ክንብደል ከለና ዚስምዓና ቝጥዓ ባህርያዊ እኳ እንተ ዀነ፡ ኣምላኽ ግና ሕነ ኽንፈዲ ኣይደልየናን እዩ። ኣብ ክንዳኡስ፡ ንሱ ንዅሉ በደል ስለ ዜዐርዮ፡ ንዕኡ ኽንጽበዮ እዩ ዚምሕጸነና።—መዝሙር 37:7, 10።

ዘይፍጹማት ሰባት ሕነ ምስ ዚፈድዩ፡ ንዓንኬል ጽልኢ እዮም ዜጐሃህርዎ። ስለዚ፡ ሓደ ሰብ እንተ በዲሉካ ወይ እንተ ጐዲኡካ፡ ሕነ ኣይትፍደ። ሰላማዊ ኽትከውን ጽዓር፡ ንስምዒትካ እውን ተቘጻጸሮ። ኣብ ገሊኡ መዳያት፡ በደል ዕሽሽ ምባል፡ ካብ ተወሳኺ ስቓይ ይሰትረካ እዩ። (ምሳሌ 19:11) ልክዕ እዩ፡ ኣብ ገሊኡ መዳይ ንጹር ጥቕሚ ትረኽበሉ እንተ ዄንካ፡ ነቲ ነገር ፍታሕ ክትረኽበሉ ትውስን ትኸውን። ንኣብነት፡ ግዳይ ገበን እንተ ዄንካ፡ ብዛዕባ እዚ ንፖሊስ ወይ ንኻልኦት ሰበ ስልጣን ንምሕባር ትውስን ትኸውን።

ነቲ ጸገም ብሰላማዊ መገዲ ምፍታሕ ዘይትኽእል ኰይኑ እንተ ተሰሚዑካኸ፧ ወይ ከኣ ብሰላማዊ መገዲ ንምፍታሕ ዚከኣለካ ጌርካ ኽነስኻ እንተ ዘይሰሊጡካኸ፧ ኣብ ከምዚ ዝኣመሰለ ዅነታት እውን፡ ሕነ ኣይትፍደ። ሕነ ምፍዳይ፡ ነቲ ዅነታት የጋድዶ እዩ። ሕነ ኣብ ክንዲ እትፈዲ፡ ንዓንኬል ጽልኢ ስበሮ። በዚ ኸምዚ ድማ፡ ንጸገማት ብመገዲ ኣምላኽ ክትፈትሖ ኸም እትኽእል፡ እምንቶ ኸተሕድር ኢኻ። እወ፡ “ኣብኡ ተወከል፡ ንሱ እውን ኬስልጠልካ እዩ።”—መዝሙር 37:3-5።