1. Nagnino ro sarotse ty mahatakatse ty tea ty ndaty raike horehafegne amy tihoe mamela azo raho?

 “MAMELA AZO RAHO.” Naho nirehake ndra nanao raha nampalahelo ty ndaty raike rehe, le azo antoke fa ho velombelogne naho nirehake hoe izay ama’o reke! Faie ino maregne ty dika tihoe “mamela azo raho”? Te hirehake vao i ndaty nanoa’o raha tsy metey tie mbe mpinamagne soa avao nareo? Sa tsy te hirehake ty miomba i olagney sasa avao reke? Va’e tsy hitovy ty tea o ndatio horehafegne naho fa mirehake iareo tie mamela azo raho.

 2. Akore ty fomba irehafa ty Baiboly ty famelan-kelo i Jehovah? (Henteo ka i fagnamarehagne ambane pejey.)

² Tsy mitovy amy ty fomba amelantika ty hafa ty fomba amelà i Jehovah heloke. Tena miambake ty aze. Izao ty nirehafe i mpanao salamoy miomba i Jehovah: “Ama’o ao ty tena famelan-keloke, mba hiasia o ndatio azo.” a (Sal. 130:4) Ie, ‘tena mamela heloke’ ty Jehovah. Ireke raike avao areke ty afake mamaritse ty atao tihoe mamela heloke. Amy ty raha ila’e, le tsy mampiasa ty rehake Hebreo maharehake ty famelan-kelo i Jehovah o mpanoratse Baibolio naho fa mirehake ty famelan-kelo o ndatio.

 3. Nagnino ty famelà i Jehovah heloke ro tsy mitovy amy ty antika? (Isaia 55:6, 7)

³ Naho fa mamela ty ndaty raike ty Jehovah, le fafa’e tanterake ty fahota i ndatỳ. Manjare mifandrambe soa amy i Jehovah manahake ty taloha indraike areke reke. Tena mamela heloke tanterake reke sady lava manao izay avao.​—Vakio ty Isaia 55:6, 7.

 4. Akore ty fomba agnampea i Jehovah antika mba hahatakatse ty dika tihoe tena famelan-keloke?

 ⁴ Tsy mitovy amy ty antika ty fomba amelà i Jehovah heloke. Akore areke ty hahafantarantika ndaty tsy voririke ty dika tihoe tena famelan-keloke? Mampiasa oha-drehake ty Jehovah mba hagnampeagne antika hahatakatse ty famela’e heloke. Handineke ty ila’e amy irey tikagne amy ty lahatsoratse toy. Hotreantika boake amy i oha-drehake rey ty fomba agnafaha i Jehovah ty fahotantika, naho ty hagneregna’e ty fifandrambesantika ama’e indraike amy i fotoagney avao. Vao mainke hankasitrake i Raentika bey hatea mamela heloke amy ty fomba sambe hafay tika naho mandineke o oha-drehake rehoe.

MAGNAFAKE TY FAHOTANTIKA TY JEHOVAH

 5. Akore ty atao i Jehovah naho fa mamela ty fahotantika?

⁵ Mateteke, le ampitovie ty Baiboly amy ty enta-mavesatse o fahotagneo. Hoe izao ty fomba nirehafa i Davida Mpanjaka ty fahota’e: “Fa mihoatse ty lohako ty fahadisoako. Manahake ty enta-mavesatse rey, le tsy leoko.” (Sal. 38:4) Faie mamela ty fahota ty mpanao raty mibebake ty Jehovah. (Sal. 25:18; 32:5) Ty rehake Hebreo nadika tihoe “mamela”, le midika tihoe “mangalake” ndra “minday.” Naho fa mamela antika areke ty Jehovah, le manahake ty lahilahy raike matanjake mangalake enta-mavesatse boake an-tsorontikagne ey sady minday aze.

