የሆዋ፡ ሓደ መዓልቲ እቲ ዜፍቅሮ ወዱ ኸም ዚስቀን ከም ዚመውትን ይፈልጥ ነይሩ እዩ። ኣብ ዘፍጥረት 3:15 ተመዝጊቡ ዚርከብ ትንቢት፡ ነዚ ሓቂ እዚ ዚእምት እዩ። እሞኸ የሆዋ፡ መስዋእቲ ወዱ ኽሳዕ ክንደይ ክቡር ምዃኑ፡ ንደቂ ሰብ ኬረድኦም ክኢሉዶ፧ መጽሓፍ ቅዱስ ህያው ምሳሌ ሒዙ ኣሎ። ኣምላኽ ንኣብርሃም፡ ነቲ ዜፍቅሮ ወዱ ይስሃቅ ኪስውእ ሓተቶ።

ኣብርሃም ዓባይ እምነት ነበረቶ። እቲ ብትንቢት እተነግረሉ መድሓኒ ወይ ዘርኢ ኻብ መስመር ወለዶ ይስሃቅ ከም ዚመጽእ፡ ኣምላኽ ተመባጺዑሉ ነይሩ እዩ። ኣብርሃም፡ ኣድላዪ እንተ ዀይኑ ኣምላኽ ንይስሃቅ ኬተንስኦ ኸም ዚኽእል ስለ ዝኣመነ፡ ንወዱ ብተኣዛዝነት ኪስውእ ወሰነ። ካብ ኣምላኽ እተላእከ መልኣኽ ግን፡ ንወዱ ኸይስውእ ከልከሎ። ኣምላኽ ንኣብርሃም ስለቲ ንዜፍቅሮ ውሉዱ ኺስውእ ዘርኣዮ ፍቓደኛነት ድሕሪ ምንኣዱ፡ ነቲ እሙን ሰብኣይ መብጽዓታቱ ደገመሉ።

ጸኒሑ ይስሃቅ፡ ኤሳውን ያእቆብን ዚበሃሉ ኽልተ ኣወዳት ወለደ። ኤሳው ንመንፈሳዊ ነገራት ዚንዕቕ እዩ ነይሩ፣ ያእቆብ ግን ንመንፈሳዊ ነገራት ኣኽቢሩ ዚርኢ ስለ ዝነበረ፡ ዓስቢ ረኸበ። ኣምላኽ ንያእቆብ፡ እስራኤል ኢሉ ስሙ ቐየረሉ፣ እቶም 12 ደቂ እስራኤል ድማ ርእስታት 12 ነገዳት እስራኤል ኰኑ። እታ ስድራ ቤት እቲኣ ናብ ዓብዪ ህዝቢ ዝዓበየት ግን ብኸመይ እያ፧

መብዛሕትኦም እቶም ውሉዳት ነቲ ብዕድመ ዚንእሶም ዮሴፍ ሓዎም ቀንኡሉ። ባርያ ኪኸውን ሸጥዎ፣ እቶም ዝገዝእዎ ሰባት ድማ ናብ ግብጺ ወሰድዎ። ኣምላኽ ግን ነቲ እሙንን ተባዕን መንእሰይ ባረኾ። ዮሴፍ ብዙሕ መከራ እኳ እንተ ኣሕለፈ፡ ኣብ መወዳእታኡ ግን በቲ ገዛኢ ግብጺ ዝነበረ ፈርኦን ተመሪጹ፡ ዓብዪ ስልጣን ተዋህቦ። ኣብቲ ግዜ እቲ ጥሜት ኰይኑ ስለ ዝነበረ፡ ያእቆብ ንደቁ ኻብ ግብጺ እኽሊ ኺሽምቱ ለኣኾም፣ ዮሴፍ ከኣ ኣብ ልዕሊ ዅሉ እኽሊ ተሸይሙ ነበረ። ዮሴፍ ምስ ኣሕዋቱ ብዜደንቕ መገዲ ድሕሪ ምርኻቡ፡ ይቕረ በለሎም፡ ምስ ኵሎም ስድራ ቤቶም ናብ ግብጺ ኸም ዚግዕዙ ድማ ገበረ። ንሳቶም ብሉጽ ምድሪ ተዋህቦም፡ ኣብኡ ድማ ዓበዩን ሰሰኑን። ዮሴፍ ነዚ ነገራት እዚ፡ ኣምላኽ መብጽዓታቱ ንኺፍጽም ኢሉ ኸም ዝገበሮ ገይሩ እዩ ተረዲእዎ።

ያእቆብ መዓልትታት እርጋኑ ብስድራ ቤቱ ተኸቢቡ፡ ኣብ ግብጺ ኣሕለፎ። ኣብ ኣጋ ሞቱ፡ እቲ መብጽዓ እተገብረሉ ዘርኢ ወይ መድሓኒ፡ ካብ መስመር ወለዶ እቲ ይሁዳ ዚበሃል ወዱ ዚውለድ ሓያል ገዛኢ ኪኸውን ምዃኑ ተነበየ። ዮሴፍ እውን ሓያሎ ዓመታት ጸኒሑ ናብ ሞቱ ምስ ቀረበ፡ ኣምላኽ ሓደ መዓልቲ ንእንዳ ያእቆብ ካብ ግብጺ ኸም ዜውጽኦም ተነበየ።

—ኣብ ዘፍጥረት ምዕራፍ 20 ኽሳዕ 50፣ እብራውያን 11:17-22 እተመስረተ።