Mipaliava Fagnampeagne

“Ty ndaty raike va’e ho resy ty ndaty raike, fa naho ndaty roe reke le hahatohetse aze.”​—Mpitoriteny 4:12.

MORA ty mandrese o fahavalò naho misy magnampe. Soa areke ty mipay fagnampeagne amo o longò naho o namagneo, ndra amy ty ndaty hafa vognogne hagnampe sady manam-paharetagne naho te ho afake amo o sigarao.

Azo atao ty mirehake amy ty ndaty fa niafake tamo o sigarao satria mahatsapa ty mahazo azo reke sady afake hagnampe. Hoe ty Torben, Kristiana a Danemark agne: “Tena sarobily tamako ty fagnampea ty hafa.” Hoe ty Abraham, a Inde agne: “Tena teako o keleiakò naho o Kristiana namakò. Nagnampe ahy hiala amo o sigarao zay.” Faie tsy ampe zay.

Hoe ty lahilahy raike atao tihoe Bhagwandas: “Mpifoke sigara tagnate ty 27 taogne raho. Nanapa-kevetse hiala raho naho fa nifantako ty raha ampianare o Baibolio miomba ty fahazaragne maloto. Nagnandragne niala naho nagnova ty namako raho sady namonje manam-pahaiagne. Faie tsy nisy nandaitse iaby zay. Tamy i halegne indraike zay areke, le nivoraheko tamy i Jehovah ze tam-poko tao sady nangatake fagnampeagne tama’e raho. Afake avao raho tamy ty fara’e!”

Tena ilaegne ka ty miomagne amy ty olagne va’e hiseho.

[Efajoro]

TOKO’E HAMPIASA FAGNAFOLY VAO REHE?

Maro ty ndaty mampiasa fagnafoly mba hialagne amo o sigarao. Agnisa izay ty fagnafoly misy nikôtinina apetake amy i holitsey. Faie dineho hey ty fagnonteneagne retoa:

Ino ty mahasoa izay? Misy fitsaboagne maro rehafegne tie magnampe mba hialagne amo o sigarao, satria mampihegne ty fijaleagne atera ty fisintahagne o sigarao. Faie misy ty misalasala tie tsy tena mandaitse o raha iohoe.

Ino ty maharaty izay? Va’e hisy voka’e raty ty fagnafoly ila’e. Va’e hiloandoagne i ndatỳ ndra ho kivy ndra hagniry hamono tegna. Tadidio fa mapilitse nikôtinina amy i vatagney ao ka i fagnafoly anoloagne i nikôtinina reỳ sady va’e hamparare. Magnandevo avao ka i raha rey.

Misy fomba hafa vao? Misy fagnadikadignagne natao, le trea fa ty 88 isan-jato ty ndaty mpifoke sigara niafake tama’e, ro nirehake tie niafake avao reke fa tsy nampiasa fagnafoly.