Tagnate ty 130 taogne mahery zay ty fa nanoa o Vavolombelo i Jehovah-o havoriambey vondrom-paritse isan-taogne. Misy lahajaka sambe hafa mahery ty 40, mozike, fagnadikadignagne vaho video ty amo o fandaharagne iohoe ao ty amy izao. Atao ka ze hahavy i fandaharagney ho “trea naho rey” soa, amy izay hanohigne ty fo i mpagnatrekey sady handrambesa iareo soa. (Lioka 2:20) Akore areke ty ampiasagne i fagnomezagne rey mba hahavy ty ndaty tsikiraidraike handrambe soa amy i havoriambey vondrom-paritse rey ndra aia ndra aia ty misy aze?

 Ty ankamaroa ty terrain fanoagne laboly amo o Tahandrefagneo agne, le fa misy fitaovagne ahareizagne feo naho ahatreavagne video. Faie naho fa itika magnofa i toeragne rey, le ty fitaovantikagne manokagne ty ampiasaentikagne. Ino ty anto’e? Izao ty nirehafe ty rahalahy raike atao tihoe Davida, miasa amy ty Sampan-draharaha ty Feo Naho Video amy Foibey agne: “Amy ty toeragne ila’e hofantikagne zao, le tsy mahazaka mihoatse ty enen-dera ty ankamaroa ty fitaovagne ao lohotsie naho fa ampiasaegne mba hanoagne lahajaka. O terrain fanoagne sporò zao ohatse, le natao hanoagne fitaliliagne naho handefasagne mozike fohefohe avao ty fitaovagne ama’e ao. Misy ekran amy izay ka ty ao mba hahatreavagne ty isa ty laboly nimate, anoagne dokam-barotse naho agnerenkeregnagne ze raha niambake niseho. Faie tsy hoe izay ty tanjontikagne fa hanao ze hahavy i mpagnatrekey ho afake hahatrea video lava sady haharey naho hahazo soa ze raha amy i fandaharagney ao.”

 Sambe managne ty mampiambake aze iaby ty toeragne anoagne i havoriambey rey. Tsy maintsy atao mifagnarake amy izay ka areke ty fitaovagne fandefasagne feo naho video ampiasaegne ao. Vata’e vaho fantatse tie aia iaby ty toeragne hanoagne i havoriambey rey, le dinehe ty Sampan-draharaha ty Feo Naho Video tie aia ty hipetraha i mpagnatrekey. Miankigne amy ty isa ty ndaty tandre i toeragney naho ty isa ty ndaty tombatombàgne iareo tie ho avy ty anoa iareo izay. Naho fa vita zay le dinehe iareo soa ka tie ty aia amy i toeragney ao ro mete soa hametahagne bafla naho ekran vaho ty fomba hampifandrambe soa o raha rehoe. Atao iareo lista ka ze fitaovagne hafa mbe ilaegne, mba hahavy o ndatio hahatrea naho haharey soa i fandaharagney.

 Vao mainke mindra ty hasaro ty fandaminagne i fitaovagne fandefasagne feo naho video rey naho ohatse atao amy ty firehake maromaro amy ty toeragne raike i havoriambeỳ. Naho hadika amy ty firehake hafa zao ohatse i fandaharagney, le tsy maintsy atao ty hahavy i mpandika rehakey haharey sady hahatrea soa i fandaharagney. Tsy maintsy alefa manokagne amy ty radio ka ty feo i mpandika rehakey amy izay maharey soa ze ndaty mampiasa i firehake andikagne i havoriambeỳ. Nasiagne fitaovagne manokagne fandefasagne feo naho video ty amy i toeragne rey, le ndra tie ndaty amy ty firehake valo sambe hafa aza ty magnatreke eo, le sambe afake mahatrea sare naho video mitovy amy ty fotoagne raike avao iareo. Nirehake hoe izao ty Davida:“Tsy mora ty fandaminagne i feo rey, sady tena mila ampiofagnegne soa ka i mpiasa an-tsitrapo ampanoegne aze rey.”

 Fa managne fitaovagne fandefasagne feo naho video ty ankamaroa ty birò i sampagne, le irey ro ampiasae iareo isan-taogne. I fitaovagne rey avao ro ampiasaegne amy ty havoriambey sambe hafa. Ty sampagne a Etazonia agne zao, le mandany vola mihoatse ty 200 000 dolara a isan-taogne mba handefasagne i fitaovagne rey amy i toeragne hanoagne havoriambeỳ agne. Mitsitsy vola ty fanoantika izay satria tsy voatere handany vola hivily fitaovagne vaovao naho hikojakojagne aze tika. Izao ty nirehafe i Steven, nagnampe tamy ty fiandraiketagne ty fandefasagne feo naho video tamy ty havoriambey ta Kanada agne: “Mikezake manao ze fara hery iareo o ekipa mpikarakara feò, mba ho azo antoke soa tie vory eo iaby ty visy, ty bolò naho ze fitaovagne hafa amy izay tsy sahiragne iareo naho fa hampiasa aze amy ty havoriambey magnarake.”

