara ty heregnandro, le nagnampe amy ty havoriambey faritse raho. Tsy nanagne Anjomba Fanoagne Havoriambey zahay. Namboatse tragno vonjemeke areke o rahalahio, le nitafoegne bararata mba hiarovagne i mpagnatreke rey tsy ho mae. Ninday biby mbe velogne ho vonoegne o rahalahio mba homeagne ze ndaty magnatreke i havoriambeỳ satria tsy nisy frigo ty amy i toeragne fihinanagney ey.

Nisy raha nampihehe anay ty tamy i havoriambey rey. Misionera niarake tamako ty rahalahy Herb Jennings. c Tamy ireke nanao lahajakay, le nilay boake amy i toeragne fihinanagney ao ze agnombe raike zay. Nilay taloha i mpagnatrekey eo i agnombey. Najano i Herb heike i lahajakay, sady tsy hita i agnombey ka ty homba’e. Faie nisy rahalahy efatse matanjake nitsepake aze sady ninday aze mbamy i toeragne fihinanagney agne. Nihehe i mpagnatrekey tafara izay.

Tagnate i heregnandro i havoriambeỳ, le nandefa ty video tihoe Ny Fitambaran’olon’ny Tontolo Vaovao Miasa tamy ty tanàgne narine tey raho. Nangalake lamba foty raho, le nahantoko agnelagnela ty hatae roe ndra potò roe, le amy igne ty andefasagne i videoy. Tena nitea i ndaty rey i videoy! Naho ty maregne, le maro amy iareo ty vaho samba’e nahatrea video. Nitehatehake mafe iareo naho fa nahatrea ndaty natao badisa tagnate i videoy ao. I videoy ty nagnampe iareo hahatrea fa miharo saigne sady misy magneran-tane o Vavolombelo i Jehovah-o.

Roe taogne teo ho eo tafara ty nanompoako tan’Afrika agne, le nifale raho fa niafake nagnatreke havoriambey iraisam-pirenena ta New York agne. Tena nifale raho fa nifankatrea tamy i Sheila indraike. Mpisava lalagne manokagne ta Québec agne reke faie namonje i havoriambeỳ ka. Nifanoratse taratasy avao zahay amparake izay faie amy izao zahay nifankatrea indraike. Nangatake aze mba ho valiko raho, le nagneke reke. Nanoratse tamy i Rahalahy Knorr d raho sady nangatake naho afake magnatreke ty Sekoly i Gileada ty Sheila, amy izay afake miarake amako an’Afrika agne. Nagneke reke.  Niavy ta Ghana agne avao ty Sheila tamy ty fara’e. Nifanambaly zahay tamy 3 Oktobra 1959 ta Accra agne. Nitsapa’ay tie nitahy anay ty Jehovah satria natao’ay voalohan-draha tamy ty fiaigna’ay avao reke.

Nivoatendre ta Cameroun agne zahay tamy 1961. Nasaegne hagnampe amy ty famorognagne birò ty sampagne vaovao raho. Tena nimaro raha atao raho tamy izay. Maro ty raha tsy maintsy nianarako satria iraho ty tinendre hiandraikitse ty asa ta Cameroun agne. Nivesatse ty Sheila tamy 1965. Tena nisarotse tama’ay ty nieretseretse tie ho rae aman-drene zahay. Ie zahay fa nivognogne amy i andraiki’ay vaovaoy sady nieretseretse ty hiheregne a Kanada agne, le nisy raha niseho tena nimafe tama’ay.

Niafake i ajaja tan-tro i Sheila aoy. Nirehafe i dokoteray zahay tie ni-lahilahy i ana’aỳ. Fa 50 taogne mahery ty nisehoa izay faie le mbe tsaroa’ay avao. Ndra tie tena nalahelo aza zahay, le tsy noly fa nijanogne avao tamy i fanendreagne tena nitea’aỳ.

Nenjehegne mateteke ty rahalahy ta Cameroun agne noho iareo tsy nandrambe anjara tamy ty politike. Vao mainke nihamafe ze fagnenjehagne zay lohotsie naho fa nisy fifilianagne prezidà. Tamy 13 Mey 1970, le nivoarara ty asa o Vavolombelo i Jehovah-o. Tsy mba nieretseretse zahay tie hisy ze raha zay. Nalae o fanjakagneo i tragno i sampagne vaovao tena soay, ie amy izao vaho dime volagne ty nifindra’ay tao. Tagnate ty heregnandro, le niroahegne boake amy i firenenay ao ze misionera iaby agnisa izay zahay mirovaly. Tsy mora ty nienga o rahalahy naho rahavaveo satria tena niteà’ay iareo sady ninekoneko miomba ty raha hanjò iareo ka zahay.

Nanompo tamy ty birò i sampagne ta Frantsa tao tagnate ty enem-bolagne zahay. Nanao ze niazoko natao raho tagne mba hikarakaragne ze raha nilae o rahalahy ta Cameroun agneo. Tamy Desambra tamo o taogne iohoe avao, le tinendre amy ty sampa i Nigeria agne raho. O sampagne iohoe ty nanomboke nikarakara ty asa ta Cameroun agne. Nirambese o rahalahy naho o rahavave ta Nigeria agneo soa zahay sady tena nahafale anay ty nanompo tagne tagnate ty taogne maro.

Nisy fanapahan-kevetse sarotse tsy maintsy nirambese’ay tamy 1973. Tena narare mafe ty Sheila. Tamy izahay nagnatreke havoriambey vondrom-paritse ta New York agney, le nihanaleme reke sady nirehake tamako tie: “Fa tsy afake hanohy sasa raho! Tena rokake raho sady lava marare avao.” Efatse ambifolo taogne mahery ty niaraha’e nanompo tamako tan’Afrika Atignanagne agne. Tena nankasitrahako ty kezake mafe natao’e tamy ty fanompoagne faie tsy maintsy nanao fagnovagne zahay. Naho fa nandineke ty raha nisy zahay sady nivavake mafe miomba izay, le nanapa-kevetse ty hiheregne a Kanada agne mba hahafahagne hikarakara soa ty fahasalama’e. Tena tsy nimora tama’ay ty niala ty asa ty misionera naho ty fanompoagne marain-tsy hariva. Io ty fanapahan-kevetse fara izay ty nimafe tama’ay.

Naho fa niavy ta Kanada agne zahay, le nahazo asa tamy ze namako fa ela zay raho. Mpamarotse tomabile amy ty tanàgne avara i Toronto agne reke. Nagnofa tragno zahay mirovaly sady entagne fa  niasa ty vinili’ay. Afake nanomboke fiaignagne vaovao areke zahay faie tsy nitrosa. Natao’ay tsotra ty fiaigna’ay satria nitamà zahay tie indraike andro agne le ho afake hanompo marain-tsy hariva indraike. Tsy nampoize’ay fa tsy ela tafara izay, le nitanterake i fagniria’aỳ.

Isake Sabotsy, le nanomboke niasa an-tsitrapo amy ty fagnoregnagne ty Anjomba Fanoagne Havoriambey vaovao ta Norval, a Ontario agne raho. Naho fa tafara tatoy raho, le tinendre ho mpiandraikitse i Anjomba Fanoagne Havoriambeỳ. Nihasoa ty fahasalama i Sheila, le nitrea’ay tie afake manohagne ahy amo o fanendreagne vaovao iohoe reke. Nifindra tamy i Anjomba Fanoagne Havoriambeỳ ao areke zahay tamy Jona 1974. Fale zahay fa afake nanompo marain-tsy hariva indraike!

Hasoan-draha fa vao mainke nihasoa ty fahasalama i Sheila. Roe taogne tafara tatoy, le afake nanao ty asa ty faritse zahay. Ty faritse a Manitoba, faritane i Kanada ty nitilihe’ay. Tena manintsigne ty agne. Faie tena nitea anay ty rahalahy naho ty rahavave agne. Nianara’ay tie tsy ty toeragne anompoagne i Jehovah ro lahibey fa tihoe afake manompo aze rehe ndra aia ndra aia ty toeragne misy azo.

Naho fa avy nanao ty asa ty faritse tagnate ty taogne maro zahay, le nasaegne mba hanompo amy ty Betela i Kanada tamy ty taogne 1978. Tsy ela tafara izay, le nisy raha tena nisarotse amako faie nandrambesako lesogne tena lahibey. Nasaegne hanao lahajaka agnate ty lera raike tsy sasa’e amy ty firehake Frantsay raho, tamy ty havoriambey manokagne ta Montréal agne. Nampalahelo fa tsy nahavita nitagne ty fahaliagna i mpagnatrekey raho tamy i lahajakakoy, le nagnomey torohevetse ahike ty rahalahy raike amy Sampan-draharaha ty Fanompoagne ao. Naho ty maregne, le toko’e fa ho nitsapako amparake izay fa tsy iraho ty mpizaka fara izay ty mahay. Faie tsy nandrambe soa i torohevetsey raho. Niboseke raho satria nieretseretse tie nagnakiagne ahike loatse reke sady tsy mba nanao rehake fideragne. Tena diso raho satria nitsaratsara ty fomba nagnomezagne i torohevetsey naho i ndaty nagnomey azey.

Andro tsiampeampe tafara izay, le nisy rahalahy raike agnisa ty Komity Sampagne nirehake tamako miomba i olagney. Nagneke raho tie tsy nandrambe soa i torohevetse nimeagne ahikey le niala tsiny. Tafara izay, le nirehake amy i rahalahy nanoro hevetse ahikey raho. Namela ahike taman-kasoa fagnahy reke. Nianarako tamy igne fa tena lahibey tihoe miambane sady tsy ombia ho halignoko zay. (Ohab. 16:18) Nivavake mateteke tamy i Jehovah miomba igne raho sady tapa-kevetse ty hanagne fomba fihevetse soa miomba ty torohevetse mea ty hafa.

Fa 40 taogne mahery zay ty nanompoako amy Betela i Kanada eto, le nivoatendre ho Komity Sampagne raho nanomboke tamy ty taogne 1985. Nimate ty Sheila valiko tamy Fevrie 2021. Tsy vita tihoe tena manigne aze raho fa mbe marare ka. Faie nibey atao tamy ty fanompoagne i Jehovah raho, sady nifale satria ‘tsy nitreako ty fandehana o fotoagneo.’ (Mpito. 5:20) Ndra tie niatreke olagne maro aza raho tamy ty fiaignako, le mbe maro mandikoatse izay ty raha mahafale ahy. I Jehovah avao ty nataoko voalohan-draha tamy ty fiaignako, le tena nahafa-po ahike ze 70 taogne nanompoako marain-tsy hariva zay. Mivavake raho mba hanohy hanao i Jehovah ho voalohan-draha amy ty fiaigna’e avao o rahalahy naho rahavave tanorao satria naho manao izay avao iareo vaho hahazo fitahiagne naho hofale amy ty fiaignagne.