 6. Manao akore ty halavira ty agnafaha i Jehovah ty fahotantika?

⁶ Mirehake oha-drehake hafa miomba ty fomba agnafaha i Jehovah ty fahotantika ho lavitse antika ka ty Salamo 103:12. Hoe reke: “Manahake ty halavy ty atignanagne amy ty ahandrefagne agne, ty agnafaha i Jehovah ty fahotantika ho lavitse antika.” Tena mifankalavitse ty atignanagne naho ty ahandrefagne. Tsy ombia hifankanjò reo. Midika zay tie afaha i Jehovah fara izay ty lavitse antikagne ty fahotantika. Magnomey toky antika zay tie mamela antika tanterake ty Jehovah!

 7. Akore ty fomba irehafa ty Baiboly ty raha atao i Jehovah amy ty fahotantika? (Mika 7:18, 19)

⁷ Afaha i Jehovah fara izay ty lavitse antikagne ty fahotantika, faie mbe tana’e ama’e ey avao vao rey? Tsy izay. Izao ty nisorate i Hezekia Mpanjaka miomba i Jehovah: “Fa naria’o an-dambosi’o agne ty fahotako iaby.” Hoe ka i fagnamarehagne ambane pejey: ‘Nafaha’o mba tsy hofohi’o ty fahotako.’ (Isaia 38:9, 17; f.a.p.) Treantika boake amo o rehake iohoe tie afaha i Jehovah ty fahota ty ndaty raike mibebake le aria’e mba tsy hotrea sasa. Azo adika hoe izao ka o rehake rehoe: “Natao’o hoe tsy nisy ty fahotako.” Mba hagnasongadignagne o hevetse iohoe, le mirehake oha-drehake hafa ka ty Baiboly amy Mika 7:18, 19 ao. (Vakio.) Rehafe’e ao tie atora i Jehovah ambane riake laleke agne ty fahotantika. Taloha, naho fa natorake tagnate riake laleke agne ty raha raike, le lia’e tsy trea sasa.

 8. Inogne ty raha nianarantikagne hatreto?

⁸ Treantika boake amo o oha-drehake reo areke tie, naho fa mamela antika ty Jehovah, le hoe magnafake i fahotagne hoe enta-mavesatse amantikagne rey, le mahatsiaro ho maivankivagne tika. Hoe ty Davida: “Sambatse ze voavela ty helo’e sady voarongogne ty fahota’e. Sambatse ze ndaty tsy isahe i Jehovah ty fahota’e.” (Rom. 4:7, 8) Tena famelan-keloke vata’e an’izao!

MAMAFA TY FAHOTANTIKA TY JEHOVAH

 9. Ino iaby ty oha-drehake ampiasae i Jehovah mba hagnampeagne antika hahatrea tie mamela heloke tanterake reke?

⁹ Mampiasa oha-drehake hafa ka ty Jehovah, mba hagnampeagne antika hahatakatse  tie mamafa ty fahota ty ndaty raike mibebake reke noho i solovoigney. Hoe manasa naho magnalio ty fahotantika ty Jehovah. Hahavy i ndaty nanotay halio zay. (Sal. 51:7; Isaia 4:4; Jer. 33:8) Nisaontsy hoe izao miomba izay ohatse ty Jehovah: “Fa ndra tie mena bey aza ty fahota’areo, le hataoko foty bey, sady ndra tie hoe raven-damba mena antetse aza, le hanahake ty volon’agnondry foty.” (Isaia 1:18) Sarotse afahagne ty tasy mena bey amy ty lamba. Faie mampiasa o oha-drehake iohoe ty Jehovah mba hagnomeagne toky antika tie, afake sasa’e malio ty fahotantikagne, le tsy trea sasa.

10. Ino ka ty oha-drehake hafa ampiasae i Jehovah mba hanoroagne tie mahafoe raha bey reke naho fa mamela antika?

¹⁰ Nirehafentika tamy i lahatsoratse taloha itoỳ ka tie ampitoviegne amy ty “trosa” ty fahotagne. (Mat. 6:12; Lioka 11:4) Isake tie manota amy i Jehovah areke tika, le mihamitombo avao ty trosa’e amantikagne. Anagna’e trosa maro tika! Faie hoe magnafoagne ty trosa’e amantika ty Jehovah naho fa mamela antikagne. Tsy mitake ty mbe hagnoneragne i fahotagne fa navela’ey sasa ty Jehovah. Mahavy antika hahatsiaro ho velombelogne zay!

11. Mirehake ty Baiboly tie mamafa ty fahotantika ty Jehovah. Ino ty dika izay? (Asan’ny Apostoly 3:19)

¹¹ Tena mamafa ty trosantika ndra ty fahotantika ty Jehovah fa tsy tihoe magnafoagne aze avao. (Vakio ty Asan’ny Apostoly 3:19.) Va’e ho ndaty magnafoagne trosa amy ty ndaty raike ty avy an-tsaintikagne ao. Asia’e X ty amy i vola toko’e haloay eo, faie mbe trea eo avao ty habey i volay. Tsy hoe izay tihoe mamafa raha raike. Mba hahazoantika ze oha-drehake zay, le soa naho tadidientika tie vita tamy ty erogne, liten-katae naho rano ty ankra nampiasae o ndatio tie taloha. Miala ty soratse nisorategne amy i ankray naho fa fafagne amy ty eponzy legne, lelia’e tsy trea sasa. Naho fa ‘fafagne’ areke ty trosa raike, lelia’e manjavogne. Ndra ty lia i soratsey aza tsy trea sasa. Hoe raha tsy nisy zay i trosay. Tena manohigne fo ty mahafantatse tie, tsy tihoe magnafoagne ty fahotantikagne avao ty Jehovah fa tena fafa’e hoe tsy nisy i fahotantikagne rey.​—Sal. 51:9.

12. Ino ty ianarantika boake amy ty oha-drehake tihoe rahogne matevegne?

¹² Mampiasa oha-drehake mitovitovy amy izay ka ty Jehovah mba hirehafagne ty fomba amafa’e ty fahotantika. Hoe reke: “Hofafako ty fahadisoa’o, manahake tihoe rongonagne rahogne, sady hofafako ty fahota’o, manahake tihoe rongonagne rahogne matevegne.” (Isaia 44:22) Naho fa mamela heloke ty Jehovah, le hoe mampiasa rahogne matevegne mba handrongonagne ty fahadisoantika amy izay lelia’e tsy trea sasa.

13. Ino ty toko’e hotsapantika naho fa mamela ty helontika ty Jehovah?

¹³ Ino ty ianarantika boake amo o oha-drehake rehoe? Naho fa mamela ty helontika ty Jehovah, le tsy toko’e hahatsapa tika tie mbe amantikagne ey avao i hadisoagne nataontikagney. Noho ty lio i Jesosy Kristy, le foagne tanterake i trosantikagney. Hoe tsy nanota ty fihevera i Jehovah antika naho fa namela ty fahadisoantikagne reke. Izay ty atao tihoe tena famelan-keloke. Manao izay amantikagne reke naho fa tena mibebake tika.

NEKÉ I JEHOVAH HO NAMA’E INDRAIKE TIKAGNE

14. Nagnino tika ro afake matoky ty famelan-kelo i Jehovah? (Henteo ka i sare rey.)

¹⁴ Afake mifandrambe soa amy i Jehovah indraike tika noho ireke tena mamela heloke. Magnampe antika tsy hagnamelo-tegna bey loatse zay. Tsy toko’e hatahotse tika tie,  mbe vignetse amantika avao ty Jehovah sady mipay fomba hagnasazeagne antika. Tsy hisy zay. Naho fa misaontsy ty Jehovah tie namela antikagne, le toko’e hatoky izay tika. Ino ty anto’e? Nisaontsy hoe izao tamy ty alala i Jeremia ty Jehovah: “Hamela ty hadisoa’e raho sady tsy hotsiaroveko sasa ty fahota’e.” (Jer. 31:34) Nahere i apostoly Paoly indraike ze hevetse zay. (Heb. 8:12) Faie ino ty dika o rehake iohoe?

