መዝሙር 105:1-45
105 ንየሆዋ ኣመስግንዎ፡+ ስሙ ጸውዑ፡ግብርታቱ ኣብ መንጎ ህዝብታት ኣፍልጡ!+
2 ዘምሩሉ፡ ውዳሰ ዘምሩሉ፡*ብዛዕባ ዅሉ ዜደንቕ ግብርታቱ ኣጸቢቕኩም ሕሰቡ።*+
3 ብቕዱስ ስሙ ተመክሑ።+
ልቢ እቶም ንየሆዋ ዚደልይዎ ይተሓጐስ።+
4 ንየሆዋን ንብርታዐኡን ድለዩ።+
ወትሩ ገጹ* ድለዩ።
5 እቲ ዝገበሮ ዜደንቕ ግብርታቱንተኣምራቱን ዝፈረዶ ፍርድታትን ዘክሩ፣+
6 እወ፡ ኣቱም ዘርኢ ኣብርሃም እቲ ጊልያኡ፡+ኣቱም ሕሩያቱ ደቂ ያእቆብ ዘክሩ።+
7 ንሱ የሆዋ ኣምላኽና እዩ።+
ፍርድታቱ ኣብ ብዘላ ምድሪ እዩ።+
8 ኪዳኑ ንዘለኣለም፡+ነቲ ዘተስፈዎ ተስፋ* ድማ ንሽሕ ወለዶታት ይዝክር፣+
9 እወ፡ ነቲ ንኣብርሃም ዝኣተወሉ ኺዳን፡+ነቲ ንይስሃቅ ዝመሓለሉ ማሕላ ይዝክሮ።+
10 ነዚ ንያእቆብ ስርዓት፡ንእስራኤል ድማ ናይ ሓዋሩ ኺዳን ገይሩ ኣቘመሉ፡
11 ከምዚ ኢሉ፦ “ብጽሒት ርስትኹም ክትከውን፡+ምድሪ ከነኣን ክህበካ እየ።”+
12 እዚ ዝዀነ፡ ብቝጽሪ ሒደት ከለዉ፡+እወ፡ ኣዝዮም ሒደትን ኣብታ ምድሪ ጓኖትን ከለዉ እዩ።+
13 ካብ ህዝቢ ናብ ህዝቢ፡ካብ መንግስቲ ናብ ካልእ ህዝቢ ኸዱ።+
14 ሓደ ሰብ እኳ ኺጭቍኖም ኣይፈቐደን፣+ምእንታኦም ግና ነገስታት ገንሐ፡+
15 ከምዚ ኢሉ፦ “ንቕቡኣተይ ኣይትተንክይዎም፡ንነብያተይ ከኣ ክፉእ ኣይትግበርዎም።”+
16 ጥሜት ናብታ ምድሪ ጸውዐ፣+ቀረብ እንጌራኦም እውን ኣቋረጸ።*
17 ቀቅድሚኦም ሰብኣይ፡እቲ ባርያ ኪኸውን እተሸጠ ዮሴፍ፡ ለኣኸ።+
18 ንኣእጋሩ ብመቝሕ ኣሰርዎ፣*+ክሳዱ* ድማ ኣብ ሓጺን ኣተወ።
19 ቃሉ ኽሳዕ ዚፍጸም፡+ቃል የሆዋ ኣጽረዮ።
20 ንጉስ ልኢኹ ኣፍትሖ፣+እቲ ገዛኢ ህዝብታት ሓራ ኣውጽኦ።
21 ኣብ ልዕሊ ቤተ ሰቡ ጐይታ፡ኣብ ልዕሊ ዅሉ ንብረቱ ድማ ገዛኢ ገበሮ፣+
22 ኣብ ልዕሊ መሳፍንቱ ኸም ዝደለዮ ስልጣን ኪህልዎ፡*ንዓበይቱ ኸኣ ጥበብ ኪምህሮምሲ ኸምኡ ገበረ።+
23 እስራኤል ድማ ናብ ግብጺ መጸ፣+ያእቆብ ከኣ ኣብ ምድሪ ካም ጓና ዀይኑ ተቐመጠ።
24 ኣምላኽ ድማ ንህዝቡ፡ ኣዝዮም ከም ዚፋረዩ ገበሮም፣+ካብ ተጻረርቶም እውን ኣበርትዖም።+
25 ንህዝቡ ኺጸልእዎም፡ ንገላዉኡ እውን ኪተናዀልዎምሲ፡+ልቢ እቶም ተጻረርቲ ኺልወጥ ፈቐደ።
