Va’e hieretseretse hoe izao rehe naho fa misy ndaty mpagnorohoro manafike: ‘Midare antikagne vao ty Andrianagnahare? Nagnino ty raha hoe izao ro misy? Ho foagne vao o fagnorohoroagneo a indraike andro agne? Akore ty hiatrehako ze o tahoko zao?’ Magnomey vale’e mahafa-po miomba ireo ty Baiboly.

 Hejen’Andrianagnahare o hampiarotegneo naho o fagnorohoroagneo. (Salamo 11:5; Ohabolana 6:16, 17) Nitrevohe i Jesosy, i solontegnan’Andrianagnaharey zao i mpiana’e rey tamy iareo nampiasa mesa mba hiarovagne azey. (Matio 26:50-52) Ndra i ndaty mampiasa ty tahinan’Andrianagnahare mba hamonovonoagne ndaty rey, le tsy nimei’e alalagne hanao izay. Naho ty maregne aza, le tsy mijanjigne ty vavake anoe i ndaty rey reke.​—Isaia 1:15.

 Vazohon’Andrianagnahare o ndaty mijaleo. Agnisa izay o ndaty mijale noho o asa fagnorohoroagneò. (Salamo 31:7; 1 Petera 5:7) Rehafe ty Baiboly ka fa hofoagnan’Andrianagnahare o hampiarotegneo.​—Isaia 60:18.

 Ambara ty Baiboly ty tena foto o fagnorohoroagneo. Hoe reke: “Nikomandikomandy ty ragne’e iaby o ndatio le nagnoho-doza tama’e.” (Mpitoriteny 8:9) Fa amparake izay ty ndaty managne fahefagne ro nampiasa o fagnorohoroagneo mba hampijaleagne ty hafa. Ty voka’e, magnorohoro ka ty hafa mba hamaleagne fate.​—Mpitoriteny 7:7.

 Mampitamà ty Andrianagnahare fa ho foagna’e o tahotseo naho o hampiarotegneo mba hisia ty fiadanagne an-tane etoy. (Isaia 32:18; Mika 4:3, 4) Le izao ty raha hatao’e:

•   Ho foagna’e ty foto o fagnorohoroagneo. Hosoloan’Andrianagnahare i Fanjakà’e hinday ty tane toy iabỳ ty fitondrà o ndatio. I Jesosy Kristy ty Mpitondra o fanjakagne iohoe. Hanao ty rare’e amy ze kila ndaty reke, sady hofoagna’e o fampijaleagneo naho o hampiarotegneo. (Salamo 72:2, 14) Tsy hisy ndaty hagnorohoro sasa ty amy izay. “Ho fale amy ty fiadanam-bey” o ndatio.​—Salamo 37:10, 11.

•   Ho foagna’e ty voka-draty o fagnorohoroagneo. Ho sitragnen’Andrianagnahare ze ndaty nihara ty voka-draty o fagnorohoroagneo, ndra ara-batagne zay ndra ara-pihetseham-po. (Isaia 65:17; Apokalypsy 21:3, 4) Mampitamà iaby aza reke tie hovelome’e ty mate, le hiaigne amy i paradisa an-tane etoỳ.​—Jaona 5:28, 29

 Rehafe ty Baiboly ty anto’e atokisantikagne tie tsy ho ela ty Andrianagnahare le hanao raha. Faie va’e hieretseretse rehe tie: ‘Nagnino o fagnorohoroagneo tsy le avy le foagnan’Andrianagnahare agneo?’ Naho te hahatrea ty vale izay rehe, le henteo ty video manao tihoe Nagnino o Fijaleagneo Engàn’Andrianagnahare Hisio?