Nanao fagnambaragne ty Fikambanagne Iraisam-pirenena Miomba ty Fahasalamagne, tamy Marsa 2020 fa sokajiegne ho agnisa ty arete-manjamagne ty COVID-19. Maro ty tsy nagnampo tamy izay tie mbe hisy voka’e magneran-tane o virisy iohoe, herentaogne mahery tafara tatoy. Ndaty an-tapetrisa’e ty niatreke i olagne voka i aretegney, ndra ara-batagne zay, ndra ara-pihetseham-po, ndra ara-bola. Voakasike izay ka o Vavolombelo i Jehovah-o. Akore ty atao iareo mba hifagnampeagne amo ze o fotoan-tsarotse zao?

 Amparake ty nisia ty COVID-19 toy, le Komity Mikarakara ze Niazom-boigne miiake 950 mahery ty natsangagne magneran-tane, sady ty Komity ty Mpandrindra amo o Filan-keve-pitantana ty Vavolombelo i Jehovah-o eo ty miandraikitse iareo. Nahazo fagnampeagne tamy i Komity Mikarakara ze Niazom-boigne tan-toeragne teo rey ty Vavolombelogne ila’e, le ty ila’e nahazo fagnampeagne boake amy ty fanjakagne. Fagnampeagne ze niazom-boigne lahibey aza ty alamy i komity iohoe kindraike.

 Dineho ohatse ty raha niseho ta Paragoay agne. Nirehafe ty gazete raike fa noho i aretegney, le tena nihegne bey i toe-karenay, le “maro ty tsy manan-kanegne ta Paragoay agne.” Faie fa nanomboke nizara fagnampeagne maharetse tapa-bolagne i komitỳ ty tan-toeragne tagne. Hanegne naho raha ilaegne amy ty fagnaliovagne naho filiovagne ty tagnate ty entagne tsikiraidraike hoahy ty keleiagne misy ndaty efatse, sady ty vili’e eo amy ty 30 dolara teo ho eo iaby.

 Akore ty natao i mpizara fagnampeagne rey mba hiarovagne ty tegna’e naho ty hafa tsy ho voa i COVID-19? Manao aro vava naho orogne iareo sady magnaja elagnelagne. Hamarene’e soa tie malio soa vao ty toeragne ampiasae i orinasa mpivarotse hanegney sady hentetse soa vao ty fepetse rambese iareo mba hiarovagne ty fahasalamagne. Tsy maintsy manao fiarovagne iaby ohatse ze miandraikitse i entagney, sady tsy maintsy magnalio naho magnisy ranon-draha famonoagne mikroba amy ty tobile’e. Toeragne fa niliovegne tamy ty ranon-draha famonoagne mikroba ro itamiriegne i entagne rey. Fara’e, le magnaja elagnelagne i mpizara fagnampeagne rey naho fa magnomey i raha rey o rahalahy naho o rahavaveo.

 Hatrake tamy Janvie 2021, le neké ty Komity ty Mpandrindra tie 25 tapetrisa dolara mahery ty hampiasaegne amy ty fagnampeagne ze niazom-boigne amy ty aretegne COVID-19. Mitao soa o sampagneo naho o Komity mikarakara ze niazom-boigneo naho fa mampiasa i vola fagnomezagne rey, sady mikezake mipay entagne amy ty vili’e arake ty toko’e ho ie. Te hivily vagnemba 750 kilo, ohatse i rahalahy nandamigne fagnampeagne ze niazom-boigne ta Silia agne rey. Faie niakatse indroe ty vili’e ty vily i vagnembay tagnate ty vola’e raike avao! Fa nagneke hivily aze tamy i vili’e tena lafoy iareo! Faie roe lera tafara izay, le niantso i mpivarotsey tie vaho nisy ndaty nagneregne ty vagnemba fa vinili’e. Navaro’e tamy i rahalahy rey indraike rey, sady tsy i vili’e tena lafo fa nifagnaraha iareoy ty nanoa’e aze fa tamy i vili’e talohay.

 Naho fa niavy hangalake i vagnembay i rahalahy rey, le te hiova hevetse indraike i mpivarotsey. Nanao kitomboke iareo reke tie nao manahake ty fikambanagne hafa naho fa mizara hanegne iareo. Nanao vavake tam-po’e tao boribory ty raike tamy i rahalahy rey, le nirehake tie fa nagnonteneagne soa i fiangonagne tsikiraidraikey mba hahafantaragne tie ia ro tena mipay fagnampeagne. Nihazavae i rahalahy rey ka fa sambe managne ty kolontsai’e i ndaty homeagne i fagnampeagne rey, le atao arakarake ze tena ilae ty keleiagne tsikiraidraike ty fagnampeagne meagne aze. Fara’e, le nimea iareo toky i mpivarotsey tie an-tsitrapo iaby ty vola fagnomezagne naho ty asa atao ty Vavolombelo i Jehovah. Tena nigaga i mpivarotsey. Tsy vita tie nagneke ty hagnomey i vagnembay amy ty vili’e mora reke, fa mbe hagnomey kadò 400 kilo ka naho fa hivily i rahalahy rey amy ty magnarake.

 Fa antetse sady fa mate valy ty rahavave raike atao tihoe Lusu, a Liberia agne. Enegne mianake iareo tie miara-mipetrake. Niarake nihinagne naho nandineke ty teny vakiegne iareo te indraike maraindraigne. Tamy izay ro nivoamare i zafe i Lusu fito taogney tie tsy nisy hanegne sasa ty tan-tragno tao. Nagnontane areke reke tie: “Ino zane ty ho hanentikagne?” Nagnomey toky aze ty Lusu tie fa nangatake fagnampeagne tamy i Jehovah reke, sady azo’e antoke tie tsy maintsy hagnomey ze raha ilae iareo ty Jehovah. Tamy ty folakandro io avao ty Lusu ro nantsoe i androanavi-pagnahy rey mba hangalake ty anjara’e amy i fagnampeagney. Hoe reke: “Nirehake tamako i zafekoy tie tena mijanjigne naho mamale vavake kay ty Jehovah kanao nivalea’e i vavake nataokoy.”

 Mipetrake agnila ty keleiagne Vavolombelo i Jehovah ty ampela raike a Repoblika Demokratika i Kongo agne zay. Naho fa nitrea’e tie nahazo fagnampeagne boake amy ty mpiara-mivavake ama’e i keleiagney, le hoe reke: “Naho fa tapetse ty arete-manjamagne toy, le mba hanjare Vavolombelo i Jehovah ka zahay, satria tena mikarakara ty rahalahi’e naho ty rahavave’e iareo amo ze o fotoan-tsarotse zao.” Nagnontenea i vali’e reke tie: “I vare gony raikey zane ty mahavy azo te hanjare Vavolombelo i Jehovah?” Namale reke tie: “Aha’a tsy izay! Fa i vare gony raike igne ro magnaporofo tie tena mifankatea iareo.”

 Le avy le afake nagnampe o rahalahi’e naho o rahavave’e reo o Vavolombelo i Jehovah-o amy ty arete-manjamagne toy, noho i fagnomezagne maro natao’areo rey. Misaotse satria nagnorike i fanoroagne amy donate.mt1130.com aoy nareo naho fa nanao fagnomezagne.