15. Ino ty dika tihoe tsy tsiarove i Jehovah sasa ty fahotantika?

¹⁵ Amy Baiboly ao, ty rehake tihoe “mahatsiaro”, le tsy tihoe irehafagne ndaty raike mahatadidy ndra mieretseretse ty raha niseho taloha avao, fa tafilitse amy izay ka ty raha atao’e. Izao ty raha nangatahe i malaso nipehegne tamy i boda-katae tagnila i Jesosy eoy: “O Jesosy, tsiarovo raho naho fa avy amy i Fanjakà’oy ao rehe.” (Lioka 23:42, 43) Tsy tihoe ty hieretsereta i Jesosy aze amy ze fotoagne zay avao ty nangatahe’e tama’e. Trea tamy ty toin-dreha i Jesosy tie, hanao raha reke mba hamelomagne o malaso iohoe amy ty mate. Naho fa misaontsy areke ty Jehovah tie, tsy hotsiarove’e sasa ty fahotantika, le midika zay tie tsy hanao raha mba hamaleagne antika reke. Tsy hagnasaze antika sasa amy ty fahotagne fa navela’e reke amy ty hoavy.

16. Mamotsotse antika ty tena famelan-keloke. Akore ty fomba irehafa ty Baiboly izay?

¹⁶ Mampiasa oha-drehake hafa ka ty Baiboly, mba hagnampeagne antika hahatakatse tie mamotsotse antika ty tena famelan-keloke. Hoe “ndevo ty ota” tika satria nandova ota. Faie soa avao fa mamela antika ty Jehovah, le hoe ondevo ‘nivotsotse amy ty ota’ tika. (Rom. 6:17, 18; Apok. 1:5) Naho fa fantantika tie namela antika ty Jehovah, le fale manahake ondevo nivotsotseo tikagne.

17. Nagnino ty famelan-keloke ro magnasitragne antikagne? (Isaia 53:5)

¹⁷ Vakio ty Isaia 53:5. Oharegne amy ty ndaty managne aretegne mahafate tikagne  amy ty oha-drehake fara’e hodinehentikagne toy. Faie azo atao tihoe sitragne tikagne noho i solovoigne nimea i Jehovah tamy ty alala i Ana-dahi’eỳ. (1 Pet. 2:24) Nisimba ty fifandrambesantika amy i Jehovah noho itika nanagne aretegne ara-pagnahy, faie noho i solovoigney le niheregne amy ty toe’e indraike zay. Fale ty ndaty raike narare mafe naho fa sitragne. Fale hoe izay ka tika naho fa sitragne amy ty lafi’e ara-pagnahy sady mahazo ty fankasitraha i Jehovah indraike noho ireke mamela antika.

MISY VOKA’E AMY TY FIAIGNANTIKA TY FAMELÀ I JEHOVAH HELOKE

18. Ino ty nianarantika boake amy i oha-drehake sambe hafa miomba ty famelan-kelo i Jehovah amy Baiboly ao rey? (Henteo ka ty efajoro tihoe “Akore ty Fomba Amelà i Jehovah Antika?”)

¹⁸ Ino ty nianarantika boake amy i oha-drehake miomba ty famelan-kelo i Jehovah amy Baiboly ao rey? Naho fa mamela heloke ty Jehovah, le mamela heloke tanterake sady mamela nainai’e. Mahavy antika hifandrambe soa amy i Raentika an-dagnitse agney indraike zay. Faie fantantika tie noho ty hatea i Jehovah antika naho ty hasoa fagnahi’e ty mahavy aze mamela antika, fa tsy tihoe fagneva izay tikagne. Fagnomezagne boake ama’e ty famelan-keloke.​—Rom. 3:24.

19. a) Nagnino tika ro velom-pankasitrahagne? (Romanina 4:8) b) Ino ty hotreantikagne amy ty lahatsoratse magnarake?

¹⁹ Vakio ty Romanina 4:8. Velom-pankasitrahagne i Jehovah tika tsikiraidraike satria Andrianagnahare ‘tena mamela heloke’ reke! (Sal. 130:4) Faie misy raha lahibey tsy maintsy ataontika mba hahavy antika hovoavela heloke. Hoe ty Jesosy: “Naho ohatse nareo mitagne am-po amy ze ndaty nanao fahadisoagne ama’areo, le tsy hamela anareo i Rae’areoy.” (Mat. 6:14, 15) Tsy maintsy manahake ty fomba famelà i Jehovah heloke areke tika. Akore ty fomba hanoantika izay? Izay ty hotreantikagne amy ty lahatsoratse magnarake.