Va’e hieretseretse hoe izao tikagne aloha ty hianatse: ‘Ino koahe ty raha hianarako?’ Faie toko’e ho tadidientika fa ndra tie misy raha voafaritse soa hianarantikagne aza, le tsy midika zay tie tsy misy raha vaovao tea i Jehovah hampianaregne antika. Ino ty hagnampe antika hitsanogne ty raha vaovao tea i Jehovah hampianaregne antikagne?

Mivavaha mba hahazo fahendreagne. Angataho ty Jehovah mba hagnampe azo hahafantatse tie, ino ty raha tea’e hianara’o ty amy izao. (Jak. 1:5) Mikezaha tsy hionogne amy ze raha fa fanta’o avao.​—Ohab. 3:5, 6.

Engao hisy heri’e amy ty fiaigna’o o Baibolio. “Velogne ty saontsin’Andrianagnahare.” (Heb. 4:12) Isake tie mamaky Baiboly areke tikagne, le hianatse raha vaovao naho raha hagnampe antika amy ty fiaignantika. Izay ty raha hiseho naho engantika hisy heri’e amantikagne ty raha ampianare i Jehovah antikagne.

Ankasitraho ze raha an-databa i Jehovah eo. Manahake o ‘hanegne isan-karaza’eo’ ty hanegne ara-pagnahy mea’e antikagne. (Isaia 25:6) Ko riognegne avao areke ze raha tsy tea’o hianaragne. Naho manao izay rehe, le magnenga an’Agnahare hagnampe azo hanjare ho ndaty soa sady tena ho tea’o ka ty mianatse!