26 ንጊልያኡ ሙሴን+ነቲ ዝሓረዮ ኣሮንን+ ለኣኾም።
27 ትእምርትታቱ ኣብ መንጎኦም፡ተኣምራቱ ድማ ኣብ ምድሪ ካም ገበረ።+
28 ጸልማት ሰደደ፡ እታ ምድሪ እውን ጸልመተት፣+ካብ ቃላቱ ኸኣ ኣይዓለዉን።
29 ማያቶም ናብ ደም ለወጠ፣ዓሳታቶም ድማ ቀተለ።+
30 ምድሮም ብቝርዖብ ሓሰኽሰኽ በለት፣+ናብ ክፍልታት ነገስታት እኳ ኣተዋ።
31 ጽንጽያ ኸልቢ ኺወርርዎም፡ጻጹት እውን ኣብ ኵላ ሃገሮም ኪዀኑ ኣዘዘ።+
32 ንዝናሞም ናብ በረድ ቀየሮ፣ናብ ምድሮም ከኣ በርቂ* ሰደደ።+
33 ተኽሊ ወይኖምን ኦም በለሶምን ወቕዐ፣ኣእዋም ሃገሮም ድማ ሰባበረ።
34 ኣንበጣ ኺወርርዎም፡ቍጽሪ ዘይብሎም ኩብኩብታ ኸኣ ኪመጽዎም ተዛረበ።+
35 ንሳቶም ንዅሉ ኣትክልቲ እታ ምድሪ በልዕዎ፣ንፍረ እታ ምድሪ ድማ በልዕዎ።
36 ንዅሉ በዅሪ ምድሮም፡ንመጀመርታ ስብእነቶም ቀተለ።+
37 ንህዝቡ ብሩርን ወርቅን ኣትሒዙ ኣውጽኦም፣+ካብ ነገዳቱ ድማ ሓደ እኳ ኣይተዓንቀፈን።
38 ራዕዲ እስራኤል* ኣብ ልዕሊኦም ወዲቑ ነበረ እሞ፡ንሳቶም ምስ ወጹ፡ ግብጺ ተሓጐሰት።+
39 ኪጋርዶም ደበና፡+ብለይቲ ኼብርህ ከኣ ሓዊ ዘርግሐ።+
40 ለመኑ እሞ ብርኒጎታት ኣምጽአ፣+ብእንጌራ ሰማይ ድማ ኣጽገቦም።+
41 ከውሒ ኸፈተ እሞ ማያት ኣውሓዘ፣+እዚ ኸኣ ከም ፈለግ ብምድረ በዳ ወሓዘ።+
42 ከመይሲ፡ ንሱ ነቲ ንጊልያኡ ኣብርሃም ዝኣተወሉ ቕዱስ ቃል ዘከረ።+
43 ስለዚ፡ ንህዝቡ ብፍስሃ፡ንሕሩያቱ ድማ ብእልልታ ኣውጽኦም።+
44 ምድሪ ኣህዛብ ሃቦም፣+ጻማ ጻዕሪ ህዝብታት ከኣ ተረስተዩ፣+
45 እዚ ዝገበረ ኸኣ ስርዓታቱ ኺሕልዉ፡+ሕግታቱ ድማ ኪገብሩ እዩ።
ንያህ ወድስዎ!*
እግረ ጽሑፍ
^ ወይ፡ “ተዛረቡ” ኪኸውን ይኽእል።
^ ወይ፡ “ኣዚሙሉ።”
^ ወይ፡ “ኣብ ቅድሚኡ ምዃን።”
^ ቃ.ቃ.፡ “እቲ ዝኣዘዞ ቓል።”
^ ቃ.ቃ.፡ “ኵሉ በትሪ እንጌራ ሰበረ።” እንጌራ ንምንባር ዜገልግል በትሪ ዜመልክት ኪኸውን ይኽእል።
^ ቃ.ቃ.፡ “ኣሳቐይዎ።”
^ ወይ፡ “ነፍሱ።”
^ ወይ፡ “ንመሳፍንቱ ኸምቲ ነፍሱ ዝደለየቶ ገይሩ ኺኣስሮም።”
^ ወይ፡ “ሃልሃልታ ሓዊ።”
^ ቃ.ቃ.፡ “ራዕዶም።”
^ ወይ፡ “ሃሌሉያ!” ወይ ከኣ፡ “ሃሌሉያህ!” ያህ ኣሕጽሮት ስም የሆዋ እዩ።