 Lafo ty hofa o fitaovagne fandefasagne feo naho videò sady mateteke ka rey ro tsy le soa sady tsy voakojakoja soa. Noho ze anto’e rey zay, le mateteke tika ro le avy le mivily ze fitaovagne paliantikagne. Amy hinane zao ohatse, le 24 000 dolara ty vily ty ekran LED 5 metatse ty halava’e le 3 metatse ty am-pohe’e. Le ty fily mikrô raike 15 metatse, le eo ho eo amy ty 20 dolara ty vili’e. Miarake manao ‘kalikily ty ho lany’ miarake amy ty Sampan-draharaha ty Fivilianagne Entagne heike areke ty Sampan-draharaha ty Feo Naho Video aloha ty hivily fitaovagne. (Lioka 14:28) Dinehe iareo zao ohatse tie ndaty fire ty ho afake handrambe soa boake amy i fitaovagney. Dinehe iareo ka tie ty mivily vaovao vao ty tena mete soa? Managne toeragne mete soa hagnajariagne i fitaovagney vao tika? Managne fitaovagne fikojakojagne i fitaovagne rey vao tika? Fa misy mpiasa an-tsitrapo voaofagne soa amy ty fikojakojagne i fitaovagne rey ka vao ty ao?

 Mba hampaharetse i fitaovagne rey naho ho fitsitsiagne vola, le mateteke ro le avy le amboaregne ze simba amy i fitaovagne rey ndra mekanike zay ndra elektronike. Asiagne tragno’e tena mafe ka i fitaovagne rey amy izay tsy mora simba naho fa halefa an-toeran-kafa agne. Atao azo antoke ka tie mbe azo amboaregne i tragno’ey naho ohatse simba.

 Mahalatsa o ndaty tsy Vavolombelogneo ty hasoa ty feo naho video amo o havoriambeintikagneo. Tamy ze havoriambey raike zay zao ohatse, le nivoamare ze ndaty raike mpiasa amy ty radio naho ty tele fara izay ty lahibey magneran-tane zay ty hasoa ty fitaovagne fandefasagne feo naho video nampiasaegne tao. Hoe ty Jonathan, agnisa ty rahalahy nagnampe tamy ty fikarakaragne ty feo naho video tamy izay: “Tena nahalatsa i lahilahỳ ty nahafantatse tie kay toe mpiasa an-tsitrapo iaby avao sady mbe tsy za-draha i ekipa niara-niasa tamako rey. Nirehake ka reke fa naho i orinasa iasa’ey ty nanao io, le agnate dime andro ty fanoa iareo aze ie amy izao tagnate ty andron-draike tsy tapa’e avao ty namita’ay aze.” Tamy ze havoriambey raike zay ka, le nirehake hoe izao ty mpiandraikitse i toeragney: “Maro avao ze ndaty manam-pahaiagne amy ty mozike naho video nifandimbe teto zay fa ty fanoa’areo aze ro tena miambake.”

 Ino ka ty soa nirambese’o boake amy i fitaovagne fandefasagne feo naho video rey? Va’e hitovy amy ty raha tsapa i Davida boake an’Angletera agne toy ty raha tsapa’o. Hoe reke: “Fa 88 taogne raho ty amy hinane zao sady lava nagnatreke havoriambey avao amparake izay. Nanjare mora ty mifantoke ty amy izao naho ampitahaegne amy ty taloha. Tena soa i video rey sady le hoe tsiela tapetse zay i fandaharagney. Mazava soa i fandaharagney sady mora azo.” Izao ka ty raha nivoamare i Micheal, boake a Nigeria agne: “Rey soa ty feo i mpizakay sady trea soa iaby ka i video rey, hafara’e mora amo o rahalahio ty mifantoke soa amy i fandaharagney fa tsy miriorio ty say iareo.”

 Naho fa magnatreke i Havoriambey Vondrom-paritse ndra i Havoriambey Vondrom-paritse Manokagne manao tihoe “Ambarao i Talily Soay!” rehe ty amy ty taogne toy, le manokàgna fotoagne handinehagne tie inogne iaby ty raha tsy maintsy natao mba hahavy azo haharey sady hahatrea i fandaharagney. Tena fale zahay satria noho ty fagnomezagne atao’areo ty ahavitagne i asa rey. Ty ila’e amy i fagnomezagne rey le natao amy ty alala ty donate.mt1130.com. Tena ankasitraha’ay ty fatariha’